影片
更多
2024-11-27
78 瀏覽
唔係第一次食貴價嘅omakase，但真係第一次喺香港識到啲咁高質嘅omakase，得罪講句真係好過唔少米芝蓮餐廳。老實講真係想私藏，好驚太多人去訂唔到枱，不過冇得揞住良心寫得衰。如果你係第一次食，建議你食咗其他先，你先會明白呢一間有幾高質。師傅相當有心，每一道菜嘅介紹都好詳盡，而喺過程入邊都會同我哋分享唔同嘅有趣小知識，而且個presentation好幽默。成餐飯食咗四個幾鐘，但係完全唔覺得辛苦、唔覺得悶，你話幾得人驚。‣ 雅 みやび $1880· 先付擺盤相當精緻不在話下，銀杏嘅微苦同丹波栗子嘅甘甜形成對比，烏魚子嘅鹹香同蘿蔔嘅爽甜又係一個對比，口感豐富得嚟又和諧，烏魚子甚至帶到俾我一種芝士嘅感覺。而太刀魚就包裹住牛蒡、淮山，味道豐富，前菜嘅開胃精緻令到你對之後嘅菜式都好期待。· 季節のスープ秋天嚟講點會少得蘑菇，呢一款係名副其實屬於秋天嘅湯。燒秋刀魚同埋木之子－蘑菇完美咁樣突顯咗秋天嘅味道，秋刀魚嘅炭香同埋木之子嘅鮮甜互相襯托，湯底清澈又溫暖，果然係暖心之作。· 刺身五點－真羽太（マハタ），嚟自和歌山，亦都係我哋熟悉嘅石斑，係屬於高級嘅魚生，漁獲嘅數量都唔多。肉質相當鮮美，唔會話
‣ 雅 みやび $1880
· 先付
擺盤相當精緻不在話下，銀杏嘅微苦同丹波栗子嘅甘甜形成對比，烏魚子嘅鹹香同蘿蔔嘅爽甜又係一個對比，口感豐富得嚟又和諧，烏魚子甚至帶到俾我一種芝士嘅感覺。而太刀魚就包裹住牛蒡、淮山，味道豐富，前菜嘅開胃精緻令到你對之後嘅菜式都好期待。
· 季節のスープ
秋天嚟講點會少得蘑菇，呢一款係名副其實屬於秋天嘅湯。燒秋刀魚同埋木之子－蘑菇完美咁樣突顯咗秋天嘅味道，秋刀魚嘅炭香同埋木之子嘅鮮甜互相襯托，湯底清澈又溫暖，果然係暖心之作。
· 刺身五點
－真羽太（マハタ），嚟自和歌山，亦都係我哋熟悉嘅石斑，係屬於高級嘅魚生，漁獲嘅數量都唔多。肉質相當鮮美，唔會話好有彈性，味道相當清爽，口感好細膩，我一試就已經愛上。
－縞滲，平時叫開嘅深海池魚，嚟自熊本。有食過就知縞滲肉質肥嫩，但脂肪都好紮實，但質地其實相當柔軟，同樣口感好順滑，好舒服。
－八爪魚，提起八爪魚，餐廳嘅山葵真係不得了，辣中帶甜，相當過癮而且令人印象深刻。八爪魚就好常見，但寧寧捨捨食吸盤就比較罕見，入口相當之爽脆。將啲醬油漬嘅山葵放入去吸盤中間，少少已經辣得相當刺激，但最正係食到成個八爪魚鮮甜。
－香箱蟹，嚟自金澤，由十一月頭到十二月尾就係可以捕撈嘅時間。就咁一隻蟹完完整整拆晒出嚟食真係相當幸福，唔使自己拆，師傅推薦我哋撈埋啲蟹子一齊食，每一啖都充滿住蟹嘅香氣，搭配蟹醋嘅酸甜，令你完全感受到蟹肉嘅香。
－北寄貝，嚟自北海道苫小牧，畢竟都係人哋嘅市貝。平時我哋食得多都係熟嘅北寄貝，已經變到紅卜卜。印象中好似係第二次食呢隻顏色嘅北寄貝，但係令我印象相當深刻。師傅話有啲人會嫌佢腥，但係我一入口已經食到相當之衝擊嘅香甜，係令到你不自覺嘴角上揚嘅甜。由於我哋唔食蠔，所以師傅先準備北寄貝，但係完全唔會敷衍，相當滿意。
－三文魚子，相當之新鮮，師傅話跌咗落地下都可以彈吓彈吓，真係一啲都冇誇張。平時可能食到已經係醃製過嘅三文魚子，甚至有啲會帶腥味，呢到嘅三文魚子嘅鮮甜其他真係比唔上。而柚子味蘿蔔蓉令到三文魚子味道更加豐富，唔會太單一，呢個位都落咗唔少心思。
· 小食
食到咁上下師傅就送上炸沙甸魚，炸得金黃酥脆嘅魚片，冇話限制要幾時食，食咗第一塊就覺得好上癮，要控制自己先可能等埋其他菜式再一齊食。
· 季節のお料理二品
－全熟白子，以前食開都係白子刺身，老實講一開始我係有少少怕怕的，畢竟以前都試過食刺身嘅時候覺得太腥。但真係要相信師傅，全熟嘅白子真係啱啱好可以突顯白子本身嘅濃郁奶香，口感細膩滑溜，但昆布醬汁可以將佢嘅香變得含蓄啲，唔會太過衝擊而至於接受唔到，亦都令到個味道帶少少鹹香，唔會太單調。
－唐揚目光魚，嚟自九州嘅鹿兒島，唔好睇佢魚仔細細，但係其實營養價值都相當之高。用唐揚嘅手法可以令你上至魚頭下至魚尾成個都可以擺入口，一啲都唔浪費。而平時唔食魚頭嘅我，都食得出目光魚嘅魚頭零舍出色。
· 握り寿司-十貫
－八角魚，北海道特產，屬於冬天嘅魚。佢個樣真係三尖八角，但唔好俾佢嘅外表嚇親，嗰啲魚肉第一啖已經令到我印象相當深刻，相當之清甜美味，肉質好細嫩，一食完我已經愛上咗嘅魚。
－金目鯛，嚟自靜岡熱海，畢竟都係出名嘅產地。魚皮被熱水輕輕淥過，魚皮為金目鯛再增添唔少口感。金目鯛有幾好食相信我都唔使再講，但一擺落口就知道點解佢會俾人叫做最頂級嘅金目鯛，食得出個脂肪同埋味道有幾豐厚。本身飽飽地，但係食完就知道咩叫做開胃，咩叫做停唔到。
－關鯖魚，嚟自九州，係新鮮鯖魚。一擺落口嘅時候屬於鯖魚濃郁嘅味道就會湧埋過嚟，食到油脂嘅香，口感相當紮實，甜而不腥。
－鰤魚，嚟自北海道嘅函館。師傅都有同我哋講過天氣越嚟越熱，如果唔係大概呢個時候其實應該係食寒鰤。食落口嘅時候就知道果然係一品好魚。食到呢到雖然條條魚都覺得好鮮甜，但係口感睇到多少少都有啲分別，自己個人都幾鍾意鰤魚，口感係相對上比較出眾。
－日本青森帆立貝，為咗令佢嘅味道與眾不同，帆立貝係用昆布醃製過。比起上述魚帶比我嘅衝擊，帆立貝相對上就比較溫和，入口之後都係充滿口腔嘅甜。就好似一班狀元入邊嘅榜眼咁樣，但一樣大家都係咁出色。
－三蝦壽司，師傅話係用咗鄉土握法 ，保留咗傳統嘅風味。三隻蝦放入口嘅時候真係感受到佢哋喺入面打滾，咬落去嗰種張力同埋鮮甜令到你欲罷不能。
－秋刀魚，嚟自北海道，入面放咗芽蔥，相當之清爽解膩。而且芽蔥嘅香味又令到秋刀魚有唔同嘅風味，明顯食得出唔同嘅層次。即使湯已經有秋刀魚，但係你都會感覺到大家之間嘅分別。
－中拖羅，嚟自長崎，可以話入口即化，相當之幸福。明明去到呢到其實已經好飽，但係每一件壽司帶嚟嘅美味，令到你會好期待下一件壽司究竟會係一個點樣嘅味道。
－大拖羅，令到我相當之驚喜，我從來都冇試過就咁搭配鹽一齊食。而我相信佢啲鹽都係特別挑選過，冇諗過原來就咁搭配鹽係咁好食，如果點咗豉油就真係破壞晒成個味道。就好似用咗一個全新嘅角度再去品嚐大拖羅，真係不得了。
－醬油赤身，雖然相對上比較瘦，但係上一件咁肥，下一件瘦少少個分別就會好突出。唔好以為佢係赤身就好似會失色少少，佢嘅魚香絕對比得上其他，即使口感紮實，但係行中庸之道都可以好出色。
－海膽手卷，你望到佢啲海膽爆晒出嚟，你就知道呢一個係相當之足料嘅海膽手卷，望住師傅拎一板出嚟係咁加海膽。本來我仲諗緊即使冇海膽，我已經覺得呢一餐好完美，見到我最鍾意嘅海膽嘅時候真係忍唔住心心眼。好鍾意用呢一個濃郁嘅味道為呢一餐畫句號，令到我印象好深刻。
· 味噌汁又は
食完壽司就嚟咗一碗相當之暖心嘅味噌湯，呢個時候你絕對唔會食得落烏冬，相當溫暖，而且味道濃郁，雖然細細杯，但係飲得出全部都係精華。
· デザート
甜品方面就係南瓜布丁同富良野蜜瓜，雖然係南瓜布丁，但係個口感比較傾向似芝士蛋糕，同樣都係味道好豐厚，但係南瓜就令到佢甜得嚟帶有風味。而蜜瓜嘅清甜多汁，真係幫呢一餐畫上無可挑剔嘅休止符，代表住我下次都會再嚟。
張貼
