肉餅哥小炒料理 (已結業)

是日午餐金沙蛋黃煎肉餅配菜飯今日放假 身住大圍的我一早已有決定要到肉餅哥新間的大圍分店食肉餅😍新店地址就在美林邨，一進入美林邨，已被那奪目的招牌和裝修吸引店鋪舒適闊落、冷氣充足，走簡約路線，感覺Relax 及新潮👍看看menu，除了多款不同口味的肉餅，還有早餐，小吃等。下次一定要試！實在太多選擇，令有選擇困難症的我樣樣都想試😍最後千挑萬選下選了金沙蛋黃肉餅，再配菜飯。一黎到已聞到香噴噴，新鮮煎起快快趁熱吃！菜飯很大碗亦足料絕不Hea👍而主菜肉餅上鋪著咸蛋黃的香，真係勁好送飯，而且不油膩，很香口，咸蛋起沙，同肉餅我覺得係絕配😍肉餅新鮮而且肥廋剛剛好，好快就比我KO了😝總括黎講，肉餅保持水準，多了很多不同的口味，真係每日食一款都食足你一個月！最緊要店鋪坐得舒適，肉餅哥正式成為我的飯堂了😆

今日下午去了吃，新開張第2天，地方乾淨，12點幾到達，不用等位，一坐低轉個頭就出現人龍了。點了2個套餐，秘制蓮藕肉餅(蒸)49元，同流心芝士肉餅(煎)59元，蒸嘅等了15分鐘就到，而煎嘅比較耐，等了25分鐘啊，可能新開張，人手唔夠，有點亂，但整體上都有貌嘅。小食方面，新開張暫時未能提供。

今日入大圍搵個朋友，佢話附近剛剛開左間肉餅哥，建議去試下。之前都有聲過呢間肉餅哥，聽講荃灣店做得唔錯，一於就親呢個機會試下。同朋友一個點左金沙蛋黃肉餅，一個點左黑椒雞腎肉餅，兩個人share。其實仲有好多隻花款，有啲好似好立克肉餅，咖啡煉奶肉餅，不過好似一開始食呢幾款就比較大膽， 試咗啲睇落容易接受嘅口味先。點咗大約15分鐘就上枱，速度都ok，金沙蛋黃肉餅係一層炒香咗嘅蛋黃，好甘香配合肉餅個人認為係非常唔錯嘅配搭。黑椒雞腎肉餅黑椒味濃郁， 雞腎令肉餅咬口更彈， 如果再大粒啲就更完美嘞。肉餅份量都好足夠，兩個人平均一人七十幾蚊有埋嘢飲好滿足，下次可以嚟試下唔同嘅口味。

講開屋村嘅冬菇亭熟食中心大家都知道係喺街市附近、無冷氣、衛生情況唔理想、環境十分麻麻嘅食店，發夢都無諗過會變成今日嘅境況🤔正正係因為咁，本人被吸引去新開嘅肉餅哥試試早餐😋環境正如以上描述，絕對唔覺係喺「冬菇亭」，仿如置身韓國型人食堂。早餐係一般港式。首先，火腿奄列嘅蛋同其他茶餐廳一樣薄薄的，麵包尚算軟熟。公仔麵未煮熟已上枱，要等兩分鐘先食得。奶茶用紙杯不夠專業，而且係好細杯。好彩夠熱同味道合格。本想加錢將麵包轉多士，唔得。想要杯水，無 (原來係要買，樽裝$3，合理，但店員並無講)。 想要胡椒粉或辣椒油調吓味，無。最後諗住用八達通俾錢方便啲，都係無呢個服務嘅🙄 大家記得帶現金💵早餐嚟講，呢次經驗幾差。食早餐都係去番專業嘅連鎖食店同茶餐廳。下次會再嚟不過一定係試肉餅😉

見肉餅哥剛剛開張，喺冬菇亭能夠裝修得咁靚，雖然肉餅先係佢主打，早餐未必係佢拿手好戲，但都黎試下佢。點知佢地嘅早餐都係求求其其，對佢地嘅服務有些反感。坐低先知無清水，無胡椒粉，無辣椒油提供，原來呢度飲水係要錢，俾$3就俾支樽裝蒸餾水你，反感 !我選擇了沙爹牛肉麵+牛油方包+火腿奄列+飲品火腿奄列火腿奄列炒得太老，蛋太乾太硬，零分。牛油方包無特別，亦唔可以幫你烘底，生命麵包質素而已。沙爹牛肉麵上枱嘅時候一食，麵未完全熟透，沙爹牛肉普普通通，牛肉肯定係姆過，因為係冧晒，我明白茶餐廳係咁架喇，不過新開張，總不要求求其其留個壞印象嘛。熱奶茶溫度好熱, 但係份量超少，大概6安士，有啲反感，用紙杯亦缺乏了茶餐廳感覺，茶俾我嘅口感係奶茶，但茶香味欠奉，麻麻地！

知道肉餅哥係大圍開分店，即刻跑去試一試， 不負所望，地方比起總店大很多， 相當舒適。環境走工業風，泥水牆身，木枱鐵凳， 型格。牆身上的“不准吸煙” ，令我想起細個嘅時候睇戲嗰句（奉政府籲戲院內嚴禁吸煙）。餐牌大致上同荃灣總店差不多，多咗啲特別嘅菜式 ，例如原隻龍蝦南瓜粥，秘'製足料雞腳湯，可惜試業期間，仍然未有得賣 。我點了一份蟹粉煎肉餅，仍然做到外面開出香脆，內裏嫩滑嘅肉餅口感。 蟹粉分量不少，能帶出豬肉鮮味。99蚊連可樂。朋友第一次食肉餅哥，點了老乾媽蒸肉餅，同樣讚不絕口。