Lobster Une (已搬遷) 新店位置

今日行過呢間餐廳，見個叔叔店員親切而努力咁推銷午餐，就諗住試吓啦。入咗去諗住叫午餐牌上嘅海膽卡邦尼意粉，落單，點知過咗一陣，佢話海膽昨晚賣晒，所以無。我心諗昨晚賣晒，點解個手寫黑板餐牌上仲有？而個推銷侍應又唔知？真離奇！好啦，咁唯有試吓佢哋好落力推介嘅龍蝦包餐！點知來到個包細到呢，啲龍蝦又唔多，碎濕濕咁，無啖啖肉嘅感覺，而且除咗兩三片菜，再無其他配料，味道又清淡，同我之前係其他專食龍蝦包嘅鋪頭比，差幾條街。我食完，好似冇食過嘢咁，而且配菜係現成薯片！喂，你俾炸薯條或焗薯填飽個客嘅肚都好啩，起碼食飽啲無咁火。好啦，出甜品，睇個樣係現成泡芙，加幾粒水泡形狀嘅彩色Cereal！哇！呢個係減肥餐呀？成200蚊，食啲咁嘢，真係好昆水！食完，個阿叔好親切埋來問意見，我就費事直講，只係講ok ，不過清淡咗啲，點知佢聽到唔係預期嘅讚賞，就只係講咗個「好」，就行咗去，同頭先推銷我入來完全兩個樣！咁都得？最後我走，連拜拜都無講。我本來諗住唔啱口味又唔夠飽，當自己唔啱食，但見到咁，真係忍唔到，要上來報告俾大家知。你哋幫唔幫襯，自己諗。