海雲台 (已結業)

去咗長洲咁多年，乜嘢長洲特色野同埋餐廳都去過、食過晒喇！咁啱嗰日天氣又熱，就諗住搵間有冷氣嘅餐廳入去食飯，行吓行吓經過呢間海雲台，見佢餐牌上面啲嘢食又幾吸引，就諗住行入去試吓，一行到入去，見到餐廳牆身有幾塊紙牌，寫住一啲為香港加油嘅說話， 估唔到咁岩行入去又會撞到一間黃店喎！😆坐低之後我同朋友嗌左一個石鍋飯同埋炸紫菜粉絲卷個石鍋飯都好足料，配料都係最常見嗰幾種，菠菜、泡菜、 芽菜、冬菇、紅蘿蔔同埋一啲肉類，再加一隻生蛋黃，加上佢哋嘅辣醬，撈埋一齊食，非常惹味！再配上一碟小配菜，泡菜芽菜同埋一啲酸醃蘿蔔，蘿蔔酸酸甜甜，好開胃。不過美中不足嘅地方就係佢個石鍋飯冇飯焦。另外我哋仲嗌左炸紫菜粉絲卷，配上佢哋嘅醬，簡直係絕配，值得一讚嘅係，佢哋嘅炸物唔油膩☺️嗰度嘅環境唔算大，但係都夠坐，同埋咁啱我去嘅時間唔多人，都算坐得舒服不過如果你問我下次再去長洲會唔會嚟返呢間餐廳食飯嘅話，我就唔會啦～畢竟長洲仲有其他不同嘅餐廳嗎！😆