高知駅

營業中

休息中

朋友話有同事推介佢，中環嘉咸街有間居酒屋唔錯，咁就約我一齊去食。餐廳地方唔大，但服務員好nice，老板係日本人，會細心為客人推介食物。雖然餐廳有多款日本酒，但可惜我同朋友都係唔飲酒之人！老板首先推介我哋食鮟康魚肝奈良漬同鰹魚他他，將魚肝同鰹魚他他搽上青瓜上食，味道非常特出，鮮味提升，如用來佐酒就好夾。鐵板芝士炒蛋，服務員在客人面前將蛋倒落煎pan再落鰹魚汁，加上芝士同葱，令到蛋食起上來有拉絲的口感，真的唔錯。螢光魷魚串，用好細細隻的魷魚仔串燒成，係我第一次食咁細隻，肉質juicy幾好味！鰹魚半烤燒，廚師在店內用草薰燒鰹魚，令到本身鮮甜味十足的鰹魚增加了煙薰味，係餐廳主打菜之一。最後係北海道海膽意大利扁麵，不單海膽好味，仲有每條麵都掛住濃濃的海膽味，估唔到係香港都可以食到好有日本 feel 的食物。整體食物質數高，結賬大約六百多元！非常抵食，朋友真係冇介紹錯！