Jumbo Cafe (已結業)

放工同事相約食下午茶， 見佢買咗新車，一於入大西北搵好食。一人一個 下午茶餐。先嚟蕃茄忌廉湯 ，蕃茄味好濃， 但係完全冇渣，又唔似用茄膏開出黎，個味道好奇妙。 最得人鍾意仲有個餐包食。我地叫左炭燒澳洲安格斯西冷扒， 最得人鍾意五成熟， 真係啱啱好 肉質鮮嫩 完全唔覺得鞋口。 估唔到仲有配菜 就係沙律薯條。再黎頂級安格斯牛肉芝士漢堡， 一個唔小心 唔記得咗叫走醬， 一向都好怕食醬嘅我， 又一大考驗， 估唔到嚟到個樣幾好食，安格斯牛肉夠曬厚身，個人認為大份過足三兩。 同樣都有配菜 ，一樣都係沙律薯條，完全唔會大細超。小食叫左水牛城雞翼， 勝在夠新鮮，大大隻， 熱辣辣咁拎出嚟， 真係冇得頂。飲品方面叫左橙汁同蘋果汁， 久違嘅果汁先生味道。