鐵板世家

營業中

休息中

最近我去咗旺角嘅「鐵板世家」，真係食到好滿足，無論係食物質素、環境氣氛都非常好，難怪當晚平日都全場滿客！湯方面，一坐低未嗌嘢食店員已經問飲咩湯🤣。我地「白湯-忌廉湯」同「紅湯-羅宋湯」各叫咗1份。白湯滑滑地，奶香味濃郁。羅宋湯則酸酸甜甜，味道清新，唔會太濃重，好開胃！首先講講「鐵板肉眼牛扒」，我叫咗五成熟。牛扒外層煎得香脆，裡面保持住肉質嘅鮮嫩，咬落去Juicy到爆，肉味十足，真係好開心。鐵板係超熱，"喳喳"聲響咗好耐都唔停。佢哋用嘅黑椒醬汁亦非常好味，搭配牛扒一齊食，簡直係無得輸！每一口都充滿滿足感，真係一個牛扒愛好者唔可以錯過嘅選擇。薯條份量亦好多，男仔都夠食。朋友試咗「鐵板珍寶什扒」，呢個拼盤集齊咗唔同嘅肉類，包括豬肉、雞肉同牛肉，口感多樣化。每樣肉類都煮得剛剛好！仲有腸仔，煙肉，薯條，份量十足，種類好多，呢個拼盤非常適合想試唔同口味嘅朋友。飲品方面，我選擇咗凍檸檬水同凍檸檬茶，正常發揮，唔錯！環境方面，鐵板世家嘅裝潢簡約而時尚，坐落在旺角這個繁忙地段卻又有一種輕鬆的感覺，"喳喳"鐵板聲配合店內嘅懷舊裝修，別有一番香港獨有的味道。