大少燒味茶餐廳

營業中

休息中

聽朋友講呢間燒味茶餐廳好特別，因為有一個大少潛艇，其他地方食唔到，趁今日入咗嚟大埔，一於買一個嚟試吓啦。一嚟到大約七點幾，估唔到買外賣仲要排隊，見到好多人都係買燒味斬料返屋企食，本身準備去食飯冇諗住買燒味，但係見到佢掛出嚟嘅燒味好似好吸引，忍唔住都買返啲嚟試吓。大約等咗10分鐘就到我啦，個大少潛艇係即刻整嘅，不過都係等咗一陣就有啦。我急不及待即刻喺附近公園打開咗嚟食，個包好大，揭開嘅時候見到好多叉燒同埋炒蛋。叉燒睇落半肥瘦，而且都有唔少燶邊，係我最鍾意食嘅款式。炒蛋都炒得好靚，唔知食落會點呢。一咬落去估唔到真係驚為天人，脆脆地嘅包襯埋內裏嫩滑嘅炒蛋，而且叉燒都好香，真係第到食唔到㗎。另外我都忍唔住買咗半隻燒鵝返屋企斬料，返到屋企一打開，份量好多之餘而且油香好足夠。適落外皮好脆，而且鵝未好夠，好香，我試咗一隻燒鵝髀，唔使點酸梅醬已經好好食。呢間燒味餐廳價錢平，而且份量夠味道都好好，以後都一定會再嚟買呀。