相撲手日式放題 (Closed)

本來朋友話想去一啲串燒餐廳食嘢，但係我就想食生冷野，最尾都係決定食返最多選擇嘅放題，起碼每人想食咩都可以自己選擇，唔一定要跟本身餐廳嘅風格。餐牌乜都有啲，設計得有幾靚，外觀一目了然。燒番薯仔同埋脆皮腸都係我哋嘅最愛，脆皮腸整得幾得意，鹹香十足。燒番薯仔就好甜，兩者都係細細粒，一口一粒非常方便。另外梗係唔少得刺身啦！刺身都算係放題之中嘅靈魂，因為刺身成本較高，而且係唔係新鮮或者用料靚唔靚一食就知。我最愛食嘅甜蝦果然甜美滿分，而且亦十足鮮味，食落爽口夠清新。壽司就夾雜着熟悉同埋生食，最特別最令人記得嘅就係鵝肝壽司同埋和牛壽司，鵝肝差唔多入口即溶，反而和牛就普通少少，雖然半生半熟但係口感一般軟熟。不過特色已經令人讚嘆。

完左sem約同學仔食，總體黎講比我想像中好，性價比高！不過當晚比較夜去，所以有啲想食既都無食到呢個清酒煮蜆幾好，酒味都幾香，上面有小小菜可以食，同其他既煮蜆唔同，幾有特色。小丸子係我最愛，可以自己揀要幾多粒，一開始試完兩粒後忍唔住再叫哈哈，佢個皮幾脆，入面料幾足，而且上面既木魚好多，食多幾粒都得！呢個烏冬係一口料理個欄，但好大份！一黎都聞到好香，上面有啲木魚炸蒜都幾有口感，不過太遲先叫而個陣好飽，所以一個人食就大份左啲啲～反而串燒好評！雞串啲肉好厚又無皮，咬開可以見到啲肉絲，而且表面有少少焦令到佢都脆脆地。至於個菠蘿都甜 好多汁，不過我個人中意食熱少少既XP

之前問朋友邊度有得食嘅放題餐廳，有幾個都話去尖沙咀嘅依間相撲手日式放題，名稱本身都幾得意，相撲手好似好肥咁，係唔係即係啲客人食完都會好肥呢XD是日例湯比較特別，有啲似屋企老火靚湯，不過味道當然亦有啲味精所以更香。粟米同蘿蔔可以食可以唔食，因為冇咩味道已經。鮮切大魚果然係特色之一，之前啲朋友都話大大條魚擺係出面任人影相，有gimmick！唔知係唔係佢一出面切完就俾我哋食，食落好似特別好食架？甜蝦刺身更更放題都有，蝦頭冇乜黑證明夠新鮮，甜味豐富。叫幾多上幾多，果然毫不吝嗇，哈哈！大大隻生蠔可以話係手板咁大只，未到新鮮，不過就一定要加番茄汁中和腥味。大量不同sushi質素不錯，飯嘅份量唔算太多，起碼唔會用飯來執飽，我就最鍾意鰻魚壽司同埋火炙三文魚，鰻魚壽司甜甜地而且完全冇骨，口感一流；火炙三文魚入口即溶，正！

同朋友年尾食好西先得！就梗係去食放題啦！刺身正啊！件件都係厚切！三文魚又厚又好食！不過最正係油甘魚！味道好濃好好食！玉子都係狂食！夠哂甜又好厚！鵝肝黑松露壽司好正！鵝肝好香好濃！黑松露都係另一種香！食落入口溶化！海膽吞拿魚手卷！紫菜功脆勁好食！吞拿魚又夠濃夠香！海膽又好甜！牛利都唔錯！夠厚身多肉！係用紅酒燉！好入味！芝士焗蠔好正！好香濃芝士味加上勁濃勁滑既蠔！朋友叫既上湯菜！估唔到又幾好味！有好多種菜係入面！上面又有木魚絲！木魚同菜好夾！叫左兩款雞翼配芝士撈麵食！雞翼正啊！皮脆肉嫩！又有肉汁！有隻有辣醬係上面！好惹味！蒸蛋又幾好食！好滑！入面又好多料！

好耐冇同家人去食日本放題了，趁著媽媽生日，帶佢黎食番餐勁既！餐廳佈置充滿日本風味！甜品只有雪糕同雪條，款式唔多！我地既目標係刺身同壽司，所以都唔緊要喇！刺身款式超過十款：有三文魚、鮑片、松葉蟹腳、赤蝦、吞拿魚等等......刺身甜肥美，cp值爆燈！！！壽司精緻小巧，一口就能吞下壽司了！燒物水準都好高！特別係燒和牛串，牛味濃郁，肉質滑嫩！炸物方面，入口唔覺油，炸漿亦唔厚！大概是即叫即炸的原因，炸物香脆！蟹粥除左有蟹之外，仲加有粟米粒、香蔥、紫菜，材料好充足，好鮮甜！蟹肉肉質紮實，不過蟹肉就唔多！蒸蛋加有蝦、菇，好香滑，值得一吃！除左入order紙點生蠔外，仲有即叫即開既生蠔！生蠔都幾大隻，夠肥美！

今晚又去食我最鍾意既日式放題，又可以大吃大喝，今次去左同事介紹既相撲手，果然冇介紹錯，食物種類選擇都算多，食物質素亦唔錯，最緊要價錢又合理！ 120分鐘任食任飲！呢度出名吞拿魚，見到師傅即場劏魚，切片睇到都覺得新鮮肥美，我地當然都有叫黎試試，食落好肥美鮮味！ 刺身方面，牧丹蝦都幾大隻，鮮甜好味道，鮑魚片爽爽地都唔錯，三文魚好靚，岩岩比我地個d食魚腩位好肥美，師傅刀功又好切得厚薄又岩岩好，帶子薄片都好鮮甜，所以兩樣我地有再order！除左刺身，壽司都幾吸引芝士卷物，細細一片芝士被火搶燒過下，特別香同卷物一齊食，當然好味道！ 其他火灸壽司一樣出色，長長火灸鰻魚壽司，燒得靚靚香口之餘，配埋鰻魚汁一齊食更加好味道！ 熟食方面，我鍾意就係焗蠔，芝士份量岩岩好，好多芝士食落好juicy好香芝士味，一d都唔漏蠔仲要啖啖肉，一d都唔細隻！

最近工作壓力好大，趁放假同honey食放題減壓！Honey之前同朋友黎食過一次覺得水準幾高，所以就帶我來！放題當然唔少得刺身啦，刺身款式超過10款，仲有生蠔食添！最鍾意食嘅三文魚果然冇令我失望，三文魚每件都非常肥美，魚油味豐富！寫住絕品嘅北海道帶子令我喜出望外，帶子真係非常厚肉，鮮甜肥美！壽司水準亦很高，每舊壽司都十分小巧，絕對能夠一口吃哂！唔使擔心食壽司飯太多，會食到飽唷！推介芒果軟殻蟹卷，味道清新，口感層次豐富！ 飲品同雪糕都係自己出去拎！餐廳仲每檯送左碗湯，材料都幾豐富。而且味道清甜，絕對唔係味精湯，超like!白酒煮蜆加入左新鮮既紫菜，非常好食！蜆肉雖然唔係大粒，但勝左冇沙，夠鮮甜！燒物有一口和牛粒、有機菠蘿、大蝦、黑豚肉&雞肉， 絕對不能錯過！和牛粒牛味濃，肉質嫩、黑豚肉肉味濃，配上微酸既辣醬好惹味！燒有機菠蘿非常多汁， 正好清清腸胃！大蝦啖啖肉，加左小小海鹽已經好夠味！食食下，餐廳職員響起鐘聲，宣布加推韓國生蠔，好有日本特色！即叫即開，好新鮮唷！

今日一行3人, 本身book左7點去食放題既, 但因為有事要做, 所以打去改8點, 亦confirm左booking, 點知最後上到去竟然話冇左個booking 好彩理論完之後, 佢地都俾返位我地野食方面, 真係難食到一個點刺身係仲未解凍, 完全食唔到魚生既鮮味, 凈係食到冰味, 食落似食緊冇味既雪條清酒煮硯, 煮完縮到勁細粒, 又腥又多沙八爪魚丸入面咩餡都無，得粉漿壤蟹蓋無蟹味又無汁，淨係得好多紅蘿蔔湯烏冬個湯有怪味炒飯炒到d肉老晒, 又乾, 成碟野冇味帶子壽司面頭有d綠色醬, 唔係wasabi, 唔知咩黎, 好難食, 同舊壽司唔match所有天婦羅炸完都係淋晒, 完全唔脆羊鞍凈係得肥肉同筋, 冇肉燒菠蘿好明顯冇燒過, 亦都浸左大量糖水, 好甜蝦多士食唔到有蝦, 成口都係油香蒜茄子, 望落就好似好濃味, 實際就完全冇味最後食食下諗住再叫野食, 點知職員: last order左喇wo我地: 你地都冇人同我地講過last order職員: 人地隔離枱遲過你地黎都last order, 你地又點會仲未last order呀我地: 你地根本一直都冇人同我地講過last order職員: 咁

今日貓咪終於食放題啦。有兵請食放題，唔係唔食呀嘛。餐廳設計到似築地市場咁，已經忍唔住叫曬d刺身。刺身拼盤好靚呀，貓貓最鍾意食魚同海鮮架啦！吞拿魚厚切，真係好新鮮。仲有好多刺身食，平時去旺角平放題食唔到既刺身呢度都有。仲要樣樣都新鮮。仲有蟹鉗！！！！好開心呀。赤蝦真係好新鮮好甜。貓貓見到有奇特既天婦羅食，就叫左炸香蕉，炸orea黎食。估唔到orea攞黎炸真係好好味，停唔到，即刻叫多幾個黎食，好香脆之餘，orea中間既奶油炸左好好味。貓貓想食串燒，就一下叫左牛柳，牛舌，豚肉串燒。整得好正宗日本串燒既味道，所以話比多少少錢，食返高質野係值得既。出邊仲有好多野飲任揀，真係好豪既放題。貓貓食完今日既高質放題真係返唔到轉頭。如果下次再有貓貓兵仔請我呢個港貓食放題就好啦！

朋友生日飯，揀左食日式放題，因為個個住唔同地區九龍新界都有，就揀左出尖沙咀區食，上網睇尖沙咀區相撲手日式放題都幾吸引，就book黎試下啦！ 去到因為book左位唔洗等好耐就有得入去坐，地方都算ok，座位都坐得舒適，侍應服務都唔錯，一見我地食完野，都會即刻幫手執左d碟，等我地唔洗成枱野！食物方面，款式都幾多，刺身，壽司，天婦羅，前菜......呢度最正係連生蠔都有，好少見日式放題有生蠔食，仲要幾大隻肥美得黎帶點海水既鮮味，放題呢個質素算唔錯！ 壽司中仲有創作壽司，新穎得黎都唔錯，但我都係比較鍾意傳統既花之戀，三文魚都幾鮮味肥美，加埋蟹子同沙律醬非常夾！ 三色花之戀亦都好唔錯，肥美既三文魚，油甘魚，吞拿魚包住壽司飯再配埋特製醬汁，都幾好味！ 值得一提，呢度既火灸壽司都幾好食，燒既時間控制得幾好配埋醬汁，熱熱地送上枱值得一試！ 熟食方面就不過不失！最後仲有甜品西瓜涼粉，大大碗加埋花奶一齊食，正！

前幾晚我個朋友又話要去食放題，佢真係放題小姐黎，成日都話要食放題，港島同九龍D放題都俾佢食過哂咁滯，頂佢唔順！🙄今次就無咩點食刺身，專攻熟食，因為呢排食得太多刺身，唔再想食住！首先叫我見到呢間放題有好特別嘅生蠔，侍應一開始會俾左一張專點生蠔嘅紙仔俾我地先，佢話唔夠可以再叫！生蠔-大大隻，海水味唔算非常濃，但都算幾新鮮，唔會有怪味，仲有檸檬汁俾我地擠下。不過就無辣椒汁下，我自己個人就鍾意有少少辣椒汁點下會好味D!但我都翻兜左2次！放題好少有生蠔嘛！天婦羅方面，我食左酥炸蛀牙餅同虎蝦，蛀牙餅其實係oreo餅，呢個真係第一次試，味道甜甜地好特別，估唔到Oreo都可以咁樣整。虎蝦炸粉唔算好厚，微暖，不過不失。軟殼蟹手卷-因爲都好耐無食過軟殼蟹，所以就點左黎過一過口癮。手卷上面有唔少蟹籽，軟殼蟹有差唔多半隻，但都有唔少飯，女仔食小心會飽!豚肉蘆筍卷-呢個推薦，因為入面真係有成8、9條蘆筍，豚肉有D燒汁味，唔錯，同埋唔會燒到乾曬同老到咬唔開！胡麻炭稻庭-其實係冷烏冬黎嘅，落左唔少芝麻醬，有粟米、青瓜絲及蟹柳絲，份量唔算多，兩三個人每人少少都幾好！蜜蜜燒雞翼-有幾分似芝麻雞翼，上檯個陣好熱，新鮮炸起

朋友生日飯,真係唸到頭都爆,又想比小小驚喜佢,但又唔想比佢知,之後同事介紹食哩間放題,佢話打去BOOK位時講底個日有人生日,就會有驚喜,咁生日朋友又鍾意食日本野,咁成班FD去就決定食同事介紹個間相撲手日式放題啦!我覺得哩個活動好搞笑，到7:30左右就會有位師父出黎,之後店員就會開咪,排隊打卡拎蠔食丫原來,會即場開生蠔!佢都有得點生蠔,真係好大隻同好肥美鮮甜,我班朋友都狂食~薯角牛肉粒，薯角炸得好好味好香脆，牛肉粒都好嫩口，唔會好硬，好味道！甜蝦夠份量又大隻，玉子我最愛好甜都滑口，三文魚肥美！這個沙律的醬是粉紅色,甜甜地,幾特別的味道,可一試!牛油粟米真係好香濃既牛油味,,,好好味!韓國芝士麵我最愛..真係好香濃既芝士粉味,我一個人食哂成碟囉...太好味!好似係豬肉包蘆筍,好多蘆筍,好新鮮夠爽口,醬汁既配搭真係好好味!食食下野突然熄燈再播生日歌,原來就係為生日既TABLE送上驚喜,氣氛都好好,我地班朋友都一起唱生日歌同拍手歡呼,生日朋友都好開心,佢既一個酥皮再有拖蘿小食,朋友都大讚好味又新鮮!

尖沙嘴區比起旺角區嘅放題店舖數目少好多，不過咁岩係尖沙咀就喺附近食埋放題，原來有一間叫做相撲手嘅放題店，好耐之前已經聽過呢個名，網上評價也不錯。 鰻魚肉鬆菠蘿卷啲鰻魚甜甜地，配搭埋甜甜地嘅菠蘿以及小小鹹味嘅肉鬆，口感唔錯至於味道亦非常匹配，估唔到咁樣配搭都可以成為一個特色卷物。 白汁魚柳就覺得佢好有新意啦，因為竟然呢啲地方有得食好似中餐又好似西餐嘅食品，所以唔一定淨係食日本野韓國嘢。啲魚柳外皮有少少香脆，裏面啲肉質滑！ 炸物都做得唔錯，好香口所以連啲硬殻都可以食，味道幾新鮮至少油香味好重。栗米就係朋友成日都話我好蠢點解揀呢個食品，不過我覺得一間餐廳嘅粟米都好重要，因為拎貨又可以好參差，又可以整得好參差。牛油味好香味道亦甜，比想像中更加好味，份量適中。 魷魚海產有彈性，而且亦有鮮味，熟到剛剛好，值得一試。 相撲手日式放題 尖沙咀寶勒巷6-8號A盈豐商業大廈2樓全層

同好姊妹係尖沙咀行街，再食埋飯先走，尖沙咀其實真係好多野食，但又真係唸唔到想食乜，就行下行下，行完Ｋ１１再行前就見到間食日本放題，個名都好搞笑，叫相撲手日式放題，個名都好得意，之後大家都想食日本野就決定食哩間位於，地點好方便又好易搵，食物都好多樣化，幾特別的食物！緊係先叫左個中華沙律先啦,咁先可以慢慢食,青瓜好新鮮,份量都好多!之後就叫壽司,花之戀係我最愛,三文魚都好肥美,好味!黑松露蟹柳棒個配撘真係好正,好香口!唔係間間放題都有枝弄架,用黎送酒食一流之選!炸物,黎到仲好熱架,真係即叫即炸,樣樣都好脆卜卜,章魚丸好正,皮又薄又足料!超大隻生蠔丫,,,新鮮鮮甜三文魚大件肥美,甜蝦好大隻丫,又鮮甜,必點之一!巨型金茹肥牛,好惹味丫個醬汁.肥牛又唔會太肥,每樣野都好大件!我曝愛既燒茄子,整得好好味,我第一次食放題有燒茄子,羊架都醃得好味!哩個清酒都整得好入味...

今日去左相撲手食放題, 一坐底望一望個餐單, 都咪話唔吸引! 前菜、刺身、創作壽司、火灸壽司、卷物、手卷、天婦羅、燒物、串物..... 好想食晒全部呀!!! 首先黎個刺身拼盤, 賣相唔錯, 刺身鋪排整齊, 又唔會有冰面, 三文魚大大塊, 厚切黎既;鮑片好鮮甜;吞拿魚、北寄貝都好好食。 當件蔥吞拿海膽手卷拎到埋黎既時候, 好香, 三者配搭得岩岩好, 如果是但一樣多左或少左, 我諗就食唔返呢隻味啦。後來又忍唔住想食多次, 叫左件海膽蔥吞拿魚既創作壽司, 唔.....冇得輸, 反而少左啲飯仲好, 冇咁滯。 熟食方面, 我嗌左個牛油清酒煮大蜆, 安格斯一口牛粒串, 牛舌, 芝士煙肉焗蠔, 以及蜜汁燒雞翼。好多間既煮蜆都係見殼唔見肉, 就算有都係好細粒, 但呢一次就唔同啦, 蜆肉大大粒不特止, 聞落去牛油香味, 食落去唔重酒味, 又唔會油膩。至於講到串燒、燒雞翼同燒蠔呢, 夠晒熱辣辣, 呢樣真係好重要, 亦都唔係間間鋪頭都做得到, 可能為左貪快而忽略左呢個重要性掛, 所以我好欣賞今日呢間餐廳既熟食。 總結黎講, 今晚呢餐食得好滿意, 希望下次會有一樣既水準, 甚至更好既體驗啦!!