魚你相聚

營業中

休息中

餐廳主打酸菜魚，有2-4人套餐，亦有多款自選一人套餐。魚類要咗生魚片同龍利柳，前者鮮甜入口即化，後者啖啖肉，兩款都值得一試。湯底分別為番茄濃湯同老壇酸菜，番茄湯底真心夠濃，味道出，好有驚喜，酸菜就正常發揮，有辣有唔辣老少咸宜。而配料可以自行選擇兩款，白蘿蔔、生菜、大豆芽、薯仔，經典配搭，吸滿湯汁，無可能唔好食😂花膠濃湯雞煲值得一試，熱辣辣上，湯底鮮甜，飲落滑順，仲有好多娃娃菜同雞塊搭配，適合配白飯。見旁邊要咗煲仔飯所以貪得意要多份，即叫即整要等25分鐘左右。窩蛋免治牛肉厚度適中，豉油唔係用出邊嘅甜豉油，另外建議焗耐少少，唔係嘅話就冇嗰種特別嘅焦香氣。小食都有幾多選擇，大力推介涼拌海蜇，少少凍好開胃，而且入口滑溜唔係硬繃繃。手撕雞味道調得唔錯，口感真係一絲絲，不過份量偏少。鳳爪切得好散，但估唔到食落都唔錯，帶有咬口，好似零食咁越食越上癮。最後以紅糖糍粑作結，軟軟糯糯，搭配旁邊嘅醬汁，讚。