新越越式料理 (Moved) New Location

國慶、中秋這兩個大節日，適逢連在一起，我地打工仔，難得假期可以放完又放，真是太開心了。姨母在大陸來港，與我家一齊過中秋節，難得姨母來港歡聚，又點可以，唔帶她出去食飯呢？姨母都是喜歡食些香口、酸酸辣辣的食物，記得上次她來港時，我們都是帶她去食泰菜，今次要轉口味，要食越南菜，都是有酸酸辣辣的味道。睇到餐牌的美食，樣樣都想食！套餐的食物，多樣化，包含了甜品、粉麵飯、飲料、時菜，一家合心意。火車頭湯河粉、湯底香濃、是一碗湯河的靈魂，除左湯粉夠滑溜外，其它的配料都不可少的，有生牛肉、牛柏葉、牛丸、肉質鮮味，夠彈牙、銀牙可增添口感，連湯底都不放過。馬拉盞炒椰菜苗，菜苗爽口夠青綠，加上鹹香味香濃，增添了口感。芝士蒜香大蝦頭，芝士蒜香，味夠香濃，大蝦好大隻，比手掌還要大，又多蝦肉，啖啖肉，肉質鮮味，夠爽口，加上芝士蒜香的惹味，美味可口。

經常同朋友及同學出去找食，離唔開打邊爐、泰國菜，真是有點膩，真係唔知有咩野好食，食野都冧到頭痛。聽到同事講開，妳成日都是食泰菜，不如試下食越菜啦，有部份菜式都似泰菜，既然有這個提議，我就約埋好朋友一起分享吧！找到去九龍城，這個不夜地區，當然食飽飽啦。地方佈置得好簡潔，又舒適。我地點左了一個二人套餐，有小食、粉麵飯選一、炒時菜、飲品及甜品，真是足夠二人食用。香茅雞翼，香茅的香味濃郁，雞翼炸得香口，又不油膩，保留了肉汁，夠入味。馬拉盞炒通菜，通菜炒得青翠，鹹香味香濃，令到青菜入口美味，停不了口。香茅豬扒飯，豬扒煎香又唔嚡，夠稔滑，肥瘦適中，肉味香濃。甜品是焦糖燉蛋，蛋夠滑溜又香濃，焦糖脆卜卜，入口美味。

喺黃大仙聽完講座，最好係行落九龍城搵嘢食，原來非常近，10分鐘已到。同朋友行嚟行去搵好嘢食，今餐係我請佢食嘅遲來生日飯，最後決定喺呢間裝修好雅致嘅越式餐廳食午餐。二點多，仲有午市套餐。由三十多元至五十元不等，好抵食。我地兩人order咗一個香茅豬扒撈檬、一個咖喱牛腩飯。話咗請食生日飯，所以另外叫咗朋友鍾意食嘅酥炸軟殼蟹及柚子大蝦沙律。香芧豬扒非常香口，如果d檬粉再凍啲會更好！咖喱牛腩飯，咖喱汁香濃，牛腩分量十足，呢味餸就好正，但個白飯就比較軟林林，唔係太啱食慣硬飯嘅我。全塲最正個酥炸軟殼蟹，炸得好乾身，香口得來一啲都唔油膩，仲要食嘅時候食到好香嘅蟹膏喺裏面。真係好食到停唔到口，最後食到一舊都無剩。個沙津用料都好足，d蝦好大隻，個汁對我來說剛剛好，但朋友就覺得甜咗少少。加了8元改了特飲，青檸梳打，為炎熱的天氣消一消暑！爽！

放假同朋友去九龍城食好西😋行行吓經過呢間越南餐廳覺得裝修幾靚就入咗去啦😁餐廳裏邊樓底好高，所以喺餐廳裏面傾計都唔會好嘈😛雖然係晚市但係都有一啲越南特色粉面，一見到餐牌就即刻好想食越南河🍜🍜🍜朋友就嗌咗生牛肉湯河，見到個湯都覺得濃，果然諗落的確係好入味，加埋餐廳提供嘅青檸檬香葉，朋友話即刻諗返自己去越南旅行果碗湯河😂😂而我就叫咗火車頭，真係有好多餸同樣個湯都非常吸引☺️☺️個份量真係大得好誇張，隻碗好似個頭咁大，如果女仔食可以share😵除此之外我哋仲嗌咗豬頸肉，佢煎得好香又唔會太肥

放工後，約左老公去九龍城食晚飯，老公說好耐冇食越南菜，今天就選一間越南菜館食，行到福佬村道，見到一個招牌好奪目，名叫新越越式料理，見到店內都差不多滿座，老公說不如入去試試吧！餐廳地方不大，但整體雅潔，座位舒適！套餐好底食，包埋熱飲品一杯！咖哩香茅豬扒河：咖喱濃郁帶辣，香茅豬扒入味有口感，滑滑的河粉和咖哩湯汁一起食，十分惹味！越式咖啡：(套餐只需加10元)加有練奶的咖啡，味道濃郁帶點炭燒香味，凍飲可倒入加有冰的杯裏，真的透心涼！炭燒香茅雞翼檬粉：雞翼入味，炭燒至金黃色澤，十分香口，檬粉加有芽菜和洋蔥，口感一流，配合濃郁鮮味的湯底，十分美味！餐飲我要了椰汁紅豆冰，椰汁味香濃，好飲！南乳吊燒雞：燒雞皮卜卜脆，雞肉入味有口氣感，點些南乳汁更惹味！

一般去開九龍城都係食泰國嘢，今次我想一反常態，唔食泰國菜，食越南菜！以往九龍城食飯一定好多人排隊，所以今次我地7點就去到，冇問題啦，唔洗排！首先叫咗個酸辣無骨凰爪，酸同辣個味道調到剛剛好，雖然凰爪冇骨，但絕對入晒味，而再加埋啲配菜番茄，超正！然後就鮮茄牛腩河，番茄味好濃，個湯底超正，而牛腩超霖！同個番茄湯底超夾！新越式火車頭面，超級足料，個湯底係精華，好濃，而所有牛都好霖！椰青好新鮮！青檸梳打唔會太甜，超正！埋單唔算貴，性價比高！

約1小時前剛剛用完餐, 叫咗兩個套餐 ，味精湯底 ，一出門口即刻口渴 才記起 套餐點解會冇飲品， 收咗10 percent服務費嘅服務員話要我哋提出先會提供， 佢提議 打包飲品給我們 ，我們說只要 一杯，佢話外賣要加一蚊。 我們疑惑地反問兩杯改一杯仲要加一蚊!? 收咗10 percent服務費嘅服務員板著臉入去又出來帶回一杯外賣熱檸水 又再提醒下次外賣係要收一蚊。 還要問我們明唔明白， 我們即時退回熱檸水。各位下次幫襯記得帶埋圍裙做埋服務員。

去九龍城探友人, 係佢食過呢度咁多間食店, 問佢邊到開餐好? 佢第一時間介紹呢間, 佢話自己食過好多次, 既然係咁, 一於咁話!呢間食店面積唔算好大, 但樓底夠高, 坐底都唔覺焗促! 望完餐牌食物選擇都唔少, 價錢親民價, 晚餐.................起動!毎次食越南菜都必點呢客酸辣無骨鳯爪, 每間都有自己STYLE, 呢間就無我喜愛既芹菜, 只有洋䓤及蕃茄作伴菜; 爽口彈牙既無骨鳯爪浸係酸辣汁中都幾入味, 辣度幾溫和, 無骨鳯爪份量都幾對眼! 酸辣口味都幾醒神!呢客蒜蓉牛油鷄翼, 雖則叫鷄翼, 但見到有鷄鎚, 熱辣辣上枱已經聞到好香既炸蒜蓉味, 香脆既蒜粒灑滿係金黃色既鷄翼上, 鷄翼皮香肉嫩, 牛油味唔算好濃, 但鷄翼調味得唔錯又入味!呢碗火車頭湯河($78)真係超級重份量, 足夠2-3人分享, 面頭鋪滿芽菜, 用熱湯浸一浸食落爽口多汁; 火車頭材料包括牛丸, 牛栢葉, 半生熟牛肉片及清甜蘿蔔, 湯底帶有清甜味, 加埋洋䓤及青䓤粒既香味, 配合幼滑河粉一齊食, 抵食又好味!總括黎講呢間食物質素唔錯, 價錢亦唔貴, 份量又夠, 回頭率都幾高, 多謝友人既好介紹!

去九龍城食飯，通常都係諗到泰國菜出名，但上星期先食完，所以想試下其他新嘢；九龍城都真係好多選擇，一路行，行過一間叫「新越越式料理」既餐廳，見入面都9成滿座，我諗應該都靠得住唔會中伏🤔，望下門口餐牌價錢合理，於是入去試下😎Set lunch選擇都幾多，亦有單點食物叫左三個午市套餐+一個雞翼小食龍眼冰好清甜，龍眼肉都好多；咸檸七咸味夠，飲品唔會成杯冰但飲落又夠冰凍碳燒香茅雞翼$48（單點）雖然只有兩隻，但幾令人驚喜，皮脆肉滑，好juicy唔乾身大蝦柚子沙律$51，味道酸酸甜甜，好開胃，柚子份量夠牛柳粒法包$54牛肉份量都唔少、夠淋，洋蔥同牛肉都好入味，配法包都好夾越式扎肉炒金邊粉$51份量好足、夠大碟，口感好豐富好多配料，鑊氣夠👍金邊粉好滑好煙un估唔到九龍城除左泰菜，越南野都靠得住

喜歡去九龍城，喜歡其平日的寧靜。 就如這餐廳一樣。店內以白色裝修為主，枱櫈簡約而有designer feel👍樓底也高。特式拼盤 - 有3支雞肉串，春卷，扎肉，沙律。雞肉串的肉夠腍，夠入味，好大串。春卷夠脆，夠熱。扎肉片上鋪滿炸蒜頭，好味👍沙律有紅蘿蔔，椰菜，雞絲，好惹味。菠蘿炒飯 - 夠大碟，超多菠蘿，多蒜👍越式炒金邊粉 - 多扎肉，芽菜，味濃，金邊粉炒得夠乾身。還有其他套餐，價錢平。我見隔離枱的也很大碗😆總括而言，坐得舒服，食物質量ok，價錢算平。

一個人食咩好，越菜食個pho都未嘗唔係一個好選擇。今日又嚟到九龍城揾食，嚟到一間叫「新越」既越式餐廳。由於一個人晚餐，通常都係食碗粉麵簡簡單單解決就算。所以食pho係一個好選擇。呢間餐廳好多pho套餐可以選擇，$50左右再配一杯飲品，係百物騰貴既香港，呢個價錢無得輸。裝修方面偏向北歐風，令人非常舒適！有別於一般越南餐廳。我叫左一個咖喱豬扒檬，配一杯凍奶茶。牛油雞翼係每次食越菜必點！所以我亦加左個小食。咖喱豬扒檬外貌似喇沙，但入口咖喱味非常濃郁，超級開胃！豬扒份量十足，好香香茅味！檬粉彈牙，吸哂咖喱汁，真係好開胃牛油雞翼亦無令我失望，酥脆既外皮包住嫩滑雞肉，配以香到不得了既牛油，令人卻罷不能！

之前曾幫趁過新越越式料理吃晚飯，因未嘗蒜蓉牛油焗大頭蝦，今次晚餐可以如願所嘗。我們點選$278二人套餐，不用多費神，多好啊！木瓜蝦沙律，木瓜幼絲、半邊蝦仁、雞絲調味得宜，沒有醋酸味，喜歡呷醋會失望。蒜蓉牛油焗大頭蝦（每位半隻），沒有油淋淋的賣相，漂亮極了！大頭蝦蝦肉夠新鮮，肉質爽實，蝦頭還有少許蝦膏。火車頭湯河，材料很豐富：生牛肉、牛丸、牛筋、爽脆牛百葉、清甜白蘿蔔........大大碗，三人分享！很惹味馬拉盞炒通菜，比較油多，但不夠油炒又不好吃，幸好三人分享都不太介意。還加一碟豬頸肉炒烏冬，我沒有品嘗不予致評。上次吃過生牛肉湯河，好吃，今次再吃。我們要兩份杏仁芭菲甜品，杏仁和椰絲吃得滿口清香。侍應很貼心，我們三人分享二人套餐，多送我們一份焦糖燉蛋，甜蜜又窩心！吃得飽飽和滿足，還有兩杯熱檸餐茶沒有上鏡呢！

越南吃過越菜，好想再試那種口味，估不到九龍城比到回味比我午餐叫個蟹肉湯檬，個湯好香海鮮的咸香和鮮味，飲落好濃郁，好有口味，檬粉好幼滑，連湯一起入口，檬粉好入味，好正，重點好多蟹肉，好新鮮的蟹肉，入口滑溜多汁，好喜歡突然想吃鉄板烏冬，烏冬好彈牙，不會太林，因為即炒，不糊口，醬汁完全入了烏冬內，掛汁的口感特別好，配菜洋蔥、紅蘿蔔、尤魚等海鮮，好惹味酸辣鳳爪好大份，個酸辣汁入口好好味，不過辣味之後慢慢滲透出來，不吃得辣的要三思，鳳爪又爽又彈口，好好味辣都唔緊要，飲返杯椰汁綠豆冰，好解辣解渴，綠豆蓉又甜又鮮，同椰汁超夾朱古力也不錯，好香好滑，可可味濃厚

九龍城出名泰國菜館多， 多數去到都係食泰菜， 今次就試下越南菜食越南菜次次都一定會食番碗pho, 而呢間越菜pho 既湯底標榜正宗同足料熬製標，所以決定一戰! 餐廳價錢都算貼地， 亦有足夠款式選擇，連我最愛紅酒燴牛尾都有但係今次兩個人食叫唔到咁多野 頭盤小食要左個拼盤，串燒沙爹唔會燒到好dry, 夠juicy, 沙嗲汁都調得岩岩好唔會太咸。越式春卷表面整得好脆， 咬落去之後餡料係口腔入面爆哂出黎，口感層次夠哂豐富牙車快沙律整得好fresh, 作為前菜亦好開胃。之後到今次既主角-- 火車頭非常大碗，份量夠2個人食湯頭非常濃， 充滿牛肉的味道， 相信師傅一定熬左好耐。 配料方面亦夠足料， 牛坑腩、 生牛肉、牛筋、 牛丸等， 喜歡牛既必試菠蘿雞絲炒飯炒得夠乾身， 飯粒分明

這裡吃午餐，看餐牌已經覺得好多選擇了，好多種類看了一陣，決定選了海南雞飯上枱大大碟，海南雞的份量十足，雞肉又白又滑，入口有鮮味，咬落都好林滑，點了醬汁十分入味，撈飯好味另一碗叫左朱扒撈檬，朱扒外面香脆，入囗滑溜林軟，仍保持到肉味及囗感，檬又滑口，撈檬d汁好夾好味，酸酸甜甜的消暑叫埋椰汁涼粉冰，滿足了囗舌，清涼消暑涼透心，椰汁甜度適中，涼粉入口滑滑，好味另叫多個椒鹽軟殻蟹，十分好味，炸得又香又脆，蟹仍保持肉味肉汁