鏞記酒家

Open Now

Now Closed

久違了的舊同學飯聚，約咗幾次終於齊人，過年時已經book定鏞記嘅位。餐廳裝橫當然係中式設計，係一樓色調清雅唔沉默，枱同枱之間有足夠距離，感覺雅致舒適。一場來到，當然要試炭燒黑鬃鵝～鵝皮唔算非常脆身，但鵝肉好滑，中間有啲鵝油，勁香口！至尊炭燒肥燶叉賣相已經好得，叉燒肥瘦適中，入口肉質鬆化，好好味。反而松花皮蛋配酸薑就未必啱我口味，但有朋友鍾意，都好快清碟。桂花蟹肉炒津絲食得出係新鮮蟹肉，咬落有鮮味都唔會好散，係好有誠意嘅製作。職員服務態度唔錯，加茶同上菜都很快，有問題亦都會詳盡解答。整體好滿意，相信無論係同朋友、長輩定客戶嚟食飯都絕不失禮！ 

兩星期前已訂好枱同屋企人去中環鏞記酒家食飯，難得夠多人，叫咗個一品鵝煲，有齊鵝紅、鵝腸、鵝肝、鵝腎、鵝頸、鵝翼、鵝掌等等，肥瘦俱全，滷水非常濃郁，超級好味！禮雲子蒸蛋白配白飯一流；琵琶鵝係工夫菜，工序繁複，大廚整得好，鵝皮薄又香脆，肉嫰汁香，最後道麻婆豆腐米，將麻婆豆腐醬混入炸好嘅米粉度，食落幼滑帶微辣，味道出乎意料地好😋😋新年食好西，一年好開始

乳豬好脆，招牌燒鵝十分肥美，三個人好快食晒，仲有好少餐廳有嘅順德大良炒鮮奶，總體嚟講，值得encore，會推薦俾身邊朋友相比於裝修前，覺得價錢好似加咗啲，但依家茶記都加幾成價，想食優質粵菜，鏞記仍然係唔錯嘅選擇 

對上一次食鏞記已經係十幾年前，味道都已經無晒印象，今次公司年尾聚餐，老細話食當然好啦。中午時間已經多人，幾乎枱枱都有客，我哋點咗叉鵝雙拼，味道好但份量略少燒鵝絲春卷要中午先有，味道好特別，值得一試桂花蟹肉炒津絲食到鮮拆蟹肉，肉質都好鮮嫩鵝脂炒通菜其實我食唔出有鵝味，但味道的確係唔錯的

鏞記以炭燒燒鵝馳名，歲晚光顧，燒鵝係必食，亦都無令我失望，皮薄肉質嫩，淋上嘅湯汁係獨家調配，有鵝油同花生香味，如果鍾意口味濃烈嘅燒鵝，就唔以錯過呢間！除咗燒鵝，叉燒亦都好味，外皮些少脆，點心同飯食同樣出色，生牛肉炒飯飯粒分明、鹹度適宜。記得半年前嚟唔使等太耐就有位，但可能年新年多咗聚會，見到都坐到滿晒，如果近期想食建議提前訂位，服務ok，態度算係親切有禮。

鏞記價位唔算平，但真係一分錢一分貨，食材新鮮品質上乘，而且服務態度喺本地酒家當中絕對算係好。下次帶埋屋企人再嚟食，建議提早訂定位，過年期間可能會好多人，強烈推薦南乳香酥小排骨，送飯一流

近排天氣凍冰冰，係時候食個一品鵝煲暖吓。朋友一再提我鵝煲需時準備，打電話去鏞記訂位時一定要訂埋，否則會失之交臂。等到鵝煲一上枱，真係不得了，由鵝頭、鵝頸、鵝肉、鵝肝、鵝翼、鵝掌、鵝腸到鵝紅，真係足料到就嚟滿瀉，啲滷水夠晒味，我最鍾意鵝紅，鮮香味濃又夠嫩滑，最快俾大家搶晒。鵝肉汁混埋滷水，用嚟送飯都一流。其他菜式相比鵝煲無咁吸睛，係記得份叉燒併油雞都相當受歡迎，值得下次再試。環境: 舒適，裝修有味道服務: 十分好，侍應全程好笑容

五柳炸蝦球好大隻，肉質緊實到咬落去都有微微阻力，但又有彈牙嘅感覺，五柳汁唔係單純嘅酸味，甜度同濃稠度都調校得啱啱好，有警喜！大蝦雖先油炸過，但火候控制OK，一D都唔油膩，比另一間港島名店好食得多！清湯牛爽腩算係鏞記名物，果然湯清得嚟味道鮮甜。牛腩選精挑咗最靚嘅腩角，連筋帶膜，口感正。一碗牛爽腩價錢真係唔平，但選材叫對得住個價，而且唔係成日有，值得一試。環境：裝潢行新中式風，宴會或家庭聚餐都係唔錯選擇；服務：不過不失，可以接受 。食物質素：價錢略高，但一分錢一分貨

銀川玉蘭炒臘味，即系芥蘭炒臘味。芥蘭正係當造，新鮮爽口，內芯清甜。臘味有臘肉、臘腸，以前超級討厭食臘腸，後來人老咯......口味都改變曬，由討厭變成鍾意。講翻鏞記嘅臘味，肥瘦適中，臘肉的肥肉晶瑩剔透，入口不覺肥膩。粵式鹵汁鵝掌翼，鵝掌肥大肉厚，師傅烹飪時間拿捏得很好，唔會太硬或者太軟，恰到好處。鹵水味滲透到每一隻腳趾，食落骨膠原爆棚 

鏞記的滿足（五小碟）皮蛋酸薑清湯爽腩 ： 雖然肉質不及大埔群記、湯頭始終九記，水記粉絲絕對有偏見，但亦不遜色薑蔥豬心蒂： 取自豬心血管頂上的一小部份，類似黃喉，好簡單的調味，但真正難忘的菜式蝦子紥蹄香酥鵝碎窩： 其中一道隱藏菜式，唔知以為可能是一道湯，其實佢係燒 鵝頸片皮去油，一隻🦢一隻頸，要儲出嚟，配上茅台佐酒，人生如此多<FUN>炭燒家鄉鵝姑： 只用上大概100天才出鵝攔的處女鵝，肉質不會過肥也不會過瘦，7:3 比例， 再用上鏞記炭燒「皺皮鵝」做法，皮酥肉嫩，再加上金針貓耳，唔需要額外沾梅醬已經係「太監騎馬 」崧子煙燻雲霧肉： 據碧雲講解，用上陳年普洱清洗豬肉，之後用上普洱菊花等煙燻出來，入口馬上溶化，不會油膩，食完即刻同膽固醇講拜拜禮雲子蛋清： 另一道傳統主角，禮雲子即過去大灣區和珠三角鹹淡水交界濕地盛產的蟛蜞仔之春，那麼細小，該用上多少隻？人手用上多長時間才能得到充分蟹膏來做菜？呢道菜令全晚的菜色推上另一個高潮點，絕對係畫龍點睛之選，細心地配上一口飯讓你拌飯食用，簡直高潮疊起一品鵝煲： 之前已經介紹過，不能不叫，最後用上生麵伴鵝汁真係齒頰留香

大裝修後第一次嚟鏞記，一樓比以前靚咗，完全無舊式酒樓果種頹味。六個人點咗半隻燒鵝，叉燒，乳豬同松子雲霧燻香肉，基本係上枱一陣盤盤清，每一道菜嘅味道恰到好處，松子雲霧燻香肉色澤好靚，浸肥肉可以話入口即溶，腩肉有好香燻木味，濃厚而唔鹹。不過我最鍾意邪惡嘅燒乳豬，表皮層暗紅色好誘人，放入口極脆又香，成枱人都讚不絕口。服務OK，環境佳，價錢略貴，但以質素計值得一試。

去得鏞記當然要叫燒鵝，燒鵝例牌上枱時屋企個食肉獸即刻眼前一亮，因為本身色澤好誘人，未食已經充滿期待！一啖咬落去，燒鵝皮只有微脆但好香油脂味，最重要唔多肥膏，稱得上係肥而不膩，其實我都幾鍾意肥膏，夠香口，但始終唔太健康，呢次啱啱好，鵝肉都香嫩唔鞋口！桂花蟹肉素翅，芽菜肥又飽滿，食起來有甜味而且脆，桂花其實即係碎炒嘅蛋花，加埋蟹肉、粉絲，大廚火候掌握得恰到好處！!這道菜十分推薦！仲有道蝦籽茭白炒花膠都唔錯，骨膠原豐富兼惹味，女士一定要試

鏞記裝修後第一次嚟，講真又幾鍾意個新裝修，保留咗啲舊元素但整體執靚咗好多，有新中式嘅味道。入得鏞記當然要點招牌燒鵝，呢間製法同坊間略有不同，燒鵝唔係脆皮，但話晒係炭爐燒，仍然好香炭火味，肉質好嫩，配上特製醬汁，唇齒留香。鹵汁鵝掌翼鹵得非常入味，咸香十足；南乳溫公十全齋雖然係素，但材料多又吸晒味，味道厚重好味過食肉；佛山汾酒鹵燻蹄同淮揚菜系嘅水晶肴蹄有異曲同工之妙，鏞記嘅汾酒鹵燻蹄做得唔錯，微微酒香又唔會掩蓋肉嘅味道。

太座對鏞記清湯腩情有獨鍾，每年生日都要陪佢到鏞記一行。份清湯爽腩選用繃紗腩，即係有筋膜夾住一層瘦肉嘅腩邊，好似每隻牛只有一小塊，筋膜口感爽滑，瘦肉都唔柴，最緊要個湯頭用足料，望落清淡但實質上味道濃厚鮮香。要講缺點，相比價錢份量有點少，不過太座滿意最重要。

阿媽話想食粵菜，取後決定去鏞記。點咗一份例牌燒鵝，本身賣相唔錯，食落外焦裡嫩，搭配醬汁恰到好處，洗去咗啲油膩感，食完仲有空間試其他菜式。我最鍾意份蜜針金錢雞，用鵝膶、肥豬肉、馬蹄片疊埋一齊，好似燒叉燒咁加蜜糖燒到肉邊輕微焦黑，肥豬肉明亮通透，一啖咬落去香味四濺,可惜膽固醇過高唔敢多食。阿妹出奇地最欣賞份手剁吊片蒸肉餅，外表平平無奇嘅家常菜，勝在食材好又夠惹味。媽媽鍾意蝦籽紮蹄，話已經無咩餐廳仲會整呢啲手工菜，而且鏞記應該有精心選料，腐皮有豆香，蝦籽亦有鮮味十足，整體相當不錯。