隨心 (已搬遷) 新店位置

住喺東區最正嘅就係搵好野食一d都唔難，高質素小店非常集中，我同老公經常去筲箕灣東大街、鰂魚涌海光街、濱海街等地方覓食，總會遇到驚喜！隨心，我地都幫襯過好幾次，次次食都有驚喜味道！次次黎到必食無骨海南雞飯，基本上個個食客黎呢度都必點，連埋杯鮮味雞湯，雞湯唔會好油，飲落好舒服。最正一定係雞肉，起哂骨，啖啖肉之餘，仲皮爽肉嫩。我平時係唔會食雞皮，一黎怕街食到d雞拔唔乾淨雞毛，二來怕油膩口感，呢度嘅海南雞係會好食到令我放心食埋雞皮，仲食得好過癮😂雞油飯夠香，連伴菜嘅涼拌雲耳絲都好爽脆，好好食。另一個亮點係呢個亞參鳳梨咕嚕肉，賣相已經好吸引，咕嚕肉份量唔少，食極都仲有。味道似加左咖喱嘅咕嚕肉，比起平時食嘅中式咕嚕肉當然更惹味，非常適合拌飯。加埋菠蘿酸酸甜甜，仲好開胃添！我地上次食過麥皮蝦，非常喜歡，今次想試下其他煮法嘅蝦，老公又怕辣，侍應就推介我地試白胡椒虎蝦，果然不錯！香而不辣，蝦又大隻，肉又紮實爽口，老公非常滿意。百味啫啫芥蘭煲，炒得好香，菜都好靚好嫩，無渣。仲試左杯生薑茶，好夠薑，微辣，飲完喉嚨好舒服。侍應都好nice，見我地食蝦食到成碟都係蝦殼仲主動幫我地換碟，小店就係有種溫暖！