頭啖湯

營業中

休息中

今日試一下係天后同炮台山交界嘅打邊爐 - 「頭啖湯」。鋪位唔算大 但有湯底有d 特色 。素菜佢有百菌煲 ，辣有重慶麻辣雞 ，仲有麵包蟹蕃茄煲，而我地最後就叫左滋潤椰子雞煲 （半隻）。 火鍋料我地就叫左牛肩胛（半分）、白魚蛋同芝士、墨魚滑 、炸魚皮、冬瓜同油墨菜 。等左一陣 ，好快就上左個椰子雞煲 。開一開個煲蓋睇 見到都好足料。湯底係奶白色，有紀子 、金針花、雲耳、仲有d 菇 同好多件雞係入面。 滾左一陣 ，拿拿林拎個碗去飲少少椰子雞湯先 。 一飲果然係靚湯 ，味道好濃 仲有好香椰味 。其它火鍋料好快陸陸續續送到。速度都幾快。牛肩胛塊塊大小均一 ，刀功幾好 。 牛肩胛因為唔係脂肪多嘅部份 ，但係就肉味濃。但滾起上黎都考功夫。太快就唔熟 ，耐少少都易老。所以最好要睇住一塊一塊咁滾，放落去唔理你實後悔。丸方面我地覺得個魚蛋係有驚喜。好彈牙下 。芝士丸就一般。炸魚皮就正， 佢係大塊完整嘅，唔係d 又細又碎嗰d 。滾一兩下，吸少少湯 。真係一流。仲有墨魚滑，好夾個湯底。墨魚滑吸晒椰子雞湯嘅香味 ，變得更加好味。冬瓜其實佢都同墨魚滑有異曲同功之妙 。吸晒d 湯味 。