大圍小食

營業中

休息中

去咗圍方行街，臨走之前去呢間老字號嘅小食店買外賣返屋企，同一班朋友睇波一齊食。小食店應有盡有，諗得出啲街頭小食都有得賣。最吸引我就係臭豆腐，最鍾意食臭豆腐，越臭越正🙈呢度啲臭豆腐仲配上鉅利醬園嘅甜醬同埋豆瓣醬，外面香脆裏面柔軟，好滋味。另外小食店必備嘅魚蛋、燒賣、煎釀三寶呢度梗係有，我哋每樣買咗啲。魚蛋係陳皮魚蛋，煙煙韌韌，加上舖頭特製嘅辣汁，香辣惹味。魚肉燒賣就正常發揮，煙煙韌韌。煎釀三寶其實唔止三寶，我哋每樣執啲，有釀青椒、釀紅腸、釀豆腐、釀西蘭花、釀冬菇、仲有炸鯪魚球同埋炸餃。我仲叫咗蜜糖燒豬頸肉，真係即叫即燒，豬頸肉厚切，肥美甘香，配上甜甜嘅醬汁，絕配。燒黑椒牛丸都正，夠晒黑椒味。肉碎狗仔粉最正係店舖自製嘅辣菜譜，肉碎加上蔥花再加爽脆辣菜譜，令到味道即時提升，狗仔粉軟滑，連湯一齊食好易入口。另外仲叫左生菜魚肉同埋碗仔翅，今次真係過足口癮，我諗得出嘅小食呢度大部份都有齊。