五匠六釜

Open Now

Now Closed

🍲 五匠六釜 🍲今天來到啟德的五匠六釜，準備品嚐一頓豐盛的美食盛宴。走進餐廳，被充滿活力的用餐氛圍所吸引，馬上讓人感到期待。🥢 雞絲粉皮首先品嚐到的是份量十足的雞絲粉皮，粉皮幼滑爽口，搭配上濃郁的麻醬，味道十分出色，令人回味無窮。🍛 欖菜肉粒炒飯接著是具有鑊氣的欖菜肉粒炒飯，欖菜的酸甜配搭炒飯，美味絕頂，每一口都散發著獨特的香氣，令人欲罷不能。🎃 黃金南瓜黃金南瓜炸得外脆內軟，鹹蛋黃與南瓜的完美搭配，帶來甜甜又鹹鹹的美味，每一口都令人驚艷。而且送上桌時還是熱騰騰的，讓人一口接一口。🥟 肉三鮮餃子最後是肉三鮮餃子，皮薄餡多，湯底也十分美味，每一口都充滿了鮮美的肉汁，令人愛不釋手。總的來說，五匠六釜提供了豐富多樣的美食選擇，每一道菜都十分出色，絕對是一個值得一試的餐廳。📍 地址：啟德協調道2號 Airside 6樓 602號舖

對此餐廳非常失望，上網訂座了6:30pm，餐廳當天4:00pm左右提示訂座了和說明限時90分鐘，家人6:25pm已到現場，但餐廳必需所有人到齊才可以入坐，如果不限時的話，齊人才可以入坐非常明白，反正限時，book了6時半，我8:00前走咪可以，6:40先齊人，亦冇枱比我地，最後7點05才能進，咁我book枱嚟做咩？有咩用？唔想做生意就咪鬼做啦，食物質素一般，餐具比較油，只是座位比較舒服！有時間同齊人先好去食

5月4日，我們在17:45預訂了一張7人枱。我們已有3人到咗，當我們拎枱時遭門口待應拒絕，要我們齊人方可入座。我跟待應講可以照計時，唔影響還枱，但待應仍然不肯安排入座。期間，不停安排walkin客人入座。17:50，我們已經人齊，可是，這間餐廳已沒有7人枱給我們。我們冇耐地接受餐廳剩餘最後一張嘅6人枱。在埋單時，餐廳仍跟我們去解釋，他們必須要人齊才可入座，不論是Walkin還是訂座。都已食完，唔需要再跟佢討論這個問題啦。

出邊落大雨，梗係行商場啦，路過呢間嘢都坐左一半食客，膽粗粗試吓同埋支持本地食肆。餐廳裝修都尚算光猛，亦有近窗口嘅位置，餐廳內部大枱唔算多，主要最多都係六位以下嘅枱。枱上面一早已經安排好餐具同埋洗碗兜、茶水。QR code落單。我哋兩個大人加1個小朋友，一共叫咗個陽春面、三鮮水餃🥟、羊肉水餃、辣椒土豆絲、京燒羊肉食咗個陽春麵之後。佢之後嘅嘢食冇乜期望。點知個辣椒土豆絲非常之有驚喜，除咗土豆絲之外亦有唔同配菜，非常足料。兩碟餃子亦都在水準之上。可惜京燒羊肉係炸㗎，略嫌油膩，不過性價比好高，$400有找

Airside 💁🏻‍♀️五匠六釜。向airside嘅五匠六釜位於6樓空中花園樓層。到達時已經有好多人喺門口排隊，應該都好多捧場客😃。首先講吓環境，坐得都幾ok舒適闊落。而且店員服務很好。上菜速度理想，每碟都大大碟好抵食。賣相亦都唔錯。食物水平可以，服務質素好。今晚我哋叫咗：1）白菜豬肉餃 - 肉質Juice，粒粒都好大粒。而配合埋辣椒醬汁好有家鄉風味。2）秘製杭州骨 - 份量十足，有啲似糖醋骨。再加上有菠蘿洋蔥炸薯仔粒，好有特色，好足料👍🏻3）蔥爆牛肉牛肉柔嫩彈牙，配合埋大蔥爆香醬汁。齒頰留香😌好美味。4）四川擔擔麵份量十足，好有家鄉情懷。食到好濃嘅家鄉味😚我哋見到好多人都有嗌片皮鴨＆酸菜魚，都好大碟，相當抵食👍🏻👍🏻。menu仲有好多好多唔同種類嘅美食。餐廳亦有推出特飲，主打鴨屎香檸檬茶，有機會再嚟試試。

之前去咗Airside行下，random入咗呢間片皮鴨餐廳食lunch，野食味道普通，但性價比幾高😛北京填鴨🦆 (半隻，跟一份餅皮約20片) $168 (1隻，跟兩份餅皮) $318半隻片皮鴨份量唔少，擺盤都幾靚幾吸引！鴨皮夠脆，不過鴨肉部分比較乾身冇咩油脂香🥲鴨兩食：茄子🍆炒鴨架(半隻) $60片皮鴨可以追加炒鴨架揀茄子或者紅椒幾入味😙黃金南瓜🎃 $82呢個份量超多，應該4個人以上先食得哂😂 南瓜好夠甜，加左薄炸衣同鹹蛋黃食落好香口，不過要趁熱食最好味😍📍五匠六釜🍽️ 7.5/10@jan_foodiary

星期六帶左狗狗去Airside, 尼個商場係pet friendly, 點知得幾間餐廳可以帶竉物，而且一定只可以安排坐於餐廳外圍，狗狗又要放係餐廳範圍出面，咁都算pet friendly 咩？最後去左五匠六釜食飯，等左兩個鐘終於有枱，但係坐低左冇人理，水又唔俾，連落單barcode 都冇俾我地。 因為坐左係reception 隔離，咪叫前台位姐姐俾啲水我地，點知佢(啪）一聲大大力掟低個壺😡😡，咁既服務態度就算食物ok 都冇下次啦！👎🏼👎🏼你估唔駛俾錢咩！想叫北京填鴨又賣晒。個水煮牛肉過鹹同太多鈉。家常餅,四川擔擔麵，同農家炒飯都正常ok既。但下次去airside 一定唔會再幫襯呢間。

係openrice見到呢間餐廳特登過啟德試下，點知搞到一肚氣。事源夜晚6點半去到餐廳拎飛，當時機器顯示叫到43號飛，而我拎44號，即係下一張就會到我。但係呢個時候有客人過黎，應該係過左號碼，所以下一張枱要補返比佢，咁我都明白。然後門口的知客小姐就問仲有冇其他要補飛的客人，當時佢都話如果未叫號的就不用同佢講，如是者就繼續叫號碼。但係點知佢下一張飛竟然叫46號，仲一枝箭就帶左兩位客人入去！重點係當時機器仍然顯示叫到43𠮟，即係44及45號飛仲未叫到！我地就即刻同知客小姐講：我：我係44號飛仲未叫，點解會比46號飛入去先？知客：佢地補飛架！（仲未意識到問題）我：但係你都未叫44同45號飛，點會比46號飛入架？知客：（終於意識到）唉呀，冇睇到我：你頭先明明話未叫到就唔需要同你講補飛，佢都未叫到同你講，你睇都唔睇就排後補，又睇都唔睇就比佢入先。知客：咁都冇辦法，人地都坐底左。然後佢就冇理我，我嬲得濟就走左去樓下另一間食片皮鴨。其實我都明白忙中有錯係好正常，而且客人已經坐底左係冇可能叫人地起返身，但最起碼都應該講返句：「唔好意思，下張枱即刻比返你」，而唔係一句冇辦法就算。而且即使要補枱都唔應該比哂

-去airside咁多次 真係第一次上6樓喺OpenRice訂咗呢間食京川菜嘅餐廳裏面有我鍾意食嘅片皮鴨 仲要係超抵食😍5:30入座 QR code落單 用餐時間90分鐘 🫨大約六點左右已經全場爆滿 直至到我哋差唔多離開⋯出面已經企滿晒等位嘅客人😧可想而知呢間嘢都幾多人幫襯🥢我哋兩個人叫咗三個菜式 兩杯飲品⋯埋單只需要四百零蚊 😋真係可以講係親民嘅價錢🔹北京填鴨 半隻 (包一份摩摩皮) $168片皮鴨以$168呢個 價錢 可以有呢個份量真係滿足😌鴨皮油脂豐富 仍然保留住微脆口感 包埋青瓜京葱甜面醬一口塞🤩Jeng 多數出去食片皮鴨啲皮好快就冇晒⋯去到尾只有淡口食滿滿油脂既鴨肉鴨皮😅呢度完全冇呢個問題塊皮夠薄又有煙韌嘅口感(不過有少少難搣開😅)🔹草捆牛骨 (小) $120未食過呢種牛肉😀 見Menu上面又好似幾吸引就叫咗試吓 其實就係用比較傑身既黑椒汁去煮🤣牛肉好軟腍⋯但就略嫌比較多肥膏🔹螞蟻上樹 $82呢度嘅螞蟻上樹都幾大兜 辣辣地好開胃🤤兩至三個人share啱啱好👍🏻🔹鴨屎香檸檬茶700ml $28🔹檸檬益力多700ml $28飲品🥤就勝在好平 呢個價錢 出邊手搖店都未必飲到

諗住放假試新餐廳，見到咁多人排隊，以為一定好好食點知得返8:30先有位，坐低咗先發現原來一早已經冇晒片皮鴨，但係職員完全唔理我。唯一同職員有對話係門口姨姨指引我去邊張枱，然後由我哋自己行去枱 去到落單埋單都係自己服務自己！就連加茶都係自己做！食物嘅質素非常普通，同一般屋村酒樓嘅質素一樣，朋友話可能部份人都係住附近，貪方便過嚟食。因為價錢唔算好貴，所以成為了解方飯堂但絕對唔建議特登搭車或者揸車去食！同埋我哋發現廚房會特登等到有其他客人點同樣嘅菜，先會一齊煮，每次一出就三四碟一模一樣嘅菜，好有機會自己嗰啲分少咗！我哋最後叫咗酸菜魚，我哋五個人 每人都唔可以分到兩塊魚片，然後鹹到要不停飲水，勁濃味辣子雞丁，只係炸雞粒，每一粒只有手指公咁大，都係每人得兩粒，然後成碟都係花生同埋辣椒四川擔擔面，食落去係麻辣雞煲味，只係湯底有味，個面係完全冇味黃金蝦，係比較好食嘅一碟，不過係一定定冇辦法咬返蝦殼出嚟，如果唔想食蝦殼嘅朋友就唔好點啦蝦蛋炒飯，完全想像唔到高級餐廳會用三色豆炒飯！完全同我中學食嘅頹飯一樣京蔥炒牛肉，一食落去就覺得好似乾炒牛河嘅味道總結，完全唔推介！餐廳完全冇服務！食物質素亦都好普通！

接近黃昏時間來到，等左一陣位，坐近窗邊，冷氣太大有點凍，好在都有杯熱茶可以暖下手。可以見到車站廣場附近的街景。北京填鴨 半隻 ｜ $168好似都好多人食北京填鴨，看起來份量都算多，皮也有好多塊，2-3個人食半隻都可以。鴨皮可以再脆一點及多一點，配料有青瓜，青瓜多一點更好。糖醋魚片 ｜$86魚肉無骨，都有好多魚塊，配料有青紅椒，不會炒到過老。菠蘿酸酸甜甜，幾開胃。茶位｜$5茶都夠熱，不過碗筷有少少黏。

放假先黎落雨！好在而家有好多商場行，今日就約朋友去咗新商場Airside行下，從啟德地鐵站出口行過去就到，方便得嚟最好係唔洗淋雨。行到6樓見有間餐廳叫五匠六釜，餐廳環境光猛，地方夠大，提供中菜，餐牌價錢公道，我哋都話不防一試！北京填鴨半隻（包半份摩摩皮）：烤鴨係已經切好，排列整齊放在長碟上，份量都好多，每片鴨都帶皮和肉，厚薄適中，摩摩皮係熱的，撕開後包上鴨件、青瓜、韭黃，再加上填鴨醬好惹味！鴨兩食：茄子炒鴨架炒得都幾有鑊氣，鴨架仲有啲肉，茄子林滑，沾滿濃濃的醬汁好惹味！送飯一流！四川擔擔麵（1辣）：湯底濃郁，麵條彈牙，加上花生、肉末、蔥花，無論口感和味道都唔錯。原來餐廳有推出特飲, 主打鴨屎香檸檬茶，下次再來試試！

家人難得返港放暑假，當然要帶佢到Airside逛一圈，順理成章喺商場食個晚餐😋上次試過呢間中餐廳，雖然用餐體驗不算非常好，座位多又同鄰桌隔太近，但勝在味道不錯，價錢份量亦好合理，同家人黎用餐非常合適。——————————🔸北京填鴨（半隻）$168再訪既主因就係呢道菜，只要仔細觀察，就會發現基本上每桌都會點填鴨🦆半隻鴨只要$168，確實不是每間餐廳都做到。鴨皮香而不膩，鴨肉紮實不肥，配摩摩皮、京蔥、青瓜及甜麵醬同食，好有層次。🔹四川擔擔麵 $52驚喜之選🍜湯底濃厚不膩，花生粒粒令整體更香更有口感，麵條滑身掛湯，完全不軟爛。以這個價錢食到這個質素，無得輸✌️🔸糖醋里脊 $89調味酸甜有致，醬汁帶椒香，里脊外脆內軟，同樣好有水準，如果肉量可以更多就更滿足了。

airside 食物款式超級多的上海菜座位多 不過唔太闊落裝修簡潔光猛見到新推出了好流行的鴨屎香檸檬茶✨砂窩雲吞雞（半隻）$148大大個砂窩上枱😎附上刀叉方便切開雞件雞的肉質好軟腍✨麻婆豆腐（2辣）$70豆腐好滑溜 見到有粒粒豆豉有好輕微的香辣 都幾惹味撈飯一流👍🏻✨鴨屎香檸檬茶$28有個人喜好選擇我自己就揀左少甜同少冰比一般檸檬茶更香 都幾正👍🏻✨脆炸鮮奶$32烤到金黃色 一夾就知脆卜卜外脆內軟 入面啲鮮奶綿滑✨白飯 $12

📝QR code 落單：🥢北京填鴨半隻 $168半隻嚟講都幾抵食 兩個人嘅話都好豐富 鴨皮香脆 肉唔肥 油脂唔算多 唔會好油膩 配埋醬料 青瓜 京蔥一齊食 清新爽口 性價比都算高👍🏻🥢蔥爆羊肉 $98份量多 香口惹味 羊肉唔會太羶 調味偏濃 非常適合伴白飯一齊食🤭🥤鴨屎香手打檸檬茶 $28餐廳推介 時下好興嘅鴨屎香檸檬茶 連呢到都有得飲 茶味幾濃 冇少甜情況下 飲落都唔算甜 不錯💛整體餐廳理境好闊落 樓底高 冷氣夠 只係略嫌枱同枱之間近咗少少 但絕對係可以encore嘅餐廳🙌🏻