影片
更多
2013-11-15
1919 瀏覽
差唔多廿年前，小弟有幸曾踏足土耳其，首都伊斯坦堡只屬路過，真正目的地喺卡柏多奇（奇石區Cappadocia）同帕慕卡雷（棉花堡Pamukkale）。仲記得當地嘅天然奇景，煞是有趣。不過，孭住背囊遊歷，樣樣都要慳，交通、住宿喺必需，慳唔得幾多，只有晌食方面著手，慳得一蚊得一蚊，所以對土耳其菜印象非常模糊 。今晚，再次掹住馬田兄車邊，同幾位食友嚟到「安塔利亞」（Antalya，土耳其西南部，靠著地中海岸嘅一個省府），首嚐土國菜，認認真真咁了解一下佢嘅味道 ！安塔利亞隱身晌旺角一幢商廈，樓下西洋菜街熙來攘往、喧鬧嘈雜，但上到嚟則猶如私人竇口，只因全店都喺得十來個位，以私房菜形式經營，有得一大班老友上嚟搞慶生局，已足夠包場玩得盡興。而室內環境裝修簡單，幾張梳化椅，矮櫈，陳設家常 ，周圍掛點富特色嘅彩布，貼滿客人嘅即影即有照片，播著輕悠音樂，其實甚有住家感覺 。雖然廚房處於店尾，只有十數呎之大，估唔到嫁咗俾土耳其人嘅店主Grace可以晌咁有限空間做到咁多款工序繁複嘅傳統土耳其菜式，包括沙律、特色主菜、甜品、飲品，仲有唔少外間少見嘅古法菜。順帶一提，雖然服務唔多，但有店主熱情招呼，所以都收
今晚，再次掹住馬田兄車邊，同幾位食友嚟到「安塔利亞」（Antalya，土耳其西南部，靠著地中海岸嘅一個省府），首嚐土國菜，認認真真咁了解一下佢嘅味道 ！
安塔利亞隱身晌旺角一幢商廈，樓下西洋菜街熙來攘往、喧鬧嘈雜，但上到嚟則猶如私人竇口，只因全店都喺得十來個位，以私房菜形式經營，有得一大班老友上嚟搞慶生局，已足夠包場玩得盡興。而室內環境裝修簡單，幾張梳化椅，矮櫈，陳設家常 ，周圍掛點富特色嘅彩布，貼滿客人嘅即影即有照片，播著輕悠音樂，其實甚有住家感覺 。
雖然廚房處於店尾，只有十數呎之大，估唔到嫁咗俾土耳其人嘅店主Grace可以晌咁有限空間做到咁多款工序繁複嘅傳統土耳其菜式，包括沙律、特色主菜、甜品、飲品，仲有唔少外間少見嘅古法菜。順帶一提，雖然服務唔多，但有店主熱情招呼，所以都收加一服務費，自攜酒水收$50，切餅費都收番$50，只設晚巿，必須一日前預訂，每位最低消費要$158起，而包場嘅最低消費為$250起，記得只收現金 。
話時話，土耳人菜喺點呢？原來土國人愛食麵包、乳酪、烤肉，無醬不歡，又好香料嘅重口味。雖然，無食到為人熟悉嘅卡巴（Kebab，即喺打棟一大條肉轉呀轉，烘呀烘，有柯打就切成一片片夾包嚟食），不過，都試咗好幾款特色菜。
土耳其沙律簡單以橄欖油同檸檬汁，拌勻青瓜、蕃茄、洋蔥、沙律菜，糝少少土耳其香料，入口鮮爽清新，猶如中菜嘅餐前小食「酸青瓜，醃蘿蔔」，開開胃迎接以下各道大菜。
自家土耳其乳酪芝士炸物拼盤 $185（限量供應） 圖中嗰碟只喺店主Grace俾我哋試食嘅份量，正式喺一客8件，因為喺自家製，只好限量供應，當晚有一枱大客，所以都儘管多做兩件試試俾啲意見。外皮唔喺來貨嘅春卷皮，喺自家搓製嘅麵粉皮，內裡包住乳酪芝士及下咗少少芫荽，外脆甘香，內軟微鹹，幾得意 ！
梅爾辛紅飯釀烤嫩雞全隻 $236（需預訂） 依個烤雞可謂Grace嘅手本菜，因為喺佢老公嘅家鄉餸，原隻鮮雞用10多種香料醃個多小時，之後再將已混入菜粒炒好嘅飯，釀入雞內一齊焗，雞肉醃得夠自然嫩滑入味，陣陣香料芳香，而飯粒因吸收咗雞汁，變得非常香口，軟腍度又啱啱好 。佐雞仲有一小兜微酸嘅酸乳酪醬，襯埋雞件一齊食，有助突出香料味，又減低少少油膩感。由於雞隻頗大份量，最好有4-6個人先好叫依道菜！
自家製土耳其牛肉 / 羊肉餃子 $185（限量供應） 另一限量供應菜式，因為下下自家製人手包，真喺幾費時，所以Grace只好限量供應。據講，喺土耳其，餃子通常放湯煮，但佢就改用煎炸方式處理，餃子有牛肉或羊肉供選擇。最可惜掛住食，影漏相，牛肉餃子細細粒、的的骰骰，淋上蕃茄醬、乳酪醬，晌稍熱氣嘅炸餃子中，添幾分清爽，質感脆得嚟有點咬口，餡肉豐富 。
土耳其式手製烤羊肉球羊肉腸拼盤 $396（需預訂）
依個「羊肉」拼盤有5個羊肉球、3串羊肉腸，認真大份，可加配土耳其烤餅（兩件 / $58）。羊肉全人手打造，所以唔會搓得太死實，不過，稍嫌有啲乾身，唔知喺咪烤過籠。然而，羊肉味好強，燒出嚟挺香，唔太羶，帶少少辣 。如果怕怕哋羶，可以試吓用土耳其烤餅，加埋伴碟嘅青瓜、蕃茄、洋蔥，點少少乳酪醬，包埋一齊食，效果好唔錯 。
土耳其青口釀香草飯配蕃茄海鮮汁 $236（需預訂） 據介紹青口釀香草飯喺土耳其一啲街頭小食，搵蕃茄湯煮熟青口再釀入香草飯就完成，依家作為主菜版，當然要升級少少。香草飯混入茄子肉，增加咬口，飯粒更有味，然後放上青口度，加入蕃茄海鮮汁再焗，食前擳啲檸檬汁，青口肉甜，香草飯嗦滿蕃茄香，果真風味獨特喎 。
玫瑰米飯布甸 $58甜品方面，店家有唔少自家製雪糕，亦有土耳其軟糖，餐牌有個土耳其米飯布甸，賣$48，依個升級版本，加咗玫瑰香，賣$58，玫瑰味濃郁突出，一食就食到，口感跟西米布甸幾近似，但較明顯食到一粒粒飯粒嘅感覺，黏黏糯糯帶奶香 。不過，好多人都知土耳其人極之嗜甜，所以，依個米飯布甸都秉承傳統，一樣甜到漏，但未必個個人都接受到。
咪以為佢只喺一間賣土耳其嘅私房餐廳，原來仲有唔少獨有嘅土耳其軟糖、果仁、烏結糖賣，兼且不定期搞團遊土耳其，可謂成個土耳其文化交流合作社啦 ！
張貼
