抹茶控新一年又多間新店試啦！今次係同日本抹茶之都京都宇治，有超過300年歷史嘅丸久小山園有關。香港有公司搵佢地合作，喺尖沙咀K11開咗間茶房！唔單止有供應正宗日本高級抹茶，另外仲有芭菲、蛋糕卷等甜品，連唔少香港人之前去京都旅行必買嘅盒裝忌廉蛋卷都有得買走，以後各位抹茶控留喺香港，想試抹茶嘅選擇又多一個啦！
丸久小山園作為日本歷史悠久嘅抹茶老店，自家茶園出品仲多次榮獲日本全國茶品評會第一名，高級抹茶自然係佢地嘅主打。尖沙咀店用嘅亦係丸久小山園供應嘅抹茶粉。
自問係超級抹茶控嘅你可以嚟一試佢地嘅熱抹茶，例如抹茶「雲鶴」薄茶伴和菓子。茶道老師建議可以先試甜嘅和菓子，再趁熱飲用茶湯，飲落抹茶獨特嘅鮮味同甘味非常濃郁，餘韻悠長。終極抹茶控更加可以一試佢地嘅濃茶。
相反食抹茶甜品仲多過飲抹茶嘅你，不如轉戰其他抹茶飲品，例如呢杯粒粒抹茶冰牛奶。先將抹茶雪成冰粒，再自己加入日本3.6牛乳。好玩之餘，牛奶嘅天然甜味配合抹茶嘅清香，入口柔滑討喜。
尖沙咀店亦有唔少堂食甜品供應，原材料一樣由丸久小山園供應，之後由香港公司加工。包括呢個抹茶流心蛋糕卷。先要大讚抹茶忌廉味道濃郁回甘，而蛋糕亦相當濕潤。不過忌廉流心程度一般，而且蛋糕部分偏甜，要連埋灑喺上面嘅抹茶粉一齊食先突顯到抹茶香味。建議同紅豆白玉分開嚟品嘗。
另外亦有最啱相機食先嘅抹茶芭菲，一層層抹茶軟雪糕、白玉、紅豆、抹茶蛋糕、抹茶啫喱、忌廉同玄米粒，層次分明。抹茶軟雪糕回甘得宜，無論係抹茶控定甜魔都會滿意，口感未算非常幼滑但無冰粒，值得一試。抹茶啫喱口感比一般嘅硬少少，配搭軟滑嘅忌廉同香脆嘅玄米粒口感豐富。不過溫馨提示一句，要影相嘅話記得快手，一嚟軟雪糕會融，二嚟中間嘅抹茶蛋糕會變淋。
最後，嚟到呢度可以話係又食又拎，因為仲有唔少丸久小山園供應嘅抹茶粉、茶包同抹茶甜點可以買走。最受歡迎嘅就要數到抹茶忌廉蛋卷同抹茶金磚蛋糕。亦有唔少趕時間又想一試抹茶真味嘅為食友就會選擇嚟買杯抹茶雪糕，或者原條抹茶流心蛋糕卷外帶返屋企慢慢嘆。
文、相：Cathy
*編按：2017年1月26日根據日本丸久小山園及香港well core聲明修改部分內容
開飯編輯推介：
2. 12月份好評餐廳十強
熱門文章推介：
隨時接收最新資訊
讚好OpenRice專頁！