凝香居

Open Now

Now Closed

今日約咗個老友去屯門景峰飲夜茶，以往嚟呢邊都係食吓米線或者日本嘢居多，飲夜茶真係第一次試。坐低睇一睇餐牌，當然唔會期待好似連鎖酒樓咁多選擇，但係估唔到都幾多花款喎。鮑魚燒賣，三大粒燒賣，鮑魚味道不過不失，最緊要唔會話太韌，燒賣本身都有一貫茶樓水準。山竹牛肉球一直係我飲茶最愛嘅點心之一。呢到牛肉肉質新鮮，口感夠滑，唔會話太實太死，加埋佢一貫嘅最佳拍檔喼汁，冇得頂！蒜泥白肉，估唔到喺呢到有得食呢味嘢喎，作為蒜泥白肉嘅愛好者，當然要叫嚟試一試。份量都唔少架，越食越滋味，搞到我食到一半先記得影相。香芋千絲酥，我都唔知幾耐冇食過呢碟小食，芋頭嘅香味好出，出面亦夠脆，可以話整得相當有水準！椰汁馬豆糕，經典中式糕點之一，好似越來越少地方食到呢個甜品喇，真係買少見少，椰汁味道好濃，夠晒吸引！餐廳裝修刻意用上木製餐牌，夠傳統、有特色，而家真係唔多見有鋪頭會咁樣裝修喇。

呢間一直都想試但係睇食評話佢上菜好慢，驚驚地但係點都試一次令自己死心。今次試咗兩個點心，上得好快完全唔慢。因為睇啲評語我已經預咗，如果太耐都唔嚟我就寧願俾錢唔食都要走😅菜苗餃好好味，完全唔油同埋蝦嘅比例都幾多。當時想叫多籠但係費事再等，一食呢一籠野就知絕對會再嚟食其他嘅。至於鮑魚燒賣我自己覺得唔係咁好食，我鍾意啲質感比較實身既，屯門黎講就類似名點屋個種。同埋食咗呢兩樣點心覺得呢間係同名點屋差唔多嘅質素。唔係連鎖酒樓嗰種既普通，係可以賣每個點心20尾30幾蚊左右嗰啲但係服務一般，店員定老細講嘢有啲掘。「坐呀、講呀」無尾音無表情，並唔係冇禮貌，但係你會覺得自己會唔會阻住佢咁，驚驚地😅菜苗餃五點上，鮑魚燒賣五點零五分上

最近發現屯門原來都好多好嘢食平時返工一至五都冇得飲茶今日同朋友戚起條筋食下點心咪見呢間細細嘅餐廳 內面提供款式非常之多 蒸飯蒸點心油炸類甜品燉湯 估唔到連啤酒都有 我哋食咗唔少食物 特別最欣賞嘅就係以下呢幾款*炸兩及蝦腸我哋原本只係點咗一個炸兩 佢嘅皮非常之滑 同埋入面嘅炸兩係非常之脆口 啲腸粉係滑到筷子都夾唔實所以我哋最後都加咗碟蝦腸 材料十足每一嚿腸粉入面都有蝦另外不得不提嘅係佢嘅燉湯雖然你可能會覺得價錢好貴 可以抵到兩三款點心 但係其實本身燉湯就係呢個價錢 而且少飲湯就絕對要揀個材料係非常之充足 淡淡嘅精華我哋本身都試咗一個平價少少嘅桂圓蜜瓜花膠燉雞湯 非常之甜 亦有雞味 兩個人意猶未盡 之後店員推介下試埋蟲草乾貝燉雞鮑魚湯 兩種唔同享受 前者清甜嘅雞湯精華 後者就係非常濃郁仲有蒜蓉蝦春捲亦都係非常之吸引唔好以為佢係出面酒樓嗰啲炸春捲預先炸好 入面無咩材料 佢呢隻係蒜蓉味非常十足而且即叫即炸嗰種蒜蓉味作為蒜蓉愛好者真係停唔到其他點心我哋叫咗例如蝦餃菜苗餃 都係水準之作 即叫即蒸 皮薄餡料夠新鮮甜品方面燉奶係我地極大力推介 因為用個椰殼裝住 好有椰子味 燉奶又夠滑溜 超正而且佢每

難食到痴線 ,見最近有甘多cm話好食,就去試下,一試個菜苗餃咸到個鮑魚燒賣係皇牌wo,OK7仔D燒賣仲好食過佢,個排骨 飯d飯生架,等又等得耐,全場等2枱客,等45分鐘先有點心到,,好食就無所謂姐,唔掛之得晚飯時間都靜場,好後悔無影相 ,頭先拉落D睇,先知有甘多(好評),以為用幾個好評洗下版,博D人就唔會拉落低睇,我就係其中一個,食左咪嗱野囉,嬲到我要即刻開個會員上黎申,大家經過記得要去試下,史上最難食點心

平時都好少去屯門，今日去咗黃金海岸行吓玩吓，玩完就去咗附近食晚飯，原來都有好嘢食，因為突然想食點心，所以揀咗呢一間茶居食晚餐餐廳裝修古色古香，好有懷舊色彩，店面不算好大，不過座位都算可以。點心紙有各式各樣既點心，選擇好多，鍾意飲茶既人都應該好滿意😎鮑魚燒賣唔係好多地方有得食鮑魚燒賣，呢一間餐廳竟然有得點，緊係點返個試下啦。鮑魚同燒賣出奇地夾，鮑魚彈牙，燒賣啖啖肉，口感豐富，好食😋咖哩魷魚以前好多酒樓都有呢個點心，不過近年越嚟越少酒樓有得點，咖哩味香濃，魷魚彈牙爽口，而且魷魚都好入味，味道好夠，正呀喂蟲草花乾貝土雞燉鮑魚湯燉湯足料，又冇味精，而且價錢好抵，一個燉湯都係三、四十蚊，超抵估唔到屯門有一間咁好食既茶居，下次一定會再幫襯！

難得餐廳全日都有售點心，仲要即叫即煮，茶葉都有5款左右可以揀。最吸睛係，好多古式牌整齊地掛係牆上，寫住供應既點心小食。一入座侍應就會問要咩茶，再俾餐具及熱水洗碗碟。叫左鮑魚燒賣皇($32)，凝香蝦餃皇($28)，山竹牛肉球($20)，豉汁蒸鳳爪($20)，原隻鮮蝦腸($28)。鮑魚燒賣皇一籠有3隻，係少見既點心。鮑魚煮得夠‘冧’，而燒賣肉質結實，仲混有蝦添。蝦餃皇既蝦肉結實大粒彈牙，而且外皮晶瑩剔透，皮薄帶dd煙韌。牛肉球一籠有3大粒，每粒都混有好爽口馬蹄粒等食材，腐竹軟且吸汁，加入唿汁更加好味道。鳳爪滷得夠入味，而且每件都幾肥美，啃骨配茶一流。仲有大大粒花生，惹味。第一次見餐廳有心思將每隻蝦包入每件腸粉，令每件腸粉都有原隻蝦。腸粉即叫即蒸，腸粉皮帶少少煙韌口感，而鮮蝦鮮甜，加入豉油就更加有鮮味。菊花茶明目清熱，夏天飲一流。而且沖左幾次，菊花味依然香濃。整體，用心製作每籠點心，而且用料足，熱辣辣出爐。除左有蒸點心，仲有炸物、包點、飯類等，想中午晚幾時食點心都得。

成日都好想飲夜茶，終於發現到紅橋有一間！約咗男朋友星期二收工後齊齊嘆夜茶🤙🏻我哋嚟到大約七點半，已經有幾枱客，舖頭空間不大，如果想試都要預早少少嚟。一坐低男朋友就嗌餓，即刻嗌咗幾樣嘢🤣值得一讚嘅係，呢到上菜速度極，而且全部嘢食熱辣辣🥰🥰好耐冇食過熱辣辣、脆卜卜嘅蛋散🥳大部分酒樓都係擺咗好耐，又凍又淋😵蒜泥白肉都唔差，同譚仔三哥比，別有一番風味😄葱花牛肉腸🐮薑葱牛柏葉，好大份而且都幾入味蝦餃又係好surprise到我！本身唔係好中意食蝦餃，因為通常嗰皮都好厚😵，但呢到嘅蝦餃嗰皮做得好簿，男朋友都話好食👍🏻👍🏻👍🏻燒賣和牛肉球都唔錯鮮蝦腐皮卷又係好鬼死脆😭💕最後飲埋個燉湯，又足料好夠味，好滿足🤰🏻下次帶屋企人嚟試下先！

今日同朋友甘岩出開屯門，甘耐都未有機會去飲茶，所以心血來潮地去左搵可以飲茶既地方。黎到紅橋下面既凝香居，見到門口啲裝修好有味道，雖然面積唔大，但入面都坐得舒服。由於太餓同太耐無食，所以我地都點左幾多野。首先點左椰汁糕，大熱天時真係要食返啲冰凍凍既野下一下火。鮮蝦餃同菜苗餃，2款餃入面既蝦都好大舊。招牌黑金流沙包，外型做得好靚，食落入面蛋黃流漿甘出黎，好好味。另外鮑魚燒賣都好推介大家，鮑魚唔會煮到太un,咬落爽口。鮮蝦腸皮薄，入面蝦數量都唔少。豉汁蒸排骨同酸菜胡椒豬肚湯。

忙碌左成日，我帶住100分肚餓既肚同友人黎到井財街紅橋呢度，就比一間掛住漢字牌坊既點心店「凝香居」吸引左餐廳內牆壁上掛滿一列列木製餐牌，好似置身於古代茶樓一樣調味料容器方面用白色瓷器為主，壺型設計相當有傳統風味事不宜遲，我地馬上點菜！咁多款點心，我地睇到花多眼亂因為實在太多款想食！款式分類得好清楚，抵讚！等我先介紹5款小妹最愛點心比大家懷舊鬆化蛋散 如其名，蛋散果然好鬆化，芝麻味出椰香炸饅頭炸得岩岩好！唔會太硬香芋千絲酥外脆內暖，內層芋泥炸到透明色，好香呀猴頭菇螺頭燉烏雞湯呢個燉湯我會比滿分💯湯料放滿左成盅湯入面，啖啖精華，唔係味精湯椰汁馬豆糕小妹飲茶必叫甜品馬豆浸得夠軟身，椰奶糕唔會太甜，入口涼浸浸，夏日必食！除左以上小妹最愛既必叫點心，我地仲叫左鮑魚燒賣皇、北菇棉花雞、豉汁蒸鳳爪、灌湯小籠包，各有特色全部都好好味呀我同友人由10分肚餓到10分滿足凝香居可以講係屯門飲茶首選，一定會再去呀

今晚嚟到屯門呢邊食飯， 我哋選擇咗凝香居呢間小酒樓食晚飯！餐牌各種點心， 清晰分類 ，我同朋友兩個人一共嗌咗六碟！率先登場嘅係鮑魚燒賣皇 ，三隻大大鮑魚燒賣啱啱新鮮出爐，蒸氣騰騰 ，影相嘅時候多咗一層霧氣， 燒賣味道適中，大大啖鮑魚好滿足！鮮蝦菜苗餃， 真係覺得呢個鮮蝦菜苗餃好好味 ，晶瑩剔透嘅皮包住菜苗同鮮蝦 ，賣相望落去好吸引 ！呢種皮好薄， 口感軟綿綿，配上鮮蝦同菜苗滋味到爆炸， 名正言順嘅皮薄餡靚，值得推薦！豉汁蒸鳳爪 ，呢個味道都適中， 冇市面上買嗰啲咁鹹。原隻鮮蝦腸 ，我真係超級鍾意食呢個鮮蝦腸，質素同酒樓冇分別。 一上菜 ，透明嘅皮就透出鮮艷嘅蝦嘅顏色， 我一向係好鍾意食腸粉嘅人 ，呢碟腸粉超出我嘅期望 ，腸粉柔軟而有彈性配埋鮮蝦， 一啖一嚿 ，勁滋味，我好鍾意食呀！桂圓蜜瓜花膠燉雞湯 一聽呢個名，就知道呢個湯好滋補，好養顏 ，好養生， 應該好多女仔都唔會抗拒飲呢個湯， 味道鮮甜， 又足料，蜜瓜，桂園，雞同花膠無一缺少！椰盅燕窩雙皮奶（熱）最後來都個甜品， 甜甜地， 香香地，炎炎夏日 ，可以品嘗咁滑溜嘅甜品 ，真係人生一大樂事呀！整體嚟講我覺得非常唔錯， 樣樣嘢都好好味，

前幾日同朋友經過呢間餐廳，發現佢係開通宵嘅，所以啱晒我哋就決定試一試啦，結果果然冇令我哋失望，呢度嘅嘢食都好唔錯，最重要嘅係佢開通宵啱晒我哋呢啲夜鬼啦！！！！！呢度嘅茶亦都好濃郁，啱晒我哋呢啲茶精，飲完即刻超精神，同埋相信喺呢度嘅點心都係即叫即蒸，上菜時完全熱辣辣！！！！！而且呢度啲嘢食份量一啲都唔細，所以我哋都超級滿意，所以我哋都超級滿意應該都會再返嚟幫襯嘅！！！！！！！我哋最滿意就係佢嘅燉湯，感覺真材實料完全係家的感覺！！

今日有遠征入咗屯門返工 收工時見到呢間食點心嘅舖頭 門口個設計都幾有特色 所以就拉咗我同事同我入去食埋晚餐先返屋企喇😺點心嘅數量唔算太少 款式都幾啱我嘅口味 其實有好多樣嘢都想試㗎 不過個胃就唔係咁大喇 嗌咗幾樣推介點心😛家鄉咸水角 咸水角炸到脆卜卜 但係唔會油林林 層皮都唔算好厚 咬落口都幾煙韌🙊鮑魚燒賣皇 平時飲茶比較少見 所以就即刻帶咗嚟食 鮑魚咬落口一啲都唔韌 燒賣就啖啖都食到蝦肉 食完都幾滿足🐷鮮蝦腐皮卷 呢個係我好鍾意食嘅點心之一 🦐 雖然望落去佢嘅腐皮唔算太厚 但係全層都炸得好鬆脆 而且裏面個餡都算足料灌湯小籠包 呢碟就比較難夾到 由於小籠包放咗喺錫紙碟仔上面 一用力夾起 就好容易穿咗流晒啲湯出嚟 味道都okay嘅 不過一夾就穿有啲唔開心囉😫黑金流沙包 外表就夠晒高貴 食落都好唔錯㗎🤤 流沙唔會太甜 又夠晒流心 好推介大家食呢個👍🏻北菇滑雞飯 雞嘅份量鋪滿飯面 雞肉唔會好鞋 係一個好足份量嘅盅頭飯🤓 另外豉油會喺枱上提供 可以自行調校豉油嘅份量 啱晒鍾意唔太鹹嘅我😂整體嚟講 呢間餐廳嘅食物都幾有水準 下次又入嚟屯門開會 可能都會再返兜😗

今晚去搵啲特別啲既晚餐！估都估唔到可以飲夜茶！黎到屯門既「凝香居」一定要食餐勁佢既裝修又唔同茶樓咁商業化，有一點點中式復古既味道，坐位都闊落舒服！佢既餐點都比較多，不同種類由點心去到燉湯都有幾款既選擇，有選擇困難亦有套餐唔駛諗飽魚燒賣王（$32）同一般酒樓燒賣真心不同，配合鮑魚又唔韌又有咬口！山竹牛肉球（$20）大大粒既牛肉球，一定要配埋喼汗，水準以上，抵食推介！醬王金錢肚（$28）金錢肚醬汁入味，性價比黎講都算大碟！黑金流沙包（$26）呢樣不得不叫，對於鐘情流沙包既人，一定要食！蒸既時間岩岩，一咬落去奶黃流沙冇得彈鮮蝦腐皮卷（$28）呢個係好有心機之作，未食過現場既腐皮卷會脆口又好味！胡椒咸菜豬肚（$38）雖然賣相一般，但味道都可以！時令生菜（$18）呢樣不得不讚，好小人注意菜呢一樣野，香甜新鮮，份量又足夠！蟲草花乾干貝土雞燉鮑魚湯（$68）燉湯真係必點之選，一見到個盅就知道不得了，料多又入味，真係有鮑魚冇呃你，一啖啖都係精華所在

今晚就同朋友經過呢間餐廳，發現好多食客，所以就決定試一試啦，結果都令到我哋好悶意，呢度嘅食物同環境真係好不錯，而且仲要通宵開，簡直係宵夜必食Menu上款式超多蟲草花干貝土雞燉鮑魚湯呢款湯嘅味道超級濃郁，而且一飲落就知道冇落味精，仲有原隻嘅鮑魚，元貝同樣大大粒，土雞都有好多舊，所以令到湯底好鮮甜，令人飲極唔停口家鄉鹹水角上碟時熱辣辣，食落一啲都唔油膩超正！！黑金流沙包呢款流沙包係黑色嘅，超級特別，用黎打卡簡直一流灌湯小籠包呢款小籠包食落超多汁，好Juicy,超正醬皇今錢肚呢款金錢肚同樣好入味，調味得岩岩好豉汁蒸鳳爪調味得剛好，愈食令人愈想食

本身見到D留言都有啲驚驚地要等好耐，不過可能我早去所以啲嘢食都上得好快～無等好耐呢個問題！而且啲嘢食都出乎意料地好食😋😍黑金流沙包本身都唔係好鍾意食包，不過見佢係招牌就試吓啦，竟然有驚喜！已經好耐冇食過真係會流沙啲流沙包～新鮮出爐熱辣辣，入面嘅餡料濃郁得來夠creamy，好彩有叫～藥膳雞腳一上到黎已經聞到好大浸當歸味，果然真材實料😌不過雞腳只有四個，分量就少咗啲，不過味道搭夠！灌湯小籠包😙小籠包啲肉好多！入面都有汁爆出來，不過頂頂個皮有少少厚🤣棉花雞又係喜出望外嘅一環🥰魚肚三件而且好大件好厚，索曬啲雞汁😆雞件夠滑～冬菇，蟹柳都大大件蟲草花鮑魚燉雞湯燉湯都相當足料～入面真係有隻鮑魚架，飲完好暖肚☺️蝦餃，腸粉同牛柏葉都正正常常，有一般水準～其實作為街坊茶樓來講我覺得都算幾好仲要只係$3茶位，開得又夠夜～夜晚落去食點心都得