三才魚蛋粉麵

營業中

休息中

星期二，七點鐘喺銅鑼灣做完Facial，向着渣甸坊周圍行諗緊食咩嘅時候，就見到呢間三才魚蛋粉麵店，諗起好耐冇食魚蛋粉一於入去食啦。雖然舖頭細細，但係好整潔好光猛，一啲都唔似舊式嘅粉麵店咁污糟，而且門口有部探熱器，食客就可以自助探熱啦，好方便。因為太耐冇食粉麵，搞到樣樣都想食。最後揀咗水餃拼牛腩米，炸魚皮，凍奶茶少甜少冰。所有食物到齊先感覺到事態嚴重，因為每樣食物嘅份量都好多，我驚自己食唔晒，水餃大大隻，好足料，一咬落去仲食到好大粒又爽脆既蝦仁。牛腩份量又係好多，每件牛腩都炆得好軟淋淋，又夠入味，唔錯唔錯。炸魚皮仲大大塊添。又新鮮，乾身同脆卜卜，唔會油淋淋同唔會有一大陣油益味，調味又啱啱好，浸湯食或者就咁食都得！至於個奶茶方面都有茶餐廳嘅水準，即使少甜都唔會好甜啱晒我口味，又夠大杯！總括來講，如果你嚟銅鑼灣，想食魚蛋粉，呢間真係值得推介，性價比高。我相信連男士都好夠食呀。