鮮入圍煮 (已搬遷) 新店位置

之前睇過一篇報導係介紹旺角有間火鍋店，裝橫有啲似街市，而且用料新鮮，一search原來呢間火鍋店叫「鮮入為煮」⋯店員安排座位後，就主動攞熱水過嚟俾我哋洗吓啲碗筷，出面啲火鍋店真係好少做到呢點，讚👍🏻呢度湯底選擇都頗多，但火鍋配料就唔算好多⋯正所謂貴精不貴多，而且亦有平時比較少見嘅款式，想試新嘢嘅朋友真係不容錯過！濃厚原隻雞煲花膠湯一見到佢真係心心眼，簡直係女士恩物⋯上枱後，等個湯滾起就可以先飲湯。啖湯濃濃嘅雞味，膠質豐富，飲完個口立即黐立立，感覺即時補充骨膠原，皮膚充滿彈性🤪飲湯嘅時候仲可以食埋雞同埋花膠添！新鮮豬肉眼根唔好睇佢個樣不太討好，原來咁好食，有驚喜！口感有啲似豬頸肉，但無豬頸肉咁腍，爽脆爽脆的，都幾特別。原粒帶子水餃呢個都係驚喜之作，隻隻都脹卜卜，皮薄餡多，除咗豬肉之外，每隻入面都有1-2粒帶子，鮮味可口，推介！道地冬瓜茶平時冇見過呢隻冬瓜茶，叫咗一罐嚟試吓，唔錯喎！好有喺台灣飲嘅冬瓜茶味道，而且感覺比飲汽水健康，大家可以試吓。總括而言，食物新鮮，服務稱心，推介！