+5ºC 手抓餅專門店 (已結業)

從台灣返黎已經2個月了，偶然都會想念在台灣夜市食到的美食，而西灣河太安樓的小食店所賣的食物、越夜越多人，都可以讓遊人感受到夜市中熱鬧。這間+5℃手抓餅，也是貪食專員最愛的小食店。這間+5℃手抓餅是賣一些台式小食如手抓餅、鹽酥雞扒、珍珠奶茶等等。來到店舖先拎點餐紙，自選手抓餅配料，配料超過20款。今次我就揀了，椰菜、肉鬆、磨菇和芝士，加埋餅底一共$42，以小食而言，價錢不算是太便宜。之後就睇住師傅將餡餅煎至金黃色，之後再加入配料，熱辣辣、香噴噴的手抓餅就完成了。手抓餅口感香脆，芝士融入了餡餅和配料當中，椰菜的爽脆、啖啖的肉鬆、磨菇滋味，沙律醬令到成個手抓餅味道更加昇華，不會感覺到乾身，食完會有種幾滿足的感覺!

早兩日去太安樓探朋友 ,見到有間堂寫住台式手抓餅諗住試下 , 見有啲人等緊 , 一於好奇試下, 原來要自己剔既, 剔左幾個配料,等咗十分鐘左右我見仲未到,行過去問下啦 ,有個男人好態度好差咁話未得 未到你 , 再等多陣終於到我喇 嗰塊餅完全窿晒既 啲配料又少又唔新鮮 勁難食囉 咁嘅價錢我去 食麥記好好多囉, 總結招呼差, 味道難食 性價比低,絕不推介

其實之前都有幫襯開, 平時係個哥仔負責企檔整餅, D餅完全OK冇問題, 好食既.但係今日行過想買餅時, 發現可能太早過去, 個企檔哥仔未見人, 得個呀姐係到,見到咁既情況都知可能會有伏, 因為之前一路都係個哥仔負責整餅, 完全未見過個呀姐整, 完全對佢冇信心.但係一場來到又唔想就咁走, 於是都係落左ORDER, 最終就係咁中左伏.個呀姐開始整餅時已經可以見到佢D手勢係好生疏, 因為同時仲有2個客叫左炸雞, 但係間鋪當時得佢一個,於是佢喺煎餅途中仲要走去炸雞, 唔知係咪因為咁, 最終個餅整好時餅底好多已經變左焦黑, 個餅D材料又冇攤均喺塊餅上面, 完全集中喺一角, 當佢煎完餅要摺做三角形入袋時, D材料係完全集中左喺個角位, 最終個餅有一半以上係得餅皮冇涵既,而個角位又因為D材料塞滿晒搞到個餅淋滋滋, D汁仲多到可以流左出來浸住塊餅...完全係惡夢, 差D想直接掉左佢, 但係我最終都係食左, 而味道亦都一如所料咁難食以上所講只係針對個呀姐, 平時多數時候應該係個哥仔整餅, 完全冇哩D問題所以結論就係, 以後見到呀姐企檔時, 千祈千祈千祈唔好買餅...一定後悔

太安樓出名多小食，呢個間手抓餅專門店尤其有很多排隊。👯‍♀️👯‍♀️除左手抓餅仲有很多小食，今次來到手抓餅專門店當然要試一試手抓餅！😍手餅底有很多配料，更可選加沙律醬及辣粉，餅底$16，加上收費不一的配料，要留意最低消費為$30。最後選了咸牛肉、肉鬆及芝士，加辣粉，共$39，味道一流，餅底有濃濃蛋香，鬆脆可口，大家如加芝士，味道更佳！😍😍😍👍🏻👍🏻👍🏻人多，付錢後可先到其他小食店行逛一下！💁🏻‍♀️

朋友話之前食過呢間手抓餅覺得好好味 所以今次一齊去 佢就帶埋我去試呢到嘅手抓餅一去到就覺得個門面好有台灣嘅味道 好懷念當地嘅夜市手抓餅有好多唔同嘅配料可以選擇 而我地就揀左芝士 肉鬆 同埋雞肉 仲加左免費嘅沙律醬同埋辣椒粉 一共係$39 略嫌有啲貴平日嘅晚上都有好多人食手抓餅 所以落左單之後大概等左10分鐘先有 而且個姐姐嘅態度麻麻地芝士溶化喺手抓餅入面 仲包住啖啖嘅肉鬆同雞肉 味道唔錯 但無咩特別 試一次就夠~個辣椒粉真係好辣 所以唔係咁食得辣嘅話就唔好加啦我地仲食左椒鹽杏鮑菇 熱辣辣嘅杏鮑菇好多汁好惹味 可以反Check

難得黎到西灣河當然要去太安樓食食食鋪面細細人龍長長既+5度手抓餅之前網上見過一直想試，佢唔似得其他餐廳咁用雪藏餅底，而且自製麵團餅底$16，再自選配料，記得最低消費❗️$30手抓餅必定加蛋平時都會揀肉鬆，但見佢燒雞肉有就試試假日既關係好多人，等左差不多30分鐘。熱辣辣香噴噴既手抓餅到手啦急不及待要試食，餅底好鬆化香脆，大啖大啖咬落去雞肉好夠味同生菜係絕配雖然價錢有點貴，但食到台灣味道可一試

+5度門面好細，好彩前面係個大空地，有好多位可以俾人等拎嘢食餅底16蚊，有最低消費：每個餅計算最少30蚊起。（記得揀夠30蚊先俾單，唔係姐姐會串你hahaha）食手抓餅無論喺台灣定香港，加雞蛋同芝士係指定動作，但計完數發現係29蚊🤡見爭1蚊就加埋個肉鬆試下。沙律醬或辣椒粉就可以免費加。多數D人買完就會走咗去，我因為八卦就留喺到等，順便睇佢整。一日都唔知要整幾多份，個哥哥已經非常熟手，見到佢D材料都落得好平均。完成一份佢會叫號碼然後同你講多謝哂，見到佢煎到身水身汗我都想同佢講返多謝哂。等咗15分鐘左右就有得拎。岩岩拎上手好熱，第一啖未食到其他食材，淨係咬到餅底。餅底好高質，鬆化得黎表面煎到好脆。大概大大啖第3口就會開始食到配菜，芝士因為餅底夾住咗，熱力岩岩好令佢溶哂。雞蛋加肉鬆，真係好台灣。總括黎講：唔好對比台灣嘅物價，30幾蚊喺香港買到台灣嘅味道，抵唔抵就見人見智啦。

食品質素差，待客態度傲慢，價錢不合理，轉彎的手抓餅阿姨良好很多 試過一次就算 開係煎讓三寶旁邊只係想吸收人氣 冇認真處理過自己的出品 30幾蚊 十分失望 好似仲有賣珍珠奶茶 情願去轉彎既茶鋪

太安樓除左芋圓同海南雞，呢間手抓餅店仔細細都好多人排隊，離遠已經聽到果陣煎手抓餅既聲，係正中間走廊位地方大啲，又無其他野食舖係隔離唔駛同人迫餐死。其實只係一個小小既舖位仔，前面係收錢同整手抓餅既車仔，感覺有啲模仿緊台灣既夜市，貼左啲注意既野大家記得望下喇。叫完之後行過少少，見到店員一次過整三大塊既手抓餅，日日咁整已經好熟手，見到慢慢煎到金黃色真係好吸引。首先叫左個《餅底》($16)，加左雞肉雞蛋芝士同椰菜，所有料都跌哂去底，所以面頭只係食到熱辣辣又好脆既手抓餅，食到中間雞肉都幾多，但芝士未溶哂一塊塊，蛋溶入左塊餅度一齊食有少少蛋香，整體係唔錯既。店名：+5ºC 手抓餅專門店地址：西灣河筲箕灣道57-87號太安樓地下A34-B號舖餐牌:

昨晚與男朋友去到呢間店鋪買手抓餅 。一開始我們就寫單，寫後就準備把單撕下來給女店員。然後她話「唔洗搣，寫完就得架啦」，甘好啦，我們就無搣！男朋友去買其他野食 我就在店鋪前空地等候 後來一對情侶上前寫單 個女店員竟然叫對情侶唔洗理面頭既單（我寫個張）我行過去話「唔該 張單系我地寫架」 女店員好串甘話「你地又無俾錢又走左去 點知你地要唔要？」我說「系你叫唔好搣喎 」她話「唔搣唔代表唔洗俾錢囉」聽到火都來 明明在你店前等候都話我走左 你見到客人寫完都起碼提示先付錢後取食物 還是先寫單 食物做好先付錢！乜都無講 我餓住肚等成10分鐘 無可能見唔到我 擺明玩野 仲要用好不屑的嘴臉講「唔洗搣唔代表唔洗俾錢」 第一次甘嬲 嬲到要上來寫評語！！！無論是店員還是與家人做生意 有著你簡直是趕客！

收工去到太安樓搵食，食店同人潮都超多，花多眼亂，睇食評見呢間唔錯，一間好細嘅店，櫃檯同煎爐都要放店外，紫黃色招牌加餐牌搶眼，揀好就去櫃臺落單，店員會撕個號碼票尾，店員就即煎，5分鐘左右就出菜，簡單紙套膠袋手抓餅（$40）雞蛋、蘑菇、芝士、紫菜，手抓餅夠熱，脆卜卜又有啲煙韌咬口，芝士鹹香煙韌，蛋彈牙，紫菜幾香，蘑菇片係罐頭，彈牙不過無乜味！整體好香口好味！女店員一腳踢，無乜說話，比較cool!不過佢多野做！可能忙！手抓餅簡單好味

第一次試係無抱住期望，只係行經過見到就試下，但係好彩都好食，無伏。落order 係用張落單紙，依家有最低消費$30，我覺得唔太合埋，咁樣即係逼人要至少揀兩個配料。咁落完order,就係旁邊等， 見到佢係拎舊粉團出黎，然後放落個爐到壓扁，再煎。成個過程有用手套，不過唔知佢裝粉團個膠袋會唔會重用，如果唔用就好浪費。等左5-10分鐘左右就有得食，拎上手熱辣辣，食左時候要小心熱。今次叫左肉鬆同雞肉。肉鬆就同餅好夾，唔洗多講。反而雞肉既味道唔夠突出，可能醃得唔夠耐。整體都可以，但唔係最好，而且價錢太貴。用同樣既價錢，可以係旁邊買多啲野食。

到西灣河掃街，相信這間店舖一定是必食推介，這間鋪頭買的食物種類不多，只有手抓餅、珍珠奶茶、沙冰、鹽酥大雞粒及大魷魚等食物，而且這間店舖亦都很細，只有一個小窗口仔是讓店員傳遞食物，客人如想食手抓餅，需要自行填寫所需的配料，然後交給店員結算，店員便會即叫即做，所以手抓餅食起上黎都很新鮮。手抓餅的餅底＄16 ,配料大約有20多款，按照不同的配料計算手抓餅的價錢。這次我叫了芝士$7加燒雞肉$9，總計＄32，大約等了10分鐘，便有得食了。手抓餅煎得外皮脆軟加上溶化了的芝士及雞肉，熱騰騰真的美味非常，加埋沙律醬使手抓餅食起上黎不會乾身，不過我覺得雞肉就比較少，如果落多啲會口感更豐富。

太安樓掃街之乜都食系列小食當然有手抓餅喇🙊呢到最低消費係30蚊，我地填完落張紙到，佢話爭1蚊😞所以之後揀左另外個餸。餸就叫左芝士加司華力腸🌭其實。。。外賣要最低消費，好似系第一次😰 覺得少少唔合理，😧 你話堂食有最低消費就唔同講法。 30幾蚊一個手抓餅都ok喇，同出面差唔多。等左10分鐘左右，即叫即整好熱辣辣，唔錯。👍🏻餅底有點油，但都香脆既。🥞芝士味普通，同埋好似食左一大半皮先食到餡料。

太安樓算是西灣河的美食街，而馳名的手抓餅是我其中一間必食之選。手抓餅原名叫葱抓餅，發現於台灣夜市，名字源於一股蔥油香味撲鼻，新鮮出爐後吸引人們急不及待抓起來吃的意思。店員首先給我們一張點菜紙，餅底每份＄16，另可加配料價錢由＄5至＄9不等，要特別注意，每份手抓餅最低消費＄30。而我們最後點了一份手抓餅＄16，另加芝士＄7和加肉鬆＄7，一共＄30；再點了一串鐵板魷魚頭＄13。等了大約10分鐘，一份芝士肉鬆手抓餅終於到手，手抓餅外層金黃鬆脆，內層鬆軟可口；新鮮出爐，熱辣辣的手抓餅，令裏面的芝士完全溶化；再加入肉鬆調味，簡單好味，值得推介。不久，一串鐵板魷魚頭亦燒好，魷魚肉質爽口，簡單用椒鹽調味，味道不錯；可惜五小件魷魚頭比我想像中細少，少吃多滋味吧！