阿太車仔麵 (已結業)

呢間車仔麵開咗年幾，之前都有食開，個時幾有心做，啲嘢食保持得幾好，個辣醬好惹味，淥麵都食得出有心機。之後幾次來，愈食愈唔掂，都真係要講下。今日來食撈麵，本身有肉燥，有辣醬。食豬頸肉，雞翼同腩肉，跟個湯。一上台，飲啖湯先，味精到爆，完全得雞粉同雞粉水加蔥，欺世盜名，講乜嘢清湯呀？知唔知咩叫湯呀？真係寧願俾杯水我都無咁嬲。再講個麵，真心係大碗料足，但係無溫度囉。肉燥室溫，啲肉又鞋，一定炆得唔夠。豬頸肉就淋啦，但乾囉，又唔知切好咗放咗幾耐。腩肉夠淋又夠味，但唔洗講又係凍囉。雞翼都係唔熱就預咗，但鞋到入心就真係無諗到，大佬！想問下啲餸你擺咗幾耐呀？全晚唯一好係個辣醬，叫仲保持到囉。今次打呢篇嘢，真係忍無可忍先講，最慘係愈來愈多呢啲餐廳囉，唉，真係要求救觀世音先得。