美味的泰國菜餐廳

營業中

休息中

平日行開呢間美味的泰國菜餐廳都見到好多人食，雖然店舖細細間，得幾張檯仔，但成日都坐滿人，莫非真係咁美味，一於試過先知。 呢間餐廳係正宗泰國人主理，連啲職員都係泰國人，牆上都貼咗泰皇嘅照片，好似去咗泰國咁。 泰式大蝦炒金邊粉用個蛋網包住啲金邊粉，賣相相當吸引，大蝦爽口，味道甜中帶酸，再加少少青檸汁，加埋啲香脆花生，充滿住泰式風味。 炸蝦餅夠熱燙口，咬落去仲有煙出，蝦餅炸得金黃香脆，爽口彈牙。 燒豬頸肉真係必點㗎， 肉質好爽脆，亦有焦香，再配埋個泰式酸辣汁無得輸。 泰式沙嗲串燒係每次食泰國菜必點嘅菜式，豬牛雞各點咗一串，表面微焦，加埋啲沙嗲醬，真係非常滋味。 黃咖喱啱晒我呢啲唔食得辣，但又想品嚐下咖喱滋味嘅人去點，今次揀咗雞，有濃濃嘅咖哩香同椰香，配菜薯菜夠粉夠入味，淨係撈啲汁都可以食多兩碗飯啦。