翠林辣蟹舫

趁而家限聚令仲可以食晚市，梗係趁收工同朋友喺尖沙咀周圍搵吓有咩好食啦。醒起以前食lunch喺亞士厘圖見到有唔少餐廳，今次就決定過去。亞士厘道個位其實有少少難搵，需要喺海防道穿過寶豐大廈個大堂。餐廳位於二樓，座位之間都好闊落。侍應姐姐好熱情咁介紹我哋今期特價之選，餐廳而家唔同嘅菜式分別做緊五折同埋八折，海鮮都有呢個折頭真係好抵！今次我哋食咗3道餸，首先係瑤柱龍蝦。第一次是用瑤柱同埋香辣肉碎等嘅配料去炒龍蝦肉，非常新鮮同埋惹味，而且肉質好鮮嫩。再加上做緊五折抵呀！跟住就係避風塘豬手雖然價錢平但係份量好十足，平時食避風塘最鍾意就係佢啲炸蒜而佢哋都整得好香辣。唔似得平時喺出邊食，佢哋仲有精心擺盤。最後一道就係金銀蒜蒸茄子食咁多肉梗係要食返少少蔬菜啦，我哋揀咗食茄子。餐廳好用心咁整走晒茄子嘅紫色皮，驚影響口感。呢味餸不得了送飯一流，如果我仲食得落嘅話一定會加一碗白飯，實在太香口！最後兩個人埋單$598，包埋菜芥。今餐飽到連豬手都食唔晒。對於海鮮餐來講我覺得價錢差唔多啦，雖然佢有做好多優惠但係絕對冇Hea你嘅感覺。下次再嚟嘅話我要試吓佢嘅蟹。