魚你相聚

營業中

休息中

經過長沙灣，見到呢間食酸菜魚嘅餐廳，於是就試下。除咗酸菜魚，呢度仲有好多主打正宗四川風味嘅菜式，有辣有唔辣，所以都適合唔食得辣嘅朋友，而價錢亦都好親民。我同朋友點咗兩個小食，同一個2-4人份嘅酸菜魚，非常豐富，每人200蚊都唔駛，超級抵！⭐涼拌海蜇呢碟唔辣，幾香麻油味，海蜇幾爽口，份量比想像中多。⭐麻辣牛展呢個牛展醃得幾惹味同幾淋，辣度算幾舒服，而啲花生幾脆幾香口。⭐大盤酸菜魚（鱸魚）叫咗呢個2-4人份嘅酸菜魚，揀咗老壇酸菜湯，啲酸菜多到好似唔駛錢咁，好澎湃，而魚就揀咗鱸魚，因為比較鮮甜。湯底有魚嘅甜味，亦充滿濃郁嘅酸味。呢盤酸菜魚份量真係大，入面嘅配菜比出面食開嘅多好多，有闊薯粉、薯仔、萵筍、豆腐、豆腐皮、大豆芽、娃娃菜、金針菇，仲要額外跟2份手工薯粉/米線/白飯，兩個人根本冇乜可能食得哂，4個人share應該都冇問題。⭐利賓納梳打⭐凍檸樂如果一大班人想食平民價錢嘅酸菜魚，呢度係個唔錯嘅選擇，而小西灣亦都有分店。