喜滿樓菜館

营业中

休息中

同啲朋友相約晚飯，嚟到喜滿樓，點知⋯⋯第一次嚟，亦係最後一次！冇驚喜之餘，仲要食到一肚火！環境一般，普通茶記咁，已經點左唔少餸，但係每過15分鐘，就會有侍應問要唔要加餸，如果真係唔夠嘅話我哋會加，問題係唔需要，已經夠晒食，多次表示唔需要再加餸喇，仲要問完又問，真系認真煩！係覺得我哋點嘅餸太少，定係想趕客走呢？而且啲食物出品好一般，啲價錢又貴，服務態度又唔好，咩好嘅心情都畀佢掃晒興，絕對唔會再有下一次幫襯！

//䬻行飯// 天氣不似預期，但要走總要飛👋🏿身邊同事要移民啦，臨走總要懷緬下港式茶記小炒風味🥹係我中學Canteen 就有試過芝麻雞，相當出名，估唔到香港有餐廳做😎🥑芝麻雞$188/半隻❗️推薦❗️對於我黎講無特別驚喜，因為以前試過。其實皮係幾脆，配上芝麻香，雞醃製過好有味😉🥑風沙脆鱔球$158 ❗️推薦❗️有啲似係避風塘風味，有好微微既辣，炸粉超級薄脆，帶皮白鱔啖啖肉，爽口彈牙，非常新鮮👍🥑椒鹽鮮魷$108算係正常發揮，炸粉超級薄脆。🥑花甲蒸水蛋❗️推薦❗️火候啱啱好，水蛋超級嫩滑，唔好以為好少花甲，好多沉係底，真係好足料！花甲都好新鮮😛🥑乾炒牛河 唔油膩既炒牛河，入味有鍋氣🥑蒜蓉炒豆苗$98正常水準，無特別驚艷🍁整體🍁🥑性價比：7/10🥑美味：7/10🥑環境：6/10🥑回頭：7/10🥑人均：$200-300📍 喜滿樓菜館 (土瓜灣)土瓜灣安徽街2號地舖🧡𝑳𝒊𝒌𝒆 & 𝒇𝒐𝒍𝒍𝒐𝒘 𝒎𝒚 𝑰𝑮 @annasan.cat

我哋呢個六人組合已經一段時間冇見了！朋友一向識飲識食，相約土瓜灣呢間風味小館，真係冇介紹錯！無見一排，趁機會分別公佈咗三個好消息，哈哈！真係可喜可賀！😆🎊🎉* 靚湯和以下海鮮要先預訂：- 杏汁豬肺雞腳湯- 黑椒肉蟹2 只- 豉油王蝦10只- 花甲豉椒炒煎米粉底另外再叫：- 招牌芝麻雞半隻- 椒鹽魷魚- 椒鹽白飯魚奶白色杏汁湯底滑溜滋潤足料又清甜👍大蝦和黑椒大肉蟹都惹味夠鑊氣啖啖肉！！花甲煎米粉底個汁好味到不得了，撈米粉一流！仲有個脆皮芝麻雞又係鹹香惹味冇得輸👍最後都忍唔住嗌多個椒鹽魷魚和白飯魚，一樣好好味，傾偈餸酒真係一流！以上咁多小菜靚湯兼海鮮，每人平均四百鬆啲！咁嘅水準真係要讚👍

前日朋友提議到高山道附近喜滿樓菜館食生日飯，來到這裏果然有料到。看到餐牌，有好多款式的小菜，也有懷舊小菜。我哋點了招牌菜芝麻雞、梅子荔芋鴨、煎墨魚餅，鹹魚茸炒白菜仔、芥末虎蝦球同黃金鮮魷。對於最鍾意食雞鴨鵝嘅我，個芝麻雞同梅子鴨真係有料到，其他地方未食過。雞肉很嫩滑芝麻沾滿全隻雞，雞味適中，又香又脆皮。梅子荔芋鴨係懷舊菜，梅子汁夠酸甜，食落唔會油膩，開胃好味。呢度仲有其他雞選擇，有大漠風沙雞、脆皮炸子雞，下次再嚟試下。

早幾日約埋班老友係我公司附近小店喜滿樓食個晚飯。之前見呢間喜滿樓有咁多人讚，都幫襯下。我地叫了一個炒飯，幾個小菜。黑松露叉燒粒炒飯，炒得粒粒分明，黑松露好香。鮮菠蘿脆皮咕嚕肉，酸酸甜甜好開胃，我最怕太肥咕嚕肉，呢度咕嚕肉肥瘦適中。味菜炒鮮魷，呢個菜炒得好惹味，鮮魷好彈牙。呢度成日推出新菜式，樓面哥哥介紹左一個新菜叫星洲酸辣骨，個醬汁似茄汁加辣，加埋洋蔥好香口惹味，這個新菜才98元大大碟，我一向都鍾意幫襯小店，通常比我滿足的驚喜。

🤤土瓜灣高手小菜🤤-土瓜灣既喱間小菜館，裝修偏街坊，但出品全部都好有鑊氣，絕對用心之作，如果同屋企人食飯啊、同朋友一大班人聚會都好適合！老闆老闆娘都好細心，落單會提醒返份量，如果人多仲有得加大份量，掂！不過去之前記得訂位，因為好多特色野都要預訂先有🤩，加上佢晚市超爆場架！秘製芝麻雞($188)黎食記得要預訂！芝麻雞真係冇係第二到見到過😏，望落雞既外層裹滿白芝麻粒，食落外皮係乾身帶少少脆，但雞肉好嫩有汁，沾埋日式芝麻醬食好特別！原隻菠蘿脆皮咕嚕肉($248/小)有成隻菠蘿做底，賣相係一流，咕嚕肉炸得夠脆，食落有肥有瘦所以好香，加上鮮既菠蘿肉既果香係罐頭冇得比既，都貴得值得😎。鮮花甲蒸滑蛋($162)喱個都係好多人點既餸之一，如果人少啲可以揀例牌，份量會細啲不過價錢就$108抵食☺️。食落花甲味好重，連蛋都充滿曬海鮮味，佢個蒸蛋唔係偏水狀好滑個種，而係好似布甸質地，挺身啲既。蜜椒脆鱔球($148)蜜椒通常都係夾牛柳粒，喱到竟然有得用落鱔球到😂，外層薄薄一層脆皮，食落蜜汁味好重偏甜口，特別但唔算太夾，食返風沙/椒鹽口味應該會更好食😝。

入門前喺門口已經覺得環境麻麻，普通酒家都唔似，真係一間茶餐廳咁，不過已經訂咗檯，就照舊入座，之後安排坐最入，電話都收得好弱，先叫芝麻雞，芝麻係痴得幾均勻，不過鹽就唔係，大半隻無味，一係就好咸。之後畀多次機會，叫咗風沙鱔，呢味就鱔無鱔味，炸咗咩魚都無乜分別，之後就走，唔想再試，，味道普通，咁嘅環境，好多選擇。最終都無畀過9折，原來好多嘢食都係無折，仲有網上訂座係要早一日再打去先計，否則會當你自己取消訂座

呢間係土瓜灣特色手工中菜館，有好多款小炒，睇到餐牌唔知點什麼。樓面哥哥有禮貌客氣介紹幾個招牌熱門菜式。最出色招牌就係芝麻雞，雞皮掛滿芝麻雞，香脆味鮮香口，皮薄肉嫩有肉汁，芝麻香氣十足，送上一碟芝麻醬更加豐富味蕾。深井有燒鵝、沙田有乳鴿、益新有琵琶鴨、呢度有芝麻雞，值得一試。另一個推介蜜椒鱔球鱔球切得夠厚身，炸得好脆口，有一陣薄薄嘅蜜糖面，咬落去後係仍然保持肉汁嘅鱔肉，鱔肉亦十分彈牙，加上微微嘅黑胡椒粒，口感層次豐富，最正係鱔球已去骨，功夫心機出齊。仲叫了其他鑊氣小炒有椒鹽鮮魷用新鮮鮮魷、孜然腰果牛柳粒夠惹味、黃金蝦球、咸魚煎肉餅，唔詳細講了，樣樣都好食，甚有驚喜。

朋友飯聚想去土瓜灣食晚飯，但正式中菜館既餐廳唔多，選擇呢間餐廳有人氣小店既感覺，分開樓下同樓上，樓高兩層樓上有圓檯選擇多。今次一行4人叫左6個菜: 小炒王材料十足最喜歡魷魚鬚同香脆腰果。黑松露炒蝦球黑松露味濃香脆可口 。酥炸生蠔比較香口夠薄皮。風沙雞夠惹味，跟芝麻雞一樣出色必叫，雞面灑上炸蒜粒同原隻辣椒，色香味俱全。黃瓜涼瓜唔會苦，甘香鬆脆，夠哂熱氣。最後叫星洲酸辣骨，個醬汁唔太辣少少酸，醒神開胄反而洋蔥仲好味。整體都滿意，服務及食物都可以。

國慶假期同朋友去土瓜灣喜滿樓食飯，地鐵站附近幾方便。我哋分別叫芝麻雞、芥末沙拉虎蝦、黑松露蝦多士、椒鹽軟殼蟹、上湯鮮墨魚滑浸油麥菜。整體味道出品好，翻食機會大。招牌芝麻雞 - 果然係招牌菜，皮香脆肉鮮嫩，原來雞都可以黏上芝麻，再黏上芝麻醬有入口即溶的味道。芥末沙拉虎蝦 -有食沙律蝦的味道，芥末有少少攻鼻，食落過癮。黑松露蝦多士 - 以為黑松露同蝦膠混在一起，原來係放係上面，裡面仲有原隻鮮蝦。黑松露、蝦膠、鮮蝦肉同多士一齊咬，舌尖大享受。椒鹽軟殻蟹 -香口惹味，大碟有8件，蟹味鮮甜，加上椒鹽好惹味。上湯墨魚滑浸菜心- 墨魚滑吸哂上湯又夠彈牙，用墨魚滑浸菜都幾特別。

又貴又唔好食，個招牌芝麻雞$188/半隻，外皮沾滿白芝麻拎去炸，再比碟芝麻醬你點，完全唔明白點樣可以收呢個價。個皇牌椒鹽軟殼蟹$128，乾爭爭，淨係得個鹹字，數埋唔知有無3隻蟹，我夠膽話元氣都整得好食過佢。薑蔥蠔煲$178，啲蠔上晒粉去炸，根本就好普通，數埋得6定7隻蠔，去海悅廣場間囍宴食好過，又平啲又好食啲，起碼啲粉無咁多先啦。最後個黑松靈墨魚餅係幾好食嘅，$148/6件，一支藍妹都要$35，埋單先知無得碌卡，得咩支付寶、微信支付同八達通，但樣樣菜式都3位數，好彩八達通消費券未搣完啫。總結，直升機店，對象應該係區外慕名而來人士，同豪華餅家一樣，街坊自己睇路。補充，間食店好細，冷氣又唔夠，見啲姐姐係咁捧餐出去，應該有隔離或樓上偏廳。衛生方面：普通茶記嗰啲情況，無乜特別。服務方面：招呼就無乜，因為太忙，又送餐出去，又執外賣，又多人入嚟要安排座位等等，但整體態度唔算太差，但亦絕稱不上親切，例如無得碌卡，老板娘都只係神情冷漠咁望住我，話晒得2個人都食咗$700+，酒樓都會講多謝晒，呢度係無嘅，我諗張單唔夠大，同佢哋真係太忙，宣傳太成功啦。

又係外賣自取時間， 住土瓜灣都幾年都未試過e 間野， 試一試。落單， 一陣有人打後， 問要飯 or 湯， 又會話比你聽要大約幾耐到有， 好好。叫左四個送， 芥末沙拉骨， 黃金脆鮮魷， 西檸雞， 紅燒豆腐煲。芥末沙拉骨，出面少叫D， 因為怕芥末味重。 本身係有 ， 但唔會話重手/ 大味， 有D 的接受到。黃金鮮魷， e 個正， 一咬咸蛋黃味， 入面魷魚係好爽。西檸雞， 可能我外賣帶返屋企都要時間， 有汁又有炸粉 ， 耐左都係會痴埋一舊舊街。 味道ok.最後係紅燒豆腐煲， 底係菜， 其他都係肉，要叫個菜先得， D 汁黎撈飯所以今次都滿意嘅。

其實呢間已經係vip經常同雷哥去食嘅地唔係環境吸引而係因為 食物質素非常之高質話說雷哥個朋友生日我哋就整咗條靚嘅紅瓜子（魚）肉質鮮嫩 飽滿又滑： 再加上 餐廳 整得超好食蒸魚豉油淋落去嗰下味道啱啱好魚肉吸收曬 鮮甜 豉油嘅味道再加上魚既肉質啱啱好, 唔會過火 食出真嘅味道再加上整咗個 果子鴨 味道出眾酸甜再配上芋頭作精心配菜, 淡芋頭香, 啖啖鴨香口感超驚喜。生日更加要買啲特別嘅整咗條油鎚, 呢間餐廳完全可以整到一啲都唔腥肉質飽滿： 爆香咗嘅汁醬 味道完全爆炒曬滲曬入去肉入面真係冇得彈！仲有我覺得好驚喜嘅 黑椒炒蟹！肉質非常嫩滑啖啖肉！ 絕對好食過馬來西亞！胡椒唔會太刺激, 爆炒嘅肉汁滲曬入啲蟹肉度絕對可以食多幾碗飯！仲有最後 絕對唔會令人失望 辣椒鹽瀨尿蝦呢個絕對係王牌 去親一定要食超多肉超滑, 食完永生難忘！一定返焯絕對夠膽講好過三聖海鮮飯店鮮香味齊曬！。

這間位於土瓜灣的喜滿樓菜館，擁有街坊的格局和價錢及大排檔的火候，是我幫襯了幾次的食飯好地方。他們的招牌菜芝麻雞，是我每次都會點的。每次都不會令我失望。是我的首選推介。他們還有必食的推介，每次我都會品嚐幾個。今次選擇了蜜椒脆鱔球鬆脆香口，甜甜地好滋味。見到隔籬枱蒸左條魚，心郁郁，但老細話條斑要預訂，而家剩返倉魚。都照殺，用嚟炆涼瓜。其實都入味的。只係如果可以食到鮮甜嘅蒸魚會更好🤪。想食嘅話訂位時就要預訂啦！另外都叫咗三隻蒸蟶子，蒜蓉粉絲係惹味的，但蟶子有些偏熟我有些少沙。環境雖然沒有華麗嘅裝修，但舒服企理，加埋貼心嘅服務。 誠意推薦俾大家！

有返夜晚堂食真開心，可以唔洗再買外賣返屋企食😄老公上網睇到條片係介紹土瓜灣呢間 收工即刻去試啦！其實我地冇book枱，不過去到嘗早5:30pm，店員話好多book咗枱，不過客人多數book7:00,所以都可以比枱我地👍餐牌真係好多小菜仲有海鮮選擇， 我哋試咗最出名芝麻雞🐔點了半隻，另外蒜蓉蒸聖子，仲有蜜椒薯角牛柳😋另外哩度原來係送例湯同白飯架，客人 點多少餸，菜館都會送比你食😊個例湯仲係老火湯，完全不是味精湯，太好飲我仲飲咗2碗添🤣個芝麻雞味道真係好食到不得了🤩雞肉嫩滑 外皮滿滿芝麻又炸到好薄脆香口，完全唔油腻，再沾上秘製芝麻醬好好食🤤蜜椒薯角牛柳味道好特别，甜甜薯仔，牛柳粒夠軟嫩😋仲有海鮮每日新鮮到，size每次都唔同，但如果人多就要預早訂定，我地點了2隻蟶子唔多😂所以都有得食總括嚟講回頭指數很高👍👍入到嚟食好有街坊feel好親切😍呢度賣點係食得健康少鹽少油少味精食得更健康💯