一牛越南粉專門店 (Changed Hand) New Restaurant

今日行過買外賣，佢個午餐有香茅豬扒飯，見甘耐冇食過叫一個外賣番公司食。 到打開非常失望兼有少少覺得比人呃。第一，香茅豬扒飯 零香茅味，又冇蔥冇成。 成碗野係淨係一塊碎上炸豬扒加白飯 甘就收左我55蚊。 一條菜都冇。蔥又冇，汁又冇。成碗扔左落街買飽食算。 愈諗愈唔gur 所以一定要post呢篇文。

一早去左港島區仲未食晏，距離食晚飯又有段時間，一於就去朋友推薦而bookmark左好耐都未有機會試嘅上環phõ專門店！因為實在太肚餓，所以除左生牛肉湯河，仲order左一件越式蝦餅同越式椰汁紅豆冰！生牛肉湯河湯底清純，牛肉係我食過嘅phõ中算厚身，牛味重但可能因為較厚所以有少少筋，河粉幼滑，整體味道唔錯。越式蝦餅外皮較厚，不過不失。我幾鐘意杯椰汁紅豆冰，椰汁味濃郁但又唔會好杰，紅豆粒粒分明但又唔會過硬或過淋。最重要嘅係平時飲野必走甜嘅我都覺得正常甜度下都唔太甜，好味又難得！埋單時先發覺原來下午茶有八折，$78就有phõ、小食同飲品，幾抵食。下午茶時段唔太多人又坐得舒服，值得一試！

剛 11.30 左右去買左香茅豬扒飯午餐外賣，基本上第一、二個客人。個飯 硬，應該係生米；又無俾魚露，簡直令人完全失望 ！！！早幾個月去食過，都唔係咁。收 $55 連鴻福堂一支細涼茶，仲話已經 85 折，完全不值。

星期日去咗呢度食晏 ，叫咗生牛河 豬扒撈檬 雞肉撈檬等，味道都算可以，人又唔係太多，清清靜靜 都ok嘅。 但係埋單嗰陣時先至知道冇得用OR pay, 真係感覺唔係幾好。其實揀呢度識係因為佢有ORPay。 嘢食ok，但係好似唔係好抵。

下午兩點後就有下午茶八折，所以就叫了最貴的招牌火車頭檬粉賣相不錯， 好多配料，幸好並不是太大碗，配料除了牛肉之外，有牛丸、牛筋和牛柏葉。牛丸像平時飲茶的牛肉球，不是爽口的，有點粉粉的感覺，牛筋軟腍得像脂肪，其他配料都沒有特別，無咩味道，牛肉比較韌，牛味不算重，有點難咬湯底是牛骨湯，整體上沒有驚喜，不覺得好好食，不過用料和份量都充足，很慷慨八折後只是$70，沒收加一，價錢實惠

3月29日星期一晚上六點幾七點入到去一枱客都無（已經感覺有啲伏），二個人叫咗兩個set，兩碗生牛肉河，春卷，雞翼。生牛河 負100分我習慣碗粉一嚟到就乜都唔落飲啖湯睇吓咩料，點知個湯底原全無味道！我仲以為自己中咗『武漢肺炎』無咗味覺添，飲杯水再食牛肉又un 又有雪味。。。咁都好啲仲有味覺春卷 50分啱啱炸起都無話唔好食嘅。。。雞翼 30分一上枱見到得五條骨『半隻雞中翼』。。。即係得兩隻半雞中翼味道勉強都係啱啱炸起總括嚟講一定會加BlackList！永不幫襯！跟著一路食一路睇返Openrice 以前啲食評。。。。。即係感覺係咪打手打既呢？又話好好味又話湯底好濃？真係R哂頭！定係已經轉咗手轉埋廚房？

之前呢個位置既餐廳都係食越南菜以前係上環返工都會係呢度食晏原來不經不覺已經轉左手不過都係做越南菜今次係放工之後超肚餓同RN係附近食晚飯呢度坐得舒服亦好夠光猛感覺好精神．我點左招牌火車頭湯河（$88）佢地叫自己做招牌的確無錯湯頭飲落清甜舒服而有濃郁牛肉湯味道顏色吸引之餘亦唔覺重味精河粉滑身同牛肉湯好夾好融合到份量亦好足料最出色係手打牛丸牛肉味濃得黎好彈牙食得出係高質貨不得不提係佢地同出面一般餐廳唔同加少少錢就可以試多好多款牛肉種類我地就決定樣樣都試下手切牛柳Tenderloin（加$5）牛肩胛Chunk（加$8）牛小排Short Rib (加$20）呢碗招牌火車頭湯河絕對係性價比十足飽肚之餘又可以食哂咁多款唔同部位既牛肉除左牛丸我最中意就係牛肩胛位

越式香辣肉醉飯+紅豆冰一直鍾情越南Pho, 但最近冇乜胃口，見到辣野就想試下。果然不負所望，肉醉非常足料，加上酸豆角又酸又辣特別醒胃。辣度同酸度剛剛好。唯一美中不足系加左10蚊要左杯好漏既紅豆冰，飲左一半就飲唔落去。

🍴晚市越式牛肉火鍋2 人用228 蚊🔥美國雪花牛小排 牛肉味香濃 口感比較軟林 牛展帶 d 筋肉既黏口感 牛味香 牛筋膜🐮應該係牛筋邊位 比較爽口軟林 牛肉味適中 🐂 美國牛肩胛 比較煙韌彈牙 少脂肪 係主要食口感 有 d 似皇帝菜 菜味濃既鵝帝菜 爽口既金菇 爽口既鮮冬菇🍄 新鮮既生菜🥬 爽口既 越南肥芽菜 越南河粉🍜河粉比較幼身 係透明嗰款 好爽口 盡吸牛湯底 夠哂入味 正👍🏻🍴香茅豬扒撈檬68 蚊🐷新鮮既蘿蔔絲 椰菜絲 葱花 芽菜🥬🥕 加埋爽口幼身既檬粉 😀加埋甜酸汁夠清新好味 可以邊食邊飲側邊熱辣辣既牛骨湯 牛骨湯 牛味濃 加番少少葱減少肥膩感 🐂夠哂 match另上既香茅豬扒煎得香脆 豬肉肥瘦適中 爽口帶 d肥膏🐷 上面鋪滿香茅 夠哂香 好味#火鍋 #牛肉 #撈檬 #豬扒 #香茅豬扒 #牛丸 #河粉 #冬菇 #金菇Score 平均分< 8/10>Taste 味道：👍🏻👍🏻👍🏻👍🏻Present 外觀：👍🏻👍🏻👍🏻👍🏻Decor&Hygiene 環境衞生：👍🏻👍🏻👍🏻👍🏻Value for $ 性價比：👍🏻👍🏻👍🏻👍🏻Service 服務：👍🏻👍🏻👍🏻~~

返工附近開左呢間越南菜，一直未有去試，終於有機會黎食下。叫左個套餐，有湯粉、小食加野飲，都幾抵食。雞絲扎肉河 $88雖然呢度既牛都出名，但估唔到雞都唔錯，肉質唔鞋幾嫩。湯底鮮甜，配上香菜，甚有越式風味。河粉夠滑，吸汁力強。越式春卷兩件相比起煙韌軟綿既紫米卷，我比較鐘意呢個炸脆既米紙外皮，甘荀絲同粉絲口感都唔錯。香茅雞翼 $20單骨雞翼食落都方便， 賣相呈金黃色相當吸引，口感外皮酥脆，肉質嫩滑夠惹味。蜂蜜龍眼冰 + $8清甜可口，減膩一流，重有粒粒龍眼肉食添。

疫情關係，好多餐廳都已經開始外賣生意，連火鍋也可以外賣，務求在家裏也可以食到高質的火鍋！今次這間餐廳是在上環，地點十分方便，而家冬天更推出了越式火鍋！火鍋種類算多，主打不同的牛肉部位我叫二人用的越式火鍋總共3大盒打開盒是這樣的，分別係越式湯底、蔬菜類和牛肉類，仲有越式河粉和香葉望落微不足道的湯底，但是這個湯底有濃濃的牛肉味，我們一開始已經忍不住喝了幾口！牛肉類分了上下兩層上層的是美國雪花牛小排和美國牛肩胛肉味濃，不會太薄，有咬口且滑，配上越南湯底，好似在家吃越南牛肉咁！下層有牛𦟌、牛丸、黃油牛腩、牛筋膜、牛白肉和洋蔥這個黑色盒十分深，入面其實有很多材料！左面是我把全部材料攤出來影的，迫爆盒蓋！平時火鍋的牛肉份量都不是太多，但係這次真係超出預期！而且係不同的牛部位，啱曬我！牛𦟌本身已經煮淋了，所以好易咬牛丸係手打，一咬落去就有牛肉汁爆出黎黃油牛腩雖然有啲肥，不過肉質真係好嫩蔬菜種類多，而且它有越式食品必備的大葱和芽菜，真係好有越式風味！！！最後我們把越式河粉煮熟，再加上附送的香葉、辣椒、葱和牛肉，一碗熱辣辣的越南河粉就完成了，為這次越式火鍋畫上完美的句號！

天氣又開始凍，放工心癢癢想打邊爐，去左公司附近叫左個打邊爐外賣set，相當有驚喜。二人越式牛肉火鍋 $228湯底是平時食越南河的湯底，老實說，我平時最喜歡就是喝這個湯的了！用來打邊爐十分盡興， 一邊打一邊偷喝！配料豐富， 有大量牛肉：牛丸、牛腩、牛展、牛肩胛等，連牛筋膜都有，牛腩、牛展等肉類已熟， 心急人士可先從兩者入手，輕輕煮熱即可吃，牛腩炆得軟淋，很好吃；牛筋膜爽口煙韌，家父十分滿意。另有蔬菜拼盤：生菜、金菇、冬菇、芽菜等最後還有填肚的河粉。

火鍋控嘅我好想十下十下～～但喺要買餸有時好煩🤪 ，而且又好想試啲特色啲嘅🤔全港獨有🌟🌟越式牛肉🥩火鍋～就真係要試吓！🤩 因為無堂食，就轉左外賣。牛骨湯牛筋膜湯底美國雪花牛小排美國牛肩胛黃油牛腩牛展手打牛丸各式時蔬及菇越式配料湯底真係一純👍🏻 非常香濃， 牛筋膜份量好多，食落口感Q彈，帶點嚼勁。牛小排及牛肩脾肉油脂豐富，肉質細緻，口感細膩香滑。 牛腩及牛展已炆過，所以份外軟腍，仍保留濃郁牛肉味。手打手丸香口彈牙，非常惹味。 時蔬種類都幾多。

中國人傳統冬大過年，疫情下取消大家庭聚餐，和先生在家打邊爐，同樣溫馨。冬至正日，下班來到公司附近的一牛越南粉專門店，購買火鍋套餐，輕鬆方便，就準備好過節的晚飯。店員介紹，火鍋套餐分為兩種， 一是即晚食用的越式牛肉火鍋，另一種是所有牛肉配料，湯包也真空密封， 方便隨時享用的外賣湯底鍋。我選擇即晚食用的越式牛肉火鍋，店員一下子就全部打包好。二人用越式牛肉火鍋 $228回家打開包裝，想不到配料非常豐富， 包括有：牛腩，牛展，牛筋膜，牛小排， 牛肩胛，手打牛丸，冬菇，生菜，金菇，芽菜等等... 好足料！牛骨湯牛筋膜湯底湯底回家還是熱的，倒進鍋中，牛筋膜的數量令人驚喜，一片片炆得極為軟淋的牛筋膜入口即溶， 湯底牛味濃厚， 鮮甜滋潤。牛腩肥瘦適中，炆得軟淋而且啖啖肉， 沾上醬汁同食，更為美味。牛展筋肉分明，炆得同樣軟淋，比牛腩更有口感。打邊爐尾段，放入平平無奇的河粉和青菜，竟然意想不到的美味，河粉與青菜吸收牛肉湯的精髓後， 昇華到另一種層次。

🐮牛魔王會喜歡的方便嘅外賣火鍋set🐮～～～最近夜晚冇得出去食 但係天氣又好凍 我同大舊又好想食火鍋 同時我哋兩個又好懶 懶得去買野返屋企慢慢打 所以就去咗屋企附近呢一間越南餐廳 買外賣越式牛肉火鍋返屋企食～～～呢間嘢係屋企附近開咗有一段時間 之前都未食過 難得見佢有火鍋就過嚟試一試 ～～～佢哋有一人用嘅餐 亦有兩人用嘅餐 我哋就叫咗兩人份嘅 裏面包括有牛腩 牛展 牛筋膜 牛白肉 美國牛肩 美國雪花牛小排 手打牛丸 菜 金菇 冬菇 生菜 芽菜同越南河粉 非常豐富 有肉 有菜 有澱粉 兩個人完全夠食 而且牛魔王見到真係心心眼😆～～～我哋最後仲食唔晒 留返啲第二日自己再攞嚟煮麵食 如果你係超級大食嘅話 覺得唔夠 仲可以額外追加～～～味道方面整體質素都唔錯 牛肉嘅顏色幾紅 味道食落去都幾鮮 牛丸咬落去bit汁 最緊要係真係好方便 佢哋俾晒所有嘅野你 食物配搭亦都幾均衡 而且有埋湯底 對於我哋呢啲懶人來講真係好方便😛唔錯～～～推薦度：🔥🔥🔥🔥🔥🔥🔥一牛越南粉專門店 (上環)上環文咸東街49號地舖