「一個人食飯食乜好？」相信呢個係好多人都諗或者面對嘅問題，好似冇乜奶油一支公去食放題或者鋸扒，於是有人會揀掃街、有人會揀食便利店或者快餐店，甚至有啲人會寧願唔食。但其實一個人食飯又有咩好怕喎？邊個話要一班人先可以食好西？下次唔使再問一個人喺xx食乜好喇，等開飯仔幫你揀啦，今次講下灣仔。

文青咖啡店   Omotesando Koffee

圖：kapriciouz、yoyoho426

一個人做文青是常識吧。去間咖啡店坐喺度望下咖啡師沖咖啡、食下輕食三文治睇下書咁，悠悠閒都幾好。呢度嘅三文治款式簡單，就咁一嚿超厚超實嘅玉子，加少少芥末沙律醬，底面夾塊包，完。但係又幾好食，玉子滑滑der，再配多杯cappuccino仲唔係品味生活啲friend？奶泡都係好滑的啊，唔飲得咖啡嘅咪飲greentea latte囉。

越式三文治   Cóm Bánh Mì by Chef Phuc Dat Bich

圖：SUPERADRIANME、hkfoodtalk

通常自己食會食hea啲，例如咬個三文治咁。但係呢間越式餐廳嘅三文治就一啲都唔hea，個包係用粘米粉造嘅，幾鬆軟，中間嘅餡仲超豐富，有大大塊豬腩肉，或者雞肉、或者牛肉，睇你點揀啦，仲有鴨肝醬，係要對自己好啲嘅。

辣味蝦湯麵   蝦麵店

圖：elmotoro、bbkok

自己一個想快食，食麵吖。一碗連麵連餸，方便快捷。但又唔想求其食碗魚蛋河嘅，可以試下呢間，都係食麵嘅，但係海鮮麵。蝦湯底麵唔錯，海鮮味濃，食得辣嘅獨食仔不妨叫下辣底，夠刺激。配料方面，無論係蝦仁、開邊蝦、定係其他海鮮，全部都好鮮甜。

光猛車仔麵   車仔麵之家

圖：shuki cheung、Lamszemei

食車仔麵畀人嘅感覺通常都係比較麻甩，車仔麵檔亦多數比較舊，或者衛生環境冇咁好。但呢間就例外嘅，裝修光猛，座位闊落，女仔就算自己一個嚟食嘅感覺都OK呀。用雞同鴨淆出嚟嘅湯底幾濃，啲麵索晒汁好入味。建議叫嘅配料包括蝦膠釀豆卜、牛肚、酸齋。

重口臭豆腐   泉昌美食

圖：bbjoyce731、Kikivicki

一個人最好就係食啲平時冇人肯同你一齊食嘅嘢，例如臭豆腐。呢間臭豆腐店，鍾意食嘅人就會覺得佢好香口，面頭炸到金黃色，外脆內嫩，點埋甜醬或者辣醬食就更加重口。唔使驚唔夠飽，呢度有30蚊兩餸車仔麵叫，仲有東風螺做配料添，夠晒風味。

文：Kar
 


開飯編輯推介：

1. 【專訪】日本人在香港 開餐廳最重要健康行先

2. 2月份好評餐廳十強

3. 2017亞洲50最佳餐廳 地區最佳餐廳全攻略

熱門文章推介：

1.  夠麻甩夠地道 元朗4間香口車仔麵店

2. 【二人前指南】港九新界齊最啱拍拖特色Cafe

3. 【熟食中心尋寶】禾稈冚珍珠 皇后街熟食市場

隨時接收最新資訊
讚好OpenRice專頁！