熱辣辣熱辣熱辣辣好熱好熱！但今次就無論如何都要出一次街，因為一田超市最近搞咗個雪糕乳酪祭，由冰涼手工雪條、極邪惡北海道芝士蛋糕、爆紅韓國布甸、清新健康乳酪到Selfie一流嘅卡通瑞士卷馬卡龍都有。睇完介紹，Mark好心水之後就去買哂佢地返屋企慢慢嘆！

冰涼鮮果本地手工雪條

美食唔一定喺外國飛過嚟嘅，今次一田就搵嚟香港製造嘅NICE POPS，將水果配搭美酒，有仲夏荔枝雞尾酒同桑莓玫瑰蜂蜜酒兩款選擇，另外亦有大熱嘅抹茶粒粒紅豆雪條，顏色鮮艷放IG呃Like一流。

另外一樣係本地手工雪條品牌嘅LOLA’s ICE POPS，推出西瓜檸蜜、草莓檸檬同菠蘿椰子三款口味雪條，全部由100%果汁製成，透心涼之餘又健康。

*供應至18/7；NICE POPS手工雪條只限沙田 / 屯門 / 觀塘；LOLA’S ICE POPS手工雪條只限觀塘

極邪惡北海道直送芝士蛋糕

日本北海道嘅牛奶有信心保證，連帶芝士美食都特別吸引。今次有四款口味嘅芝士蛋糕同迷你芝士蛋糕由北海道直送過嚟，包括有香甜芒果醬加Mascarpone芝士嘅三重奏芒果布甸芝士蛋糕，用咗北海道忌廉芝士而面頭再灑Macaroon碎餅嘅星海馬卡龍芝士蛋糕，同北海道鮮牛奶慕絲加布甸二合一嘅布甸慕絲蛋糕，簡直就係叫人忍唔住口嘅邪惡美食嘅典型例子。

*只限19/7-1/8供應，只限沙田 / 屯門 / 荃灣 / 觀塘

爆紅韓國必食布甸

知你地貪心，所以唔單止日本美食，韓國美食都幫大家送到香港。呢款Petitzel 布甸一直都大受歡迎，亦係開飯仔推介嘅韓國手信之一。喺度搵到9款。最近又出咗南瓜同番薯等新口味，我就梗係試新嘢啦，蕃薯味甜甜地，堅係好似食緊蕃薯咁，但個布甸就唔係滑身嗰種，而係杰身啲嘅，食落都有啲質感㗎。

*供應至18/7

無罪疚感低卡日本布甸

想食甜品但又On Diet中？介紹返個一杯只係65kcal嘅低糖抹茶布甸，同72kcal嘅低糖吉士布甸。開飯仔試咗隻抹茶味嘅，細細杯，又低糖，過下口癮得嚟又唔使怕肥。講到明低糖就真係低糖，唔多甜，不過抹茶味幾香，仲甘甘地，而且睇相都睇到，超滑呀個布甸，好快就食晒，想encore啊。

*供應至18/7

清新健康有機乳酪

介紹咗咁多邪惡魔鬼，都要介紹返天使代表：清新嘅乳酪嘅。今次雪糕乳酪祭包括獨家帶嚟，波羅的海有機鮮乳酪品牌Dobilas、有多種益生菌和酵母嚟自立陶宛百年品牌Zemaitijos嘅克非爾乳酪飲品。

另外仲有西班牙PASTORT 零脂肪工藝乳酪新口味，同名廚Jamie Oliver頒獎推介嘅Tims Dairy乳酪。當中唔少都係水果口味，幫你喺呢個炎熱天氣清新一「夏」。

*供應至18/7；PASTORT 零脂肪工藝乳酪只限沙田 / 新蒲崗 / 觀塘

Selfie一流蛋黃哥Melody瑞士卷馬卡龍

最後，仲有本地品牌山下菓子嘅原條印花瑞士卷同馬卡龍禮盒，無論係Hea爆嘅蛋黃哥定係Kawaii嘅My Melody，都係一定要瘋狂Selfie嘅佳選。

*只限沙田 / 觀塘