港灣火鍋海鮮酒家

營業中

休息中

澳門連續遇到兩個颱風，八號風球第二日，出發去澳門沙梨頭見客。有時間，想歎返一盅兩件。不過好多食店經歷風災水淹，都在整理緊未復業。呢間酒樓開在一樓，樓下大堂接待處整修緊，可由太平梯出入。個餐牌似乎都幾多嘢食，可以搵一晚再來試下。上到去時，都差不多收午市，於是快快手整個湯，再加碟腸粉同點心。黃燜碗仔翅，居然有些少翅裙，而且有雞紥魚肚絲同花膠仔，有咬口，湯的味道有金湯感覺，$38一位有點喜出望外。牛腸賣相普通不過都算多料，腸粉拉得略厚身不過都滑，可能仲好，因為飽肚，而且包到多啲饀而唔易斷開。個雞紥唔係用香港傳統的雞紥魚肚，而用鮮淮山棒同蟹棒，所以名為鐵棍淮山鮮雞紥？腐皮內的食材，包括淮山棒、冬菇片、蟹棒同雞件。用蟹棒似乎cheap 咗啲，雞件亦明顯唔夠鮮，不過風災後亦無要求了。簡簡單單在風雨中，享受平靜一刻。