九江燒味飯店 (已結業)

九江街最近新開咗一間九江燒味飯店，今日就約埋同事一齊試吓。斬料位置乾淨企理，而且窗口向着大街，燒味一目了然。餐單圖文並茂，非常清晰。是日中湯係青紅蘿蔔湯，完全冇味精。見佢嘅燒鵝都幾靚，所以就揀咗九江燒鵝皇雙拼飯。九江燒鵝皇果然皮脆肉嫩，好耐未食過咁新鮮嘅脆皮燒鵝。而佢嘅黑毛豬豚肉蜜汁叉燒亦都好出色，所揀嘅部位做出嚟嘅叉燒肥瘦適中，又夠腍身，加埋佢嘅叉燒汁送飯一流。脆皮燒腩仔仍帶餘溫，個皮仲卜卜脆，同樣肥瘦適中，令我想加多碗白飯。除咗燒味，呢度仲有提供簡單碟頭飯，試咗佢嘅蘿蔔炆牛腩飯。呢個飯非常足料，蘿蔔夠入味，汁比較清，感覺冇咁油膩。奶茶鴛鴦夠香滑，絕對有香港茶記嘅水準。