品川日本料理 (已結業)

咁岩黎行過個新商場，好多野都未開，但唯獨見到一兩間餐廳，見到呢間放題都好似幾正咁，就入去試下🙊可能初初新開，未算好多人，但係就食得好舒服，最緊要唔洗同人逼，環境乾淨又企理😆😆佢仲有D房位私隱度幾高，成個裝修都係勁日式木系食物款式都算多，基本既刺身同壽司都有齊，而且落幾多件就黎足咁多件，冇走盞都算幾好❤刺身都好新鮮，色水唔錯，食落好夠凍，唔知係咪都唔算多人所以上菜速度好快，收碟都好爽手，唔洗等😄而佢呢到火炙壽司同沙律既種類感覺好似比出面既放題多，有D平時冇得食既都係呢到搵到😆而且呢到竟然有生蠔同海膽，不過要另外加錢單點的，好好味，堅正堅開心❤總括黎講呢到水準都算唔錯，而且人唔多可以要求坐出面睇景，咁岩呢幾日就算有風都唔算太凍，望住個景好Chill~😆

個account開佐超過10年都無用過，今次真係忍唔住，差到一定要寫。食物種類少、選擇唔多、上菜慢。刺身方面不論係甜蝦、虎蝦、吞拿魚、帶子，全部都係無味，得馬刀背係有丁點鮮味，其它如果你咪埋眼食根本唔會知自己食緊邊款，因為全部都係無味。前菜啲芝麻八爪魚、螺肉醬多過乜，好似食緊開唔暈嘅生粉水咁。串燒如燒菠蘿、牛舌、蝦、蕃薯仔全部都只係微暖，但明明等佐好耐。甜品竟然無雪糕，得啲唔知咩嘅蛋糕仔。野飲最基本嘅可樂百事都無，得樂天嘅野飲同埋怪味好似荔枝烏龍茶，來自唔知台灣定大陸，結果我一罐都無飲過，齋飲佢地嘅熱茶。最嬲嘅係個軟殼蟹手卷，落佐3次單，追佐5次單搵佐3個唔同嘅人追單，到最後竟然同我講原來今日無，如果有認真幫我追第一次就知係無貨啦，追到第5次要人發脾氣先至話無，即係之前都係hea我啦。唯一可取係炸物，係即炸熱辣辣，但都係無乜味。價錢又唔係平，而家新開張有八八拆每人都要$262.5，衰過爭先嘅質素。今日第一日開張有啲甩漏係正常，但食物質素差、員工hea你就真係接受唔到，周圍都聽到有人追單同話送錯野。無回頭一次就夠