泰妃雞 (已結業)

日前在Openrice 見到KC兄嘅食評介紹泰妃雞，KC兄係Openrice嘅台柱，佢介紹到一定有啲保證，所以我同阿K專誠到呢度食晚飯。到達時候人不多，我地嚮舖頭前望過吓啲雞，睇落又真係幾好味。一坐低就毫不猶豫點咗泰妃海南雞飯、再加一個小食拚盤、咸魚炒芥蘭同埋冬蔭公。與下面P.J.嘅經驗不同，雞飯一啲都唔鹹，都冇味精(我皮膚冇異樣)，要更正嘅係啲飯正如KC兄所講，唔係雞油飯。據一位泰籍友人所講，正宗泰式嘅雞飯係唔會落雞油，而係用雞汁去肴。雞唔肥，但係唔知點解啲雞肉好滑，不過雞味不明顯，要點啲泰式酸甜醬至夠過癮。冬蔭公亦做得不錯，配料頗足，一大碗都有四、五隻蝦，配上香料同辣椒，係驅走我體內寒毒嘅良方。據阿K所講，呢度嘅冬蔭公同佢嚮泰國食嘅有少少分別，就係比較creamy，所以冇想像中咁醒胃。小食拚盤有炸蝦丸、春卷、香葉雞及串燒兩串。蝦丸同春卷由於係炸嘅，所以幾香口，不過有啲油膩，可能唔係咁啱女士食；香葉雞亦係香口嘢，難得嘅係入面仲保持到豐富嘅肉汁，一般嘅就整到好乾；咸魚炒芥蘭火喉剛好，如果少番少少油更佳。埋單$156，好合理。睇吓餐牌，半隻海南雞要七十幾，與嗌一碟海南雞飯比較就顯得冇咁抵