金鳳大餐廳 (D2 Place TWO)

营业中

休息中

Today before church, I decide to find a restaurant which is in D2 place and have a dinner.I saw this restaurant is queuing with many people, then I was attracted by it. This shop is popular in selling beef set. The price is not expensive and the size is very big. I think even a adult men also cannot finish the whole set of meal.The taste is good and I super love their sauce.

講到港式扒房的佼佼者一定非金鳳大餐廳莫屬。今日同男朋友去D2 Place睇戲順便黎D2食飯，我地揀左呢間扒房食野。平時都大排長龍，今日都唔例外。首先黎最經典的羅宋湯加餐包，羅宋湯有大量蔬菜、又有牛肉，相當足料，味道濃郁。餐包熱辣辣又軟熟再點埋個湯簡直絕配！我地叫左一個西冷一個牛柳扒配可樂及紅豆冰。 呢兩杯野飲都係岩哂食扒👍🏻牛柳扒餐 五成熟🐂牛柳餐係我去金鳳好中意點既扒，有兩塊牛柳，肉質嫩滑，咬落去完全沒有筋，配上黑椒汁好惹味！去港式扒房，好中意淋啲汁上牛扒果下，呢個時候一定要準備餐巾，淋上去芝芝上好正🫶🏻西冷牛扒 五成熟另一個餐叫左西冷扒，呢個餐既牛扒係一塊過沒有分開的，比起牛柳有啲唔同，西冷牛肉味比較重，沒有牛柳咁腍身，係另一種感覺。 再配上大量既招牌生蒜為整塊牛扒增加不少風味！另外紅豆冰真系必點，淡奶同紅豆冰嘅比例恰到好處，紅豆🫘唔算太甜、紅豆又多，真系好正！好多時會懷念想食下呢啲老扒房的味道，如果下次要食港式扒必到金鳳大餐廳。🤭

今日去左荔枝角做野，其實都知道附近多好野食，不過冇咩時間捐窿捐罅去搵啦，所以食返一間死唔到人的金鳳大餐廳。午餐set 都係基本足夠的選擇，有牛扒、豬扒、焗飯等。左揀右揀下最尾決定食洋蔥鑊仔牛扒跟意粉，5分鐘內餐就送到，適合附近寫字樓打工仔，同埋趕時間的我！洋蔥鑊仔牛扒（$68）套餐跟意粉，餐湯同野飲，68蚊都算正常啦！麵包—係熱住上，哩樣實在係太緊要，因為咁先可以整溶塊牛油！餐紅湯—一般發揮，唔會太濃味精味。鑊仔牛扒—好大塊牛扒！而且肉嫩多汁，最緊要係洋蔥汁，好多時餐廳夠配意粉唔夠配牛扒，或者係調返轉。而家就唔怕夠汁點牛扒唔夠跟意粉啦！總結，你話真係好味到一定推就唔係既，但勝在性價比唔錯，同埋夠快！每次附近返工諗唔到食乜，都會係揀佢！餐廳：金鳳大餐廳 (D2 Place) GOLDEN PHOENIX RESTAURANT (D2 Place)地址：荔枝角長順街15號D2 Place二期3樓312號舖 Address：Shop312, 3/F, D2 Place TWO,15 Cheung Shun Street, Lai Chi Kok, Kowloon, Hong Kong, La

好耐無鋸扒，之前去開太子嗰間金鳳，今次試咗荔枝角間金鳳，店面明顯大好多座位都多好多，唔駛等咁耐！空氣都流通好多！而且等既時候有位坐，係商場內夏天、落雨都唔駛擔心！餐前餐包加羅宋湯餐包好軟熟👍🏻食開嘅金鳳啲牛扒係好淋身，今次一樣都係食牛柳($133) 7成熟加蒜蓉黑椒汁，蒜蓉真係必須，雖然食完成把口都有陣味😂，但加左味道更勝一籌👍🏻呢度嘅扒都係淋身但又唔會過分淋，份量又十足，唔錯👍🏻鍾意食淋身扒一定唔好錯過！另外仲特登加左份格格脆薯格($58)即叫即炸，雖然有跟千島醬，但熱辣辣點黑椒汁食更正👍🏻另外每個扒餐仲跟埋杯飲品，冷熱同價。食完個熱辣辣嘅扒餐飲返杯凍嘢爽呀🤣

霓虹招牌夠搶眼，由裝修到餐牌懷舊風味十足，去金鳳鋸扒是件賞心樂事，最啱大人細路哥!用餐氣氛好好，不時會聽到歡笑聲。扒餐上枱前已經有溫馨提示，請大家用餐紙避免被熱油彈到，但係依然歡樂中招笑聲此起彼落🤗與鐵板上吱吱嘠嘠聲響，相映成趣首先送上紅湯餐包，牛油溶化其中其中一位送餐哥哥，單手可以拎起5個鐵板餐，絕對係高手表演，開心大發現！主角出場十分驚艷係真正嘅厚切牛柳。叫咗7成熟，睇相都知鮮嫩多汁，香淋軟熟➕蒜蓉就更加冇得彈！另一個雜扒餐同樣都係CP值爆標，超大份，好味又抵食!餐飲叫咗雪糕紅豆冰，可以揀雪糕味勁開心🌈紅荳又夠淋Perfect ending!

牛扒扒房開到成行成市，有啲主打熟成牛扒，有啲主打神戶牛柳，又有啲主打澳洲入口，各花入各眼，一定搵到啱你自己鍾意食嘅。🧐🧐我自己都有間成日去嘅扒房，最近知道佢喺D2 Place度開咗新分店，走過去捧下場。😎😎呢間就係有返少少年紀嘅朋友都會食嘅～金鳳大餐廳，以前喺太子旺角嗰頭做街鋪，慢慢開到而家有好幾間分店，識嘅都係舊式港式西餐嘅味道，牛扒會用鐵板上，林生唔同嘅醬汁，喺燒到紅紅嘅鐵板之上，咋渣聲咁叫，真係會令人食指大動。😋😋我哋今次叫咗T字骨同肉眼扒，當然唔少得嘅就係呢度嘅招牌生蒜，貴牛扒增添風味之餘，又可以提供更多不同嘅口感，可以話係呢度嘅靈魂☺️☺️兩個人食飽都係二百幾蚊，呢個時勢出邊都好難搵得到🤩

香港人氣懷舊扒房金鳳大餐廳 (D2 Place) 呢間人氣扒房，裝修風格以懷舊特色為主，係鋸扒好去處，而且價錢相對便宜，性價比高～～～小編order了一 鑊仔牛柳午餐 （$68）， 雞扒蕃茄意粉 （$58），午餐包括餐包，羅宋湯另外包一杯飲品🥰🥰 鑊仔牛柳軟熟， 包薯菜，味道不錯， 雞肉蕃茄意粉相對味道比較淡， 但份量非常大份，食到好飽😊

喺荔枝角做完運動都已經八點幾，同朋友快快趣喺附近搵餐廳醫肚做完運動想食肉補蛋白質🤣見到久違嘅扒房即刻諗都唔諗衝入去🤣我哋嗌咗兩個扒餐都附送餐包，餐湯同飲品餐包勁軟熟！暖笠笠！搽牛油食簡直係comfort food羅宋湯酸度啱啱好，好開胃。雜菜都幾多蘇格蘭牛扒大大塊，配黑椒汁實冇死，好惹味雖然叫咗五成熟，但喺鐵板上邊高溫煮住始終係會熟咗啲。但口感依然嫩滑，牛味適中。底下嘅薯菜量完全唔吝嗇😂另外一個係店員推介嘅牛柳。朋友想食得特別啲，所以叫左野菌牛柳餐🤣呢個雖然冇得自己揀汁，但配埋佢嘅指定醬汁都幾好食。牛柳質地更淋，如果諗唔到食邊款牛，呢個都係一個唔錯嘅選擇

回憶滿滿，行商場見到竟然有金鳳，當然要去試試。依家食市經營不易，去到門口發現餐廳滿座，質素一定有保證。講到扒餐，唔係雜扒就係食牛，金鳳有好多的選擇，今次叫左美國牛小扒餐，因為鐵板上既關係，一定要叫五成熟！叫餐有餐包同忌廉湯(包野飲)，記得細個個餐包揸完牛油仲要點湯，食落去全部都係回憶！食鐵板當然唔少得落汁依個環節，如果小朋友見到實好興奮。我怕辣選擇左蒜蓉汁，炸炸聲，大人其實都好興奮。美國牛小扒餐 $190份量好多，2大塊牛小扒。切落去好滑有血滲出黎，唔洗五秒已經變左做七成熟，放入口岩岩好，所以千祈唔好一次過切哂，咁就可以啖啖都係七成熟既牛扒。兩塊牛下面仲有索哂汁既薯格，加埋茄汁就完美。

鋸扒首選又黎到我搵野食時間。Lunch 時間想鋸扒，一定要黎金鳳Lunch menu 長期大致都係果幾款今次我叫洋蔥鑊仔牛扒-仲以為係一塊塊⋯而傢變左薄切🧐荷蘭豬扒-都幾好食，係厚切豬扒，都好入味餐湯都係紅湯白湯金鳳既紅湯=蕃茄雜菜湯（沒有牛的）所以特別清甜白湯是-忌廉湯，比較淡餐包都係凍，如果整熱埋會比較好

成日都聽到啲人講港式豉油西餐普普通通，而家個個都話要食咩熟成牛扒、A5和牛，但小弟覺得係因為佢哋未食過金鳳呢啲老牌西餐廳姐😎佢有間舖頭開咗喺荔枝角嘅D2 Place，入面有唔少嘅霓虹燈作為裝飾，俾人一種懷舊嘅感覺，啱晒而家潮流興嘅Vintage風。講返嘢食先，我哋叫咗一份T字骨同埋一份西冷，都係叫5成熟（medium）👍🏼一落完單，店員就好快手拎咗兩個餐湯俾我哋，一紅一白，熱辣辣配埋軟綿綿嘅餐包，天氣凍食個包飲返個湯，真係幾正。西冷牛扒我哋叫咗黑椒汁，加咗啲新鮮嘅生蒜，肉質嫩滑。T字骨我哋叫咗蒜蓉汁，肉味濃厚，不過近骨頭嘅位置會比較生，如果怕食生肉嘅朋友，可能需要叫七成熟。總括黎講，食返餐好嘅牛扒，可以考慮吓呢度，因為價錢相當親民，埋單都係三舊水🤣🤣

1. 等位餐廳唔大，成日都好多人，晚市時間食簡直迫爆😂⋯ 等咗大概20分鐘（唔算超級耐，因為我哋前面本身都有10張檯⋯）2. 環境因為地方細，所以環境都一般般，比較迫。拎住多嘢唔建議嚟呢度食～但上菜速度超快😂 嗰頭嬌嫩嗰頭個湯就出現了3. 食物質素今次叫咗一個招牌牛柳餐（蒜蓉汁），一個西冷牛扒餐（黑椒汁）。每個餐都會跟一個湯加一杯嘢飲🧃我哋叫咗羅宋湯凍檸茶同埋凍朱古力。 招牌牛柳好味！叫咗五成熟，好有咬口，但凍咗就有啲韌，建議快快趣食！Side dish有厚厚的翠玉瓜同埋薯條🍟 好味！蒜蓉汁都幾配，如果想額外加蒜蓉嘅話要加$5，嗰時冇㗎但見到隔籬枱加咗都幾吸引西冷牛扒就比起牛柳硬身少少，個人就比較鍾意食牛柳多啲啦～ 不過佢都唔係差！合理。餐包都好味，羅宋湯都好飲嘅，不過差就差在羅宋湯嗰個碟，都有少少污糟吓同埋佢哋係直接微波爐叮😂（所以我估先上菜上得咁快哈哈，不過呢個冇乜所謂）講到杯凍檸茶，就有啲失望，好淡茂茂🫣平時好鍾意飲嘢嘅我都飲唔晒lol4. 價錢算係平民扒餐，比起大快活高級少少咁🤏🏻 $133可以鋸扒我覺得合理！加上牛柳真係幾好味～ 又唔係好細塊，覺得幾好！

今日去完D2 Place 睇戲，大約7:00pm左右，就梗係睇下有咩好野食，見到3樓轉角位比較多人，一望原來係金鳳，心諗正wo好耐無食過，因為平時多數去太子間老店平時都係叫港式既扒餐，今次就同朋友一人一個港式、美式，試下有咩分別先落完單，餐廳職員好快就上湯，我地叫一紅一白湯，餐湯配烘過既餐包無得輸啦🧈🥯飲品就叫凍檸檬茶、可樂加冰底🥤🍋🍵到金鳳扒餐當然要加蒜蓉($2)，我同朋友兩個仲雙重添，配埋蒜蓉汁招牌牛柳餐🥩其實平時都食開呢個，叫五成熟，配埋薯菜，因為好好味唔會衰，仲有好多肉汁添，肉質又淋👍🏻點知佢竟然有對手，就係美國牛小排餐，職員有問用唔用鐵板上，我地兩個都比較鍾意鐵板淋汁落去既聱音，當然鐵板上喇都係叫五成熟，配埋薯菜，特別既係用薯格，唔係好似牛柳餐配薯條，一食牛味好重得黎又有肉汁經過今次，我估下次再黎會再試埋其他美式扒餐

全晚淨係去2人枱，去咗一個鐘入咗十幾張，4人枱只去一張，但係又唔係無4人枱嘅客喎，有成十幾張等緊㗎喎，所以如果2個人去嘅就OK, 4個人或以上就唔好去喇。嘢食一般啦，服務就唔係好囉。

金鳳大餐廳 (D2 Place) (荔枝角)嚟咗D2行街，呢間港式鐵板餐好多人排隊，就入嚟試吓❤️❤️餐前紅湯、白湯羅宋湯入面好多蔬菜，幾好味，酸酸甜甜，好開胃😋😋白湯好creamy，味道唔錯😊😊餐前麵包🥯麵包熱辣辣，配埋牛油食😍😍將牛油溶化👍鐵板美國牛小排$190🥩鐵板餐大大份，美國牛小排肉質鮮嫩，再配埋鐵板嘅熱力，熱辣辣咁食，好味🥰🥰下面仲有好多配菜同埋薯角，推介🥘🥘+蒜蓉$2上面仲有滿滿嘅蒜蓉，配埋鐵板牛肉食，好滋味，一定要試😋😋鐵板鴛鴦扒豬扒+雞扒 $120🍖🍗好抵食，豬扒同雞扒好大塊，配埋黑椒汁食，好惹味🤩🤩下面仲有薯條同埋粟米粒、蔬菜，好足料😙😙飲品：熱檸水、凍唂咕+$5飲品美味解渴，檸檬份量都幾多❤️❤️ 凍唂咕可可味濃郁🥤🥤地址：荔枝角長順街15號D2 Place二期3樓312號舖整體評分：4/5味道：4/5環境：4/5抵食：4/5