翠林辣蟹舫

趁疫情冇之前咁嚴重，真係要多D出去食飯，同太座諗有咩好食呢?突然個腦“叮”咗一聲，竟然想起電視廣告呢間食肆，一於打電話去訂位試試!地點旺中帶靜好易搵，門口大大個招牌實見到，上到去坐低侍應好有禮貌介紹餐牌，同我地講現在好多餸菜都做半價優惠，睇睇真係街邊都唔止呢個價錢，抵食!我地喺鎮店之寶四款蟹之中點了“黑白胡椒蟹”，惹味情度十級，越食越想食，幾乎連有手套隔住都想啜埋手指，哈哈，兩個人只能食到一款，下次一定要試埋其他三款鎮店之寶蟹先得!“蜜桃咕嚕肉”，好多地方都食到嘅菜式，但呢度煮得超好味道，我好耐冇試過食咁多舊咕嚕肉同埋桃，肉嘅表面有d脆而內裡肉汁豐富唔韌，如果個仔喺度一定啱哂佢!“雞湯野菌燴麵筋”，邊個估到食完隻蟹同一碟咕嚕肉之後，食一啖呢個餸係會令人唔會擺低筷子，忘記自己有幾飽，真心強推，麵筋夠哂入味，狂讚!兩公婆食三樣餸都捧住個肚走，下次一定要叫埋親戚朋友嚟食吓其他嘢先得，後會有期!