砂煲兄弟 (東港城) (已結業)

呢日放假所以喺閒日同呀媽去咗將軍澳行街，順便食個晏。間舖個位置係出入口電梯位，可以話幾方便，但又有機會成為盲點位🙈。中午一點去到都幾多人，去完轉洗手間返嚟就有位。餐廳唔算細，環境幾靚，有比心機裝修過下，復古味濃，我哋2個人有卡位坐。餐廳主打香港味道🇭🇰，不乏創意料理，例如有比較新派嘅煲仔飯。午市有做客飯，都係$5x好抵，而且宜家星期一至五做緊主餐牌85折優惠，散叫都ok，又有嘢啱食啲。呀媽最愛食饅魚，所以叫咗個鰻魚牛蒡煲仔飯($85)，煲仔飯賣相都幾吸引，而且個配搭幾夾，牛蒡絲好爽口，啲飯個汁又好好食😋，全部食哂。另外要咗金沙蝦($138)，有成6-7隻，🍤蝦都幾新鮮同香口，不過同我想像中流哂沙嗰種金沙蝦唔同，我亦以為係無殼的。最後要咗份蝦多士($33)，有4件，點沙律醬啱哂，但蝦膠份量少咗啲，所以成件多士較為薄身。飲品以半價價錢($15)要咗杯透心涼紅豆冰凍奶茶，都幾大杯，紅豆夠哂多，唔錯！總括嚟講，呢間街坊店幾好，選擇又多，而且店員好友善，好好禮貌😊。餐廳名叫砂煲兄弟，果然煲仔飯係幾正，除咗傳統臘味外，仲有啲新派款式，啱哂一家大細食，性價比唔錯。