明閣 (鷹君中心)

明閣同事請食飯，去咗灣仔鷹君中心明閣，裝潢高雅別緻，灯光柔和舒服，座位間隔闊落，環境安靜唔嘈吵，飲茶閒聊商務見客皆宜。 酥炸釀鮮蟹蓋：一上檯，外形煞食，用蟹形碟上菜，原隻蟹蓋脹卜卜，外皮酥脆香口，入面柔滑軟嫩，勁多鮮甜蟹肉絲，食落啖啖肉，熱辣辣好好食。唔怪之得同事推薦食。極品蜜汁叉燒：厚切叉燒色澤晶瑩透亮，菊花伴碟，高級精緻，表面烤至少少焦香，非常誘人。肥瘦適中，咬落表面少許焦脆，肉質軟腍多汁，肥而不膩，加上香甜蜜汁，食落好銷魂。窩燒海味脆米飯：軟彈米飯晶瑩透亮，加上鮮甜蝦仁、彈牙魚蛋粒、爽口菜粒、葱粒、炒蛋碎、香口脆米，口感豐富，非常好滋味。椰香燕窩牛乳奶凍：口感幼滑Q彈，清甜椰香味，香濃奶味，搭配燕窩高級又養顏。還點咗蝦餃、燒賣、叉燒包、生煎包、XO醬炒腸粉、上湯浸菜苗都好食，但以上4款食物非常推薦。明閣 (鷹君中心) (灣仔)灣仔港灣道23號鷹君中心2樓