地道館車仔麵

营业中

休息中

第二次去重光弁當都買唔到，落返去對面就有間黃店！門口同店內都有文宣，仲請學生食飯添，好有良心！必食豬手($32)炆得好軟滑，亦非常之香！凍咗之後，醬汁變晒啫喱狀，成碟豬手超多膠質，抵食又養顏。車仔麵($37)叫咗菜心底，咁就唔怕熱量爆標啦！薑汁豬潤(+$2)好爽口，但仍然保留沙沙地嘅口感，唔會醃到唔知自己食緊咩。冬菇同豬紅都好入味！鍾意食車仔麵嘅話一定要去支持下!尤其是係個豬手 ,叫得必食真係貨真價實

今日落新蒲崗做嘢，同老婆去咗幫襯呢間車仔麵店。以前都係新蒲崗附近返過一排工，呢間車仔麵店都係我lunch經常去嘅飯堂之一。好，唔講咁多，即刻睇睇有咩食。第一碗係粗麵，冬菇牛腩豬肚。呢間嘅冬菇係特別入味，質感唔錯。牛腩腍滑，口感極佳。豬肚都好入味，預先撈咗麻辣味，正！第二碗係豬膶雞翼蝦條油麵。豬膶厚身嫩滑，睇圖就知有幾大塊！雞翼整得好入味，可惜得兩隻，唔夠喉！蝦條係自家製，必定要試！最後加咗碟油菜，腩汁生菜！

💛💛💛黃店推介💛💛💛今日喺新蒲崗返工，經過呢個地道館車仔麵，見到門面同入面都貼咗啲文宣，就入咗去試吓佢嘅麵啦！同其他車仔麵差唔多，佢都係有好多餸比大家揀，標準嘅一個餐就係$37，有三餸一麵，大家都可以加錢揀多啲餸咖。我試咗朋友介紹嘅咖哩魷魚（+$2），柱侯牛腩（+$1)同冬菇（唔洗加錢），湯底揀咗腩汁，而麵底揀咗油麵，總共係$40。等一分鐘左右，個麵就送咗上黎啦～咦，原來佢仲會搭多兩條生菜比我，好彩冇揀ＸＤ牛腩好好食，煮到十分淋身，而且好入味；咖哩魷魚都好正，煙煙韌韌；冬菇都係非常入味，好甜好好食。一定要再黎食～

如果一間車仔麵店既麵做得出色，我真心建議你哋唔好做其他...我食左碟豬手飯，真心覺得碟飯係隔咗幾夜再翻焗而唔加少少水咁去焗....又硬又乾....豬手唔夠淋，味道一般，跟餐包熱飲一杯，叫左熱奶茶，廿四味既味道第一次飲...我不嬲飲開都唔落糖，呢杯野我堅當係飲涼茶咁飲曬！

💛💛💛💛💛💛💛新蒲崗有好多黃店 每日可以去唔同地方食，今日就介紹 地道館。其實地道館已經光臨過幾次，今次先記得影相出post! 自己都唔係盲撐，呢度車仔麵係非常之高質，價錢又係貴，基本3餸車仔麵麵只係$38，秘製辣醬麵唔洗加錢。食物選擇都幾多款，而且款款都新鮮，每次都叫墨魚丸，粒粒墨魚肉，夠哂彈牙；仲有牛腩，夠淋身。湯底更不在話下，鮮味又不含味精！瑞士汁雞翼好入味最緊要都係支持同路人！💛💛💛💛💛💛💛💛💛

車仔麵舖夜晚9:30就截單，有幸喺截單前趕到。環境舖內卡位比較多，整體感覺乾淨企理。最正的是電視機沒有播CCTVB！食物食車仔麵一定要有蘿蔔，就叫咗碗腩汁三餸麵，蘿蔔、牛展、貢丸配幼麵。可能係最後一碗，廚房加多左四粒魚蛋俾我。先講講湯底腩汁，味道還可以，不會過鹹。麵底方面，口感未夠爽口彈牙，適合啲鍾意食比較黏少少的人。餸方面，蘿蔔煮得非常透，很入味。牛展味道一般。貢丸魚蛋正常。三餸麵只需$37，性價比算高。

聽講呢間係黃店，當然要過黎支持下！夜晚7點幾左右到，超超超多人，排左陣隊，好彩D人食得快走得快。我叫左三個餸，包括墨丸，唐生菜，牛𦟌，米粉底，加腩汁。份量唔算太大，岩岩好食得飽，不過真係等左超超超耐，起碼二十分鐘以上，而且D餸唔係太熱，可能真係太多客，煮唔切。味道都還好，墨丸幾有口感，食到粒粒墨魚肉，唐生菜就正正常常，牛𦟌醃得幾有味，不過炆得唔夠淋，韌左少少。湯底味道都唔錯，唔重味精。整體黎講間野都算okay，不過如果想維持咁多客人既話，靠黃店呢個生招牌真係唔夠，要比多D心機係食物質素方面，加油！

依家車仔麵質素不一，好多時候都得好少料同味道一般。呢間味道不錯，點了牛百葉、牛腩、豬皮，豬皮略咸但可以接受，牛腩入味，百葉份量多過你去飲茶叫一籠。中午時分來都好多人食，又一證明是街坊都認可的車仔麵。

咁岩出新蒲崗做野 做完野見肚餓就隨意在附近搵左間車仔麵來食 無刻意做功課 就出事啦因為只係想填下肚 見佢tea time 2餸車仔麵連野飲$32 就畫左秘製鳳爪蘿蔔粗麵 要秘製汁（辣）飲熱檸水要左秘製鳳爪都唔洗額外加$1 跟茶餐價幾好weekend tea time無咩客 極速上菜 但就係快過龍 造成缺陷雖然張點菜單 粗麵係寫成「粗麵餅」但都唔好係咁易煮下就成餅裝碗送俾個客食啊 d麵都無咩點散開 痴埋哂 我用左幾分鐘先用筷子整散 但有d麵條煮到痴埋哂一齊 仲唔唔太熟 好硬 浸耐d都浸唔淋⋯車仔麵店 連最基本既麵底都做唔好 超失敗⋯不過 車仔麵靈魂之處既醬汁 倒係唔錯 個秘製辣汁 辣中帶甜 而且唔算好辣 幾好食 個秘製鳳爪都係用li個醬汁熬煮 夠哂入味蘿蔔都煮得好淋甜 仲俾成4大舊 算係咁但個麵底真係太差勁 勁扣分 後來同個在附近返工個frd講起 佢話佢同d同事都唔食li間 話好伏 新蒲崗仲有大把其他好野食 下次真係要好好做定功課先得 唔好成日以身試伏

黃大仙區太少有良心食肆，所以特登去到新蒲崗食晚餐呢間車仔麵店俾有需要學生夜晚免費食飯，support!!叫咗個三餸車仔麵外賣，味道唔錯，可能路途比較遠，係d麵淋咗少少，但係d餸味道唔錯

工作需要到新蒲崗，本打算第一餐食清淡啲，點知見到秘製汁同麻辣汁揀...破左戒🙈🙈❤️滷水雞翼好入味，蘿蔔軟身夠曬甜，豬紅讚👍🏻👍🏻個湯底好貪心地腩汁秘製汁加辣汁...超好味！車仔麵真係無得唔重口味🤣🤣🤣下次會叫番凍飲...食到出曬汁🥰👍🏻

平時喺新蒲崗食開連鎖餐廳呢間第一次食有意外驚喜車仔麵算多款揀誠意推介佢個腩汁湯底一食就知熬咗好耐好惹味食材都好足好大方我最鍾意紫菜浸湯勁入味另加一個腩汁生菜好好味呀本身個腩汁已經好好味連靚生菜煮令生菜好鮮甜最值得一讚係服務態度非常好男朋友打瀉嘢飲佢哋即刻幫手抹枱拖地又話「唔緊要」又自動補返杯新嘢飲畀我哋老細同店員都好好人Amazing cart noodles in San Po KongNoodles with fresh ingredients and yummy beef sauce did impress me.Lettuce with beef sauce was also tasty.The staff there were very friendly and helpful.We accidentally spilled drinks but they were not annoyed. They helped us clean and offered new drinks for replacement.Great appreciation for them!

#支持良心餐廳紫菜獅子狗豬潤烏冬 $42豬潤大大件 但係幾件既質素都唔同有舊好爽滑 但有件就好un 另一件仲要有啲苦苦地😯 撕紙狗就偏林 無咩咬口亦都唔建議叫烏冬 因為好林🙈 反而試朋友個豬扒就覺得幾好食～

今日黎到新蒲崗食午餐，行過呢間小店，見到入面坐滿人，應該都唔差，就入去食。車仔面紙上嘅選擇唔少，另外午市有提供飯餐。點左三餸車仔面：鹵水雞中翼(加一蚊)、豆卜、墨魚丸河粉(腩汁)。鹵水雞中翼好入味，啲肉無煮到爛晒。豆卜一般，入面空心吸唔到湯。墨丸好食，唔係攪到爛，食到丸入面少少墨丸，有口感。豬扒煎蛋飯：無問朋友覺得點，不過見佢清晒成碟應該唔錯。總括而言，平價食lunch呢間餐廳唔錯，唔算貴，一直都有客人來來往往，食物性價比高。

太耐無嚟食，對上一次已經係新開果陣，車仔麵多咗新款，亦都加咗少少價...叫3餸米粉，薑汁豬膶加$2，就試一試，又鍾情陳皮魚蛋同豬紅，再加杯奶茶$4~賣相好大碗，好似好濃，仲搭咗幾條生菜👏🏻豬膶勁厚勁大塊，可惜唔得，入口好淋，唔似平時食果種粉粉地，仲有少少血水喺表面...(所以擺到最後才食，浸耐啲希望熟啲😅)陳皮魚蛋就真係陳皮魚蛋，唔係間間會用呢款魚蛋，豬紅亦確實好味，唔鬆散，湯底我揀加腩汁，望落好似好濃，可惜太甜，越食越甜...好奇怪😶唔知唔落腩汁會唔會好啲，下次都係叫其他餸，豬紅可以繼續encore~