禾彩日本料理

营业中

休息中

食肆細細間，但冇所謂，最緊要用料得！而且成晚職員好好禮貌，又成日幫手加水，即使多客都服務好好，抵讚。刺身無論係蝦、三文魚、帶子或北寄貝都好鮮甜。花之戀壽司三文魚味道唔錯，好多蟹籽。初初有d驚好多沙律醬，但食落卻唔係死甜，反而比出面食嘅多左d酸味，竟然仲開胃。炸蝦天婦羅上碟時新鮮炸起，摸落好熱。不過我擺左一陣先食又好快唔夠熱添。值得一讚係炸得好好外層夠脆且唔油膩。蝦肉好嫩滑亦有蝦味，可見用料同烹調技巧都上盛。炒雜菜好多木魚絲，仲有好多冬菇，真落足料。部份菜炒得硬左少少，整體都好食。落左少少楜椒，惹味得黎唔會太鹹。蜆肉湯蜆肉湯味道不過不失，唔會太鹹。可惜係隻蜆味道明顯唔新鮮。生薑豚肉飯料好足，飯又多肉又多冬菇亦多，而最多嘅係薑...本人唔鍾意薑，平時食會夾走大塊薑。然而今次餐廳係將d薑磨得好碎，故此完全避唔到。不過如果鍾意食薑的話，咁樣整真係好好，睇到餐廳好有心。二人餐，係唔使加一服務費！

香港仔啲頭食日本嘢嘅店舖唔多，俾我上網見到呢一間餐廳好似有唔錯嘅評語，於是就好奇想試吓佢。呢一間餐廳只係小店，座位唔算好多，但引起都幾旺，午飯時間完全滿座。我同朋友入到去坐低後，店員好友善咁樣向我哋地都推介當日有乜最新先最抵食，因為餐廳每一日都會有不同嘅推介做優惠。不過當日佢嘅優惠推介我同朋友都唔係特別感興，於是就叫咗其他餐。我哋兩個都叫咗午市套餐，會有刺身前菜、麵豉湯同埋主餐。先講佢個刺身前菜，係兩大舊嘅厚切三文魚刺身，兩片肥美嘅帶子刺身，同埋兩大隻虎size嘅甜蝦刺身。我三款刺身都非常新鮮，味道非常鮮甜，三文魚嘅厚度簡直就係一般三文魚刺身嘅兩倍，鍾意食三文魚刺身嘅朋友一定要叫套餐。麵豉湯亦唔馬虎，每碗麵豉湯入邊都有大大粒新鮮連殼蜆肉，所以味道亦都比起即沖嘅多一份鮮甜。呢碗吉列豬扒飯嘅份量真係超足料，佢唔係淨係個碗大，而係成塊豬扒都超級大塊，而且仲要係厚切，我夠膽講佢係我食過最大塊嘅滑蛋豬扒。而且塊豬扒唔會好厚粉，塊皮夠酥脆。雖然豬扒很厚，但肉質鮮嫩，而且仲要非常多汁。加埋滑蛋一齊食，忍唔住一口接一口。雜錦天婦羅有大蝦、茄子、冬菇、南瓜同埋番薯。天婦羅嘅炸粉唔會好厚，非常酥脆，食落去

Work from home 想係香港仔食日本野，一係鮨政，一係禾彩，次次見到鮨政多人，都係食禾彩。今次叫左天婦羅烏冬，前菜叫左5件剌身，又係有2件大大舊既三文魚，帶子同2隻蝦。天婦羅蝦有2隻、南瓜、冬菇、茄子、蕃薯各一件，一個湯烏冬，個set仲送埋麵豉湯，可以加錢轉汽水。烏冬係日本烏冬黎既，仲有D粟米海帶係麵，爽口彈牙。天婦羅既粉唔算好厚，而且新鮮炸好熱辣辣，rest左一陣，好脆，最鐘意食粒冬菇。埋單$90

香港仔嘅日式餐廳選擇少，禾彩係一間小店，冇疫症嘅時候成日未開門就有人排隊，外賣亦都好多人叫，有時仲多到唔接外賣。因為佢嘅午餐同晚餐都比較抵食，加多10幾蚊可以食埋刺身（5件）或者其他小食，我好鍾意佢個三文魚係好大塊，主食叫咗豬扒蛋飯（$70），雖然係外賣但係返到屋企個豬扒仲係脆嘅連小食，佢啲飯真係超級多，女仔食可能要叫少飯，叫咗三個飯，四個人食都食剩左。另外仲叫咗天婦羅飯（$90連小食），堂食平時我會食烏冬。😋😋

這是家很容易被忽略的小店。位置不好找；名字普通，也缺乏醒目的裝潢店面，但每天總有識途老馬在門口輪候。下雨天比較少人，等了幾分鐘，側身進店。只有那麼廿來個座位，遠遠低於市場上的需求。一般日式格調，方枱矮凳，有點擠。這裡的客人吃完就走，知情識趣。餐牌只是兩張紙，牆壁貼有特別推介的餐點及價目，簡單明瞭。七、八十元起跳的一客定食，包刺身及麵豉湯（改汽水+＄4），價錢合理；份量適中。朋友和我都點了set lunch（$70）的生薑豚肉飯。三式刺身令人叫好，新鮮甜美；油香爆滿。很喜歡這裡的三文魚，肥美滋潤；紋理清晰，每次來到都要幹掉幾盤。牡丹蝦個兒不大，一、兩口的功夫已從盤子消失、帶子是最叫我回味的海鮮，從來不敗，可惜size愈來愈小，一盤生意經，也難怪。今天的生薑豚肉飯，飯太軟身、太糊…米水放多了。猶幸豚肉味道很好，如果多放些洋蔥會更好，菌絲也中和了豚肉飯的油膩。這裡的服務不在那句'蘇二孖西'，而是不停的為你添茶、迅速的上菜、勤快地擦桌子、為等位的人張羅位置…要來不要來；來了不後悔!

食呢間比食元氣更好呢！難得的香港仔壽司店。520都同男朋友來食。壽司價錢來講唔算太平，但都叫抵食，套餐就更加抵食。壽司的top都很足料大件，配得上呢個價。海膽都夠甜。 仲叫左軟殼蟹同鰻魚飯。軟殼蟹（$48），唔想太飽嘅人可以唔使配飯淨係食軟殼蟹，都好好食。鰻魚飯跟一個湯，因為我唔太喜歡太鹹嘅湯，所以覺得呢個味道剛剛好，入面仲有蜆同海帶豆腐鰻魚飯內的鰻魚有點不夠肥美，但都ok值得上呢個價。滑蛋好滑不過有洋蔥我唔鍾意食，飯嘅份量好多。有啲嘢食唔係餐牌上要望牆，建議望吓牆睇下有冇野想食再望餐牌

鯖魚好大份啖啖肉，配檸檬汁同佢個酸酸地嘅醬汁，好味！（我本身唔食魚都覺得好食）鰻魚都好味，不過唔係好大條，肉好薄身，比較起上嚟，鯖魚係抵好多。隔離枱有人叫秋刀魚，係勁大條，不過我食唔到咁鯹嘅魚！個刺身先抵，佢原價係$150 一碟，咁跟午餐呢個當然係細碟咗，有三文魚、帶子、甜蝦，好新鮮，三文魚好滑好厚肉！帶子同蝦稍為細咗啲。麵豉湯有蜆肉。出面等位嗰陣見到隔離髮型屋隻狗狗，實在太可愛🐶😍😍😍😍

阿爸呢個星期生日，原本度左諗住成家去灣仔某間餐廳食中菜，點知屋企有人被公司局住唔得閒去，結果得番我同阿爸兩個食人。其實住得南區都知呢間非連鎖日式料理既小店來歷，但開左咁耐今次係第一次就到時候去。專登等晚市6點開門去，鋪頭員工準備好已經有唔少客入左去，過左15分鐘已經滿座，因為只得三十幾個位左右。員工都好好，見有啲客如果拎啲個人物品唔方便，佢地可以幫你拎入去放好唔使阻住路同阻住食野。今晚叫左3份三文魚刺身（$49/4切），炒野菜，燒鯖魚，鰻魚蛋飯同雞扒蕎麥麵。刺身冇影相，不過呢間鋪啲刺身一向係厚切，壽司份料都係長餡，所以其實幾大件抵食，今晚啲刺身都好鮮同好肥。望到隔離左近啲甜蝦同帶子都ok。鰻魚蛋飯啲洋蔥好香，蛋汁都做得好好，唔會太咸。炒野菜唔會太乾，濕炒唔錯。蕎麥麵個湯底係咁多樣最清淡既，麵幾彈牙，浸耐左食唔會發漲同淋晒。雞扒就入味又唔太肥，係個照燒汁淡左少少。整體上菜速度如炸物或者照燒雞扒可能要等下，但普遍食品上菜都快，如飯，鍋物，員工執拾食完既碟同加茶都會方便時候會主動見到幫你。希望小店能繼續經營落去，畢竟都維持左超過十幾20年。

香港仔食lunch有咩選擇？朋友推介呢間日本菜，一過咗12點就會即刻滿座，好多人！今日揀咗燒汁肥牛拉麵，附送前菜有三文魚甜蝦同埋帶子刺身，呢個價錢又幾抵食喎。食完之後仲有麵豉湯送添。如果個肥牛同個拉麵係分開上味道就更加好啦。

同同事食lunch突然想食下日本嘢就嚟左禾彩啦呢到嘅嘢食抵食又新鮮👍🏻鰻魚飯我初初仲以為只係得兩件，點知一上台見到成條上我都嚇親。一個餐仲包一個麵豉湯同一份魚生有三文魚🍣、甜蝦同帶子🤤🤤真係估唔到有咁多嘢👍🏻👍🏻由於店仔細細所以會坐得比較迫少少，人多就可能要考慮一下。整體而言價錢合理，嘢食新鮮，推介大家食晏就或者飯飯👍🏻👍🏻👍🏻👍🏻👍🏻👍🏻👍🏻👍🏻👍🏻

為咗逃離黃竹坑呢個美食沙漠，小弟決定闖去香港仔，今次就去咗一間聽聞都多人等位嘅日本料理「禾彩」食午餐。午市套餐，初初睇價錢牌係覺得略貴，反而咁樣令我更加想試下究竟食物係咪值呢個價錢，於是我就叫咗份鰻魚蛋飯，套餐包咗一份小食，而我就叫咗螺肉，總共盛惠$88。螺肉一上枱，我同朋友都嘩咗一聲，因為好大份，一啲都唔似普通日本餐廳前菜俾幾件你就算，食落味道幾好！而朋友嘅前菜就嗌咗三式刺身，有三文魚、帶子同甜蝦各兩件，份量都大件而且望落係新鮮，真心抵讚！到咗我嘅主菜鰻魚蛋飯，鰻魚上枱時仲見到表面係起泡，證明真係啱啱燒起！鰻魚汁夠香，蛋配洋蔥夠滑，鰻魚亦夠鮮，米就應該係採用日本珍珠米，粒粒鮮明，唯一要彈嘅係條鰻魚尾燶咗少少！整體嚟講，$88係值得我去俾，總好過我俾$50去食一個劣質飯。

環境舒服，有足夠冷氣。服務服務非常好，招呼周到，溫文有禮，會經常加茶。上菜好快。蒲燒鰻魚搵面蒲燒鰻魚同拉麵會分開上，鰻魚好大份，好好味，拉面好大碗，個拉麵湯唔會太咸，岩岩好。三文魚茶漬泡飯三文魚是熟的，好大的一碗湯飯，比起係日本食嘅茶泡飯易入口，因為個茶味無甘苦。雞軟骨有兩串雞軟骨，無咩味，肉都幾多。三式魚生六片好大份，有三文魚、帶子、蝦，三樣都好大舊，好味面鼓湯好好味，入面有豆腐、白蘿蔔、海帶。食晒成個餐好飽肚。

呢間禾彩日本料理位於香港仔大道，係香港仔難得嘅平民日式餐廳，嘢食好食得黎又唔貴，簡直係物超所值。首先必嗌嘅係佢嘅三文魚刺身，一共有5件，件件都又大又肥美。另外一定要試嘅就係佢嘅卷物。個人認為佢嘅三文魚親子卷同吉列蝦卷真係好好食，每份大概有5至6件，大件得黎又好足料。佢嘅軟殼蟹手卷入面嘅軟殼蟹都好大隻，有好多肉，而且因為係即炸嘅，所以熱辣辣超好食。如果中意食天婦羅嘅話就一定要試佢嘅天婦羅蝦，熱辣辣脆卜卜，隻蝦又大隻，真係超級正。最後佢成日會有啲特別版嘅可口可樂，之前係綠茶味，近期有櫻花味。個人認為比一般可樂更加清新，大家如果有機會就試下啦。

呢間係同事介紹既，講到又大份又好味又抵食。於是同女朋友由灣仔行完山喺香港仔之後就直接黎到呢度等位，我地喺間店6點既開門時間前到咗，嘩，估唔到門口已經有10幾個似係街坊客等緊開門啦，😍即時心理預期高咗好多，真係好食到咁！？第一輪就有得食，點咗份三文魚鰭，原來呢個一日得幾份，隔離枱6：15點已經賣曬😂一份吞拿魚腩，一份三文魚壽司，超級大份一份蔬菜天婦羅，一碗味噌湯，味噌落得太少，唔係好夠味。總括黎講，所以海鮮都不是預期中新鮮，心理落差好大，就好似食緊啲劣食放題咁。肯定有人會話，你俾呢個價位，唔通想食日本當地質素咩。咁如果早知係咁既質素，幾抵我都唔會入黎試。

香港仔禾彩，自開店以來都係咁多人排隊，所以我決定叫外賣，打電話落去叫定，大約20分鐘就可以拎。今日我叫咗雜錦魚生飯同埋餃子拉麵。先講下餃子拉麵，禾彩都好細心，會將啲湯同拉麵分開上，餃子亦都係用另一個盒分開上，所以餃子食落口仲係好脆，拉麵亦都唔會話比啲湯整到好軟，所以個餃子拉麵係好食，好彈牙。至於個雜錦魚生飯，隻蝦好鮮甜，三文魚、帶子等等都好新鮮，除左個飯我嫌少之外，整體黎講呢個雜錦魚生飯係無得輸，價錢又經濟，所以係值得推薦