張公子

營業中

休息中

前排約朋友去觀塘工廠區食一間隱世中菜館，位置喺駿業熟食中心對面，當日平日夜晚去食，都頗多人幫襯，餐廳環境舒服， 空間寬敞，檯與檯之間都有保持一定嘅距離，唔會好似平時嘅茶樓咁逼埋一齊。餐廳都好貼心，會預備小蠟燭俾茶壺保溫，職員亦都好主動幫手添水。🥢公子特色凍豆腐呢個前菜係一人分量，豆腐口感非常嫩滑，再淋上薑醋汁，味道酸甜，好似食緊豬腳薑，非常開胃。
🥢秋霧鹵醉蝦（五隻)👍呢個菜式非常適合打卡，擺盤非常有心思，利用底部嘅乾冰營造出煙霧效果。鹵醉蝦肉質非常爽彈鮮甜，味道帶淡淡嘅酒香味，同時會食到花椒麻香味，味道豐富。🥢口水雲吞皮蛋雲吞餡料豐富，入面有多隻蝦仁，而皮蛋口感滑溜，配上香辣嘅口水醬汁，味道非常惹味。
🥢張公子叉燒👍呢個係餐廳嘅招牌菜，份量非常多，叉燒肥瘦適中，外層淋上蜜汁，經過爐火燒製後，表面色澤晶瑩剔透，內裡鬆軟多汁，味道鹹中帶點甘甜。
🥢酸菜桂花魚片酸菜魚嘅份量適中，桂花魚片肉質嫩滑，無腥味，又唔會食到有骨，味道偏酸帶小辣，好岩我呢啲鍾意食魚但唔鍾意骨嘅人。