Hayashi Japanese Cuisine (已結業)

同靚女C搵嘢食，原本冇諗過食家庭料理，誤打誤撞嚟咗呢度，坐低咗就隨遇而安。兩個人叫一湯二菜，可以分享試唔同嘢。大家口味好似，冇異議下响27款當中好自然揀咗以下幾款主食。先上小食3款，擺碟賣相精緻。漬牛蒡、菜、蘿蔔調味冇過鹹又爽口。上湯啫喱白魚味道帶微酸。滑潺潺嘅海藻，襯煮過嘅炸三文魚，甜鹹適中。主菜炸雞調味椒鹽適中，皮脆卜卜，欲罷不能，我少有地食哂啲皮。伴碟嘅椰菜絲以芝麻醬略拌，爽甜帶香。漢堡扒鬆軟有肉汁，日本咖哩汁不辣帶甜，伴以帶膠質日本白飯仲要任添，人生一樂。春菜天麩羅炸醬薄，食落不油膩，基本上唔知咩嚟，有啲葱條、蔥頭、春筍、菜、葉等，非常嫰口，有趣。西京燒銀雪魚肉質帶實，底味帶鹹，面醬帶甜，好味。麵豉湯濃味恰好，除咗海藻仲有芹菜，飲落有種若隱若現淡淡臘肉味。雞蛋布甸幼滑富蛋香，蜜甜味適中。即磨咖啡滯澀甘香，味道不錯。整體食物質素非常高，碗碟擺位餐具靚，冇乜挑剔位。有啲餸較漏，兩個人分享食啱啱好。令我對日本家庭料理改觀。