山本屋 (圍方)

營業中

休息中

大圍新開間烏冬店，諗住同男朋友一齊去試下，講到話百年老店，又係日本開過嚟，我同男朋友都幾鍾意食烏冬就諗住入去試下。首先，排隊要排成粒鐘。喺出邊排隊可以透過玻璃窗望入去，啲顧客食完離開之後，隔咗10分鐘先有店員去執檯，明知出邊排晒長龍，都唔快快手執好檯安排顧客入座。其次，上菜速度慢。我觀察到佢哋係8個鍋8個鍋咁出，出完一輪又要等多15分鐘，然後都係跟住客人落單時間煮，咁啱我同我男朋友張單就係第9同第10張，所以又要等多一輪，點知個店員漏咗我男朋友張單，足足等咗45分鐘先有得食。有時真係覺得呢件事好反智，明白用砂鍋煮係需時耐啲，但佢可以同時煮嘅數量亦都太少了吧，怪唔得要排咁耐隊。最後講返啲食物質素，網上啲youtuber吹到幾好食幾好食，可能個人口味唔同啦。我哋嗌咗味增黑豚肉煮烏冬、咖哩吉列豬扒煮烏冬同埋燒地雞手羽，個雞翼的確幾好食，幾juicy，皮脆肉嫩，但係烏冬真係令我大跌眼鏡，烏冬手打係幾煙靭，但係一啲都唔掛汁，齋食烏冬就係原汁原味嘅麵粉味，令到成碗烏冬食落唔和諧，咖哩汁又太淡，冇乜咖哩味，真係唔會再幫襯。