霸嗎拉麵 (德己立街)

營業中

休息中

獨食就最啱揀啲長龍餐廳。中環呢間霸嗎午市生意做唔停，店員每秒都好似玩緊俄羅斯方塊，而我當然係吊命嘅小方格啦～上次食過雞叉燒，雖然減肥當尚未成功，但今次都係想試吓充滿油香嘅炙燒豚肉。見到menu有新出嘅期間限定辛辣檸檬拉麵 ，連日式拉麵都可以酸辣喎又點可以唔試吓呢？鮮黃色嘅厚檸檬片令滿佈辣油嘅拉麵清新起嚟， 一大撮蝦米為拉麵染上夏日氣色。賣相滿意，但會唔會只係gimmick?食落甚為驚喜～拉麵掛滿辣湯汁。第一口湯我有擠壓啲檸檬，但湯底已經充滿檸檬皮嘅清香，酸味天然，睇嚟湯底真係特別熬製。嗜酸嘅我將大湯碗當成檸檬茶杯，用筷子篤檸檬，辣湯嘅話酸啲風味更佳，但如果叫唔辣就最好輕手啲，享受檸檬皮嘅清香喇。本來以為檸檬係主角，原來蝦米先係神來之筆。點菜時無視咗佢，但一食不單脆卜卜，蝦味濃若蝦籽。有咗佢，我下次食一定唔叫辣，要食真啲配料味。至於豚肉脂肪比想像中薄，但肥瘦比例恰好，咬落啖啖油香，但又咬到肉地。羽根餃子冇令我失望，香脆可口。上面嘅辣醬層次豐富，辣椒爆炒過幾有鹹香，仲有少少脆。而呢枝水蜜桃味清酒紅粉緋緋，少女味十足。酒味偏淡但桃味十足又唔會過甜，lunch break飲都不為過呀。