有人話男人的浪漫係豆腐火腩飯，的確Lunch Time或者OT後食返碟夠鑊氣又大大份嘅碟頭飯係幾爽，但成日食嘅話小心陷入高納陷阱！消委會同食安中心合作，測試咗市面上較受歡迎嘅10款非預先包裝碟頭粉麵飯共100個樣本，當中就有45個超標！
 

圖：消費者委員會

消費者委員會同食物安全中心今次測試咗10款碟頭飯麵，包括大家食開嘅乾炒牛肉河粉、肉醬意粉，同福建炒飯等嘅鈉含量。根據世界衛生組織建議，成年人每日攝入嘅鈉唔應該多過2,000毫克。今次測試裡面有近半樣本超標，即係食一碟已經超過每日攝取量上限！
 

圖：饞餵人

10款碟頭飯麵當中以味菜排骨炒麵平均最高鈉，而金城餐廳嘅味菜排骨炒麵平均每100克就有600毫克鈉，亦係100樣本當中平均值最高嘅。
 

乾燒伊麵同肉醬意粉亦分別係今次測試當中平均鈉含量第2高同第3高嘅碟頭粉麵。咁有無較為健康嘅選擇呢？答案就係日式滑蛋雞飯同枝竹火腩飯，平均每100克分別有240毫克同230毫克，比第一嘅味菜排骨炒麵少接近一半。
 

圖：cindyank

不過消費者委員會亦補充，測試以平均每100克嚟比較，如果碟頭飯麵分量較大，最終攝入嘅鈉自然亦較多。另外同一款碟頭飯麵亦可以有頗大出入，以肉醬意粉為例，當中最高嘅必勝客樣本有430毫克，但最低嘅大快活樣本僅有210毫克，相差超過一倍。
 

圖：馬馬

想再食得健康啲嘅，消委會提醒大家可以考慮嗌少汁，或者請餐廳將醬汁分開上，因為碟頭飯麵嘅醬汁通常都係最高鈉嘅部分。維持適量嘅鈉攝取有助防止高血壓、亦降低患上心臟病、中風同腎衰竭嘅風險，所以為咗健康，大家出街食飯都係留意下啦。

資料參考：消費者委員會，蘋果日報
文：Cathy
 


開飯編輯推介：

1. 【專訪】日本人在香港 開餐廳最重要健康行先

2. 2月份好評餐廳十強

3. 2017亞洲50最佳餐廳 地區最佳餐廳全攻略

熱門文章推介：

1. 今年熱爆疏乎厘pancake 港九新界都有得食

2. 夠麻甩夠地道 元朗4間香口車仔麵店

3. 去尖沙咀玩具展覽睇白兵！博物館附近美食懶人包

隨時接收最新資訊
讚好OpenRice專頁！