橋底辣蟹

營業中

休息中

係銅鑼灣想食港式海鮮小炒，呢間有三十幾年歷史嘅橋底辣蟹就不失為一個好選擇。 作為餐廳招牌嘅炒蟹就一定唔可以錯過。▪️避風塘炒蟹 餐廳招牌菜式，用上新鮮大大隻肉蟹，蟹肉鮮甜無比，爽口彈牙。而且用上大量香蔥炸蒜，蒜香濃厚，層次豐富，小小辣，勁惹味。▪️椒鹽瀨尿蝦一上檯已經好想食，成條小臂咁長，而且勁多膏，雖然好大隻，但肉質一樣勁彈勁新鮮，加上小小椒鹽一齊食，愈咬愈有鮮味。▪️蒜蓉粉絲蒸蟶子 蟶子肥美新鮮，用小小蒜蓉鼓油吊味已經好足夠。粉絲仲吸收左蟶子嘅鮮味，回味無窮。▪️豉汁炒蜆 蜆好鮮，冇沙，豉汁嘅香味同蜆嘅鮮味好夾，每一粒都好入味▪️蒜蓉炒菜心簡簡單單嘅炒菜，火候掌握得好好，咬落爽脆。▪️乾炒牛河 一碟好嘅炒河，鑊氣好重要，而且一啲都唔油，牛肉嫩滑，香氣十足。