富臨皇宮

营业中

休息中

出咗糧之後，屋企人想食中餐，所以帶佢哋食返餐好，叫左乳豬，海皇冬瓜盅但佢同埋芝士龍蝦伊麵，真係好豐富😊乳豬仲有分唔同size，小編超耐冇食乳豬，個皮都好脆身，啖啖肉，正！另外，海皇冬瓜盅好精美而且都大個，我哋每人最多飲咗兩三碗，夏天就最適合食冬瓜啦，清熱消暑☺️，好清甜，依家乳豬同冬瓜盅仲做緊優惠添🤗芝士龍蝦伊麵，芝士焗伊麵，好邪惡🤪，條條伊麵都掛住啲芝士汁，再配上龍蝦，真係好好味，龍蝦一開半去焗，蟹鉗裏面都好多肉最後仲有個甜品，桂花糕，好晶瑩剔透，有淡淡的桂花味☺️

今晚屋企無飯開，所以收工就約咗同事食晚飯，今次揀咗石門呢個地方食，因為位置都算方便，馬鐵站一出就係商場，而且兩個商場都超多食肆。最後揀咗富臨皇宮落腳，呢家晚市嘅套餐組合多到爆睇到花多眼亂 😵‍💫 最後叫咗三樣餸。即燒BB豬 ($68 1/4 隻) : 第一道菜先嚟個乳豬醒下胃先 😋 豬皮燒得夠脆口之剩肉質酥香嫩滑。海皇冬瓜盅 ($68) : 材料相當豐富，有蝦肉、蟹肉、蟹柳、瘦肉、蓮子、瑤柱等等，湯底啖啖清甜又消暑，而且份量非常之多，兩個人食每人都食到五碗以上。上湯或芝士美國龍蝦伊麵底 ($268) : 自己鐘意食得味濃啲所以揀咗芝士，原隻龍蝦開邊上 😍 龍蝦肉超鮮甜之剩肉質彈牙 😋 而個芝士汁亦同樣出色。埋單時職員重送多兩張 Coupon 比我用，提供個 Code 就可以有得平，大家有興趣可以攞去用。(無限次使用)

因為屋企人想食，無得揀就出去富臨皇宮食父親節飯。一坐低，職員就話父親節得套餐，無得散叫😔我們4個人就叫左個$1488 套餐，無加一茶芥包4罐汽水。燒鵝，皮唔脆，肉質太老，麻麻地👎🏻龍蝦伊麵，貴左反而份量仲少左，仲要愈食愈鹹，重口味都搞唔掂👎🏻鮑魚用陳皮蒸，但係無起肉蒸，好難切，唔得掂👎🏻雖然價值唔抵，食物都一般般，不過唯一可讚嘅係呢度職員真係算好helpful，幫手影屋企人合照都好熱情！

相信好多香港人同我一樣，放假都鍾意同屋企人嘆返 一盅兩件，但係舊式酒樓去得多食黎食去都係果幾樣好似無乜選擇。。。。。。今日我就同屋企人試下新式野，點心樣式又多又靚，真係好想樣樣都試哂呀！不過得果2大細又點會試得哂呢🤣。雞絲粉皮係我嘅至愛😍😍，見到有梗係要試啦！ 唔。。。賣相唔錯，不過我都係鍾意小x閣果個😉。下面尼個係素鴨，感覺有d似片皮鴨，雖然大舊咗小小，但勝在唔油膩，都ok。小籠包值得一讚👍，皮薄汁多，好味。哈哈~~~，個雞巢淨係睇造型都滿分啦，小朋友睇到差d唔捨得食🤣🤣。 雞仔有d似咸水角，而雞蛋就係。。。。。。原來係芒果布丁 (我重以為係雞蛋布丁，真係估佢唔到😆)。哈哈~~~又係另一可愛到極嘅造型，覺唔覺得有d似芝麻街果d公仔😆😆。好可愛嘅魚柳包仔，一口一啖都幾過癮。無咁油膩感嘅鮮蝦春卷，食落好有蝦味，唔錯。招牌bb乳鴿，真係乳鴿，同平時酒樓果d唔同，細隻好多，皮脆夠味，但就無乜肉，鍾意吮骨嘅朋友必食。醉雞夠入味，雞肉嫩滑，推介。價錢都算相宜，有咁嘅創意同質素，唔錯。#飲飲食食 #飲食推介 #帶你試盡特色美食 #新派酒樓 #飲食blogger

下午茶星期一至日都有, 兩點鐘開始, 而且分店又多, 總有一間係左近😜, 今次試呢間响石門🥢蝦餃👎蝦餃皮厚, 粉質重唔彈牙, 餡料內有好多肥豬肉, 不過蝦嘅質地都算彈牙爽口🥢蝦球湯伊麵👎蝦完全唔掂, 蝦好唔新鮮, 無鮮味之餘…啲蝦仲好似比嘢拿到表面”梅”咗, 伊麵就唔彈牙🥢蝦腸粉👌皮太厚, 蝦嘅質地正常不過亦冇蝦味🥢燒鵝瀨粉👌燒鵝皮脆但鵝味唔濃, 調味適中, 瀨粉屬粗身哪種, 口感都可以🥢蠔皇鳳爪👍醬汁味道唔錯, 鳳爪軟硬度啱啱好🥢南瓜煎堆👍大大隻賣相非常之靚, 有芝麻香, 煙韌有趙頭, 唔算太油膩酒樓環境唔錯, 好大個禮堂, 開揚闊落; 枱與枱之間嘅距離越唔算太密, 都算坐得舒服

嘩，真係攪唔掂我之前其實都一直有食開但呢排真係個食物既質素同衞生啊服務啊都好似冇以前咁好其實我都明既今時今日又疫情來勢洶洶大家可能都冇乜心機做都明既但係都唔係咁嫁嘛我覺得就算點都好D食物都應該做番好d囉唔夠熱真係唔得

同屋企人提早食團年飯🥳而家晚市暫停堂食，見到富臨皇宮有外賣自取套餐，價錢同菜式都好吸引💗上網訂購好方便！港九新界多間分店都可以取餐。訂購嗰時輸入埋取餐分店丶日期同時間🥳 然後跟返時間，一去到仲即刻有得攞，熱辣辣又唔使等。叫咗個6人餐，只係$668，仲有埋大海斑同埋羊腩煲👍🏼真係好抵食！食食下仲發現份量都好多～🔶古法羊腩煲冬天食羊腩補補就最正啦！羊腩啖啖肉又入味～我就最鍾意入面嘅爽口清甜嘅馬蹄同索曬D湯汁精華嘅枝竹🤤有埋腐乳醬，用嚟蘸點羊腩，更惹味。🔶清蒸大海斑 條斑估唔到都幾大條🥳清蒸蒸得剛剛好，肉質鮮嫩滑溜～滿滿鮮香。🔶花膠上湯扒豆苗豆苗盡吸上湯精華，鮮嫩味美！花膠軟腍入味。🔶沙薑豬手新年食豬手「橫財就手」🥳呢款豬手冷盤好滋味喎，用咗沙薑汁醃製～豬手有8件，件件爽彈入味。🔶菠蘿生炒骨糖醋醬汁酸甜度非常平衡，生炒骨外脆內軟，香口不膩，非常下飯。🔶臘味糯米飯仲有埋冬天暖胃嘅糯米飯🥳加入咗臘味炒香，入口滿滿軟糯感～油亮甘香。

疫情嚴峻，夜晚又無得出街食，唔想煮，都係食外賣好啲。見到富臨推左4人食既外賣自取餐，$238已經有5樣野，真係非常之抵食。古法羊腩煲冬天梗係要食返個羊腩煲暖暖胃，富臨呢個羊腩煲，例牌份量。另外連一盒汁，返屋企煲返熱就食得。羊肉都唔少，爽而不韌。枝竹索哂啲汁，好味。金銀蒜蒸龍躉件呢個餐仲有龍躉食，龍躉肉好滑流😋沙薑豬手一路等外賣，都聽到好多客都黎買豬手。豬手皮爽彈牙，夠哂入味。上湯野菌泡菜苗清清地，份量多臘味糯米飯好惹味，大家都搶住食。

岩岩既假期訂左個盆菜同屋企人食，價錢幾抵又合理，岩晒抗疫期間stay home食😛.今次去富臨訂左個「鮑魚花膠珍味盆菜（4人份）」$393，另外送糯米飯兩碗。呢個價錢係要早一日上網訂同埋自取，去到拎外賣時個盆菜係凍既，所以返屋企要自行加熱約20-30分鐘。.盆菜真身同張相都有9成似，材料包括：冬菇、西蘭花、蝦、燒肉、鮑魚、雞、燒鴨、豬皮、貢丸、雞腳、蘿蔔、豬手… 盆菜係用左鮑汁底，唔算太咸，返到黎成盆加熱就食得，以呢個價錢黎講絕對收貨👌🏻抵食之選，尤其係鮑魚都好大隻足料。

石門呢間富臨皇宮超大, 樓底高又坐得闊落~~係道飲茶食飯都幾舒服平時都幾多人呢~~~晚飯有好多優惠小菜~~有單點, 孖寶, 套餐等等...仲有超抵既4選1優惠抵食到振古法羊腩煲 $28天氣涼涼地, 最正就是食暖笠笠既羊腩煲$28食到羊腩煲超值呀!!!羊肉質軟腍, 完全冇羊羶味唔鍾意食羊既朋友都話唔覺有羶味呢~~羊腩煲內配以枝竹真係超好味, 索晒汁既精華酸菜豬手煲 $98一起手就試佢既湯~~ 味道濃郁但唔會好酸, 咸淡味適中豬手份量都幾多, 每件都係啖啖肉酸菜令人愈食愈開胃!!肥美豬手清蒸龍躉件 $138龍躉件非常新鮮, 鮮味十足~~每件都係厚切, 肉質厚實幼嫩菠蘿生炒骨 $85生炒骨肉少骨多~比較適合鍾意"每"骨既朋友仔~個醬汁酸酸甜甜, 送飯一流

食埋今晚冇堂食啦 呀媽話想去酒樓食wo 今晚嚟左石門富臨 見佢有promo $28 羊腩煲好吸引咁 坐底二話不說即刻點左羊腩煲先 雖然只係$28 一d都唔hea 勁大煲 超足料 入面仲有d冬菇 支竹 准山 同埋羊腩都有好多舊 好入味 天氣咁凍食多個酸菜豬手煲 個湯都幾辣下 酸菜吸哂d湯汁 唔食得辣嘅就唔好叫啦每次食去親酒樓都必定會叫嘅菠蘿生炒骨 又好味又好送飯最後叫左個蒸魚 成條魚又會食唔哂 所以叫左龍躉件 啖啖肉又無咩骨 啱晒我呢d懶人食 今晚真係食到好飽好豐富呀

上次飲茶見到羊腩煲有優惠今晚專登同屋企人嚟食。冬天必食「古法羊腩煲」超抵呀...$28咋，阿媽唔信咁平，仲以為打錯價錢，Gas爐明火滾住食，夠哂暖胃。加埋冬菇同索哂味嘅枝竹，真係好正。「酸菜豬手煲」第一次試呢個配搭，原來酸菜除咗配魚之外，同豬手一樣好夾，仲可以吸收下骨膠原...滋補一下「菠蘿生炒骨」大大碟生炒骨，熱辣辣，好脆口，酸酸甜甜，每次食小菜，係我必點嘅菜式「清蒸龍躉件」wow...啖啖肉又嫩滑，口感同味道100分好食過去飲嗰種大石班好多👍🏻👍🏻👍🏻

✨手抓跳舞雞造型幾盞鬼有趣 原隻雞上自己手撕黎食好貼心有埋手套供應 唔驚整污糟外皮燒得香脆 肉質鮮嫩 肉汁豐富連雞胸肉都好軟腍 唔會乾柴調味適中 整體唔錯✨有機野米炒飯揀孖寶有多個主食 炒飯炒得乾身 中間混合左幾款米同菇菌口感幾豐富 菇菌味道清香✨蘿蔔千絲酥酥皮層次豐富 蘿蔔絲係粗條清甜多汁 熱辣辣食 唔錯✨流沙奶黃包比一般流沙包大個 包質地軟熟 流沙程度唔錯 香甜但如果餡再多返少少就更好食物唔錯 環境好大 坐得舒服 由中午十二點坐到三點都冇人趕服務唔錯 價錢合理 都幾抵食

今日探個親戚，咁因為親戚都有番咁上下年紀，咁就同佢去一啲中式酒樓度食飯，咁聽佢講想食羊腩煲，佢話28蚊咁我以為佢係咪搞錯咗呀，因為通常羊腩煲都要二百幾蚊啦，點知原來佢係冇睇錯，我亦都冇聽錯，羊腩煲係28蚊， 即係唔使講咁多嘢，咁就梗係衝過去食羊腩煲啦，28蚊咩年代呀街市都買唔到啦。 廢話少講睇我食咗啲乜:古法羊腩煲: 燘得好冧，羊腩汁炆得固然入味，羊腩都幾夠肥， 配料都有冬菇冬菇幾厚身， 呢間嘢啲羊腩煲我覺得係價錢上面真係數一數二，28蚊係冇得頂。清蒸龍躉件：呢個鮮龍躉片我覺得個肉真係幾好食，因為佢個肉質比較彈牙而且亦 保持龍躉嘅鮮味， 有時都驚一啲舖頭將啲食物放得太耐令到鮮味會流失咗， 所以呢一個魚我就比較推薦。酸菜豬手煲: 食落去個豬手，我已經充分感受到嗰種骨膠原嘅味道， 我自己覺得都幾滋補 ，而且我會覺得佢個酸菜汁用嚟送飯真係唔錯，師父炆到個豬手幾淋 ，可能因為個汁酸酸哋，令到我要咗個飯嚟食。菠蘿生炒骨: 呢個生炒骨我覺得個味道都幾好，一來唔係太甜又唔係太酸，味道恰到好處，而且佢件數亦都算係多，所以呢個生炒骨我都幾鍾意。最後呢間酒樓嘅羊腩煲我覺得真係幾抵，如果有興趣嘅朋友可以嚟呢

天氣凍要食羊腩煲，呢排睇到有人介紹有$1羊腩煲食😌😋😋，雖然要830後，但其實放工都差唔多時間🤭.🍴$1 古法羊腩煲830後$1，830前都係$28，點都抵食既，南乳香味較濃，除左羊腩仲有足料枝竹、冬菇、薑、馬啼。.🍴清蒸龍躉仔$198蔥味十足，蒸得岩岩好，豉油甜甜地餸飯一流，晚飯必食海鮮。.🍴菠蘿生炒骨$85菠蘿生炒骨新鮮炸起，10分香脆酸酸甜甜，仲有菠蘿青椒黃椒配搭，唯獨係骨就多左啲，不過都唔錯既。.🍴酸菜豬手煲$98呢度小菜價錢都ok, 呢個酸菜豬手既豬手炆得好淋身，酸菜味道淡淡地滲入豬手，夠晒香又有埋芋絲個啲一齊索味。.呢度茶位$12/位、前菜$10/碟，特價晚飯小菜夠晒抵食。