每年四月都係櫻花季節，唔少人都會飛去日本賞櫻，但如果你係無假無錢無時間嘅N無人士都唔洗失望嘅，香港都有得「嚐」櫻！無錯係嚐味嘅嚐，因為有連鎖餅店以「桜花祭」為主題推出五款用咗櫻花甜品，令你就算留喺香港，都食到日本櫻花嘅粉紅幸福滋味。
 

Italian Tomato今年再次推出呢款「桜の花見」，即係櫻花芝士忌廉蛋糕，有大有細仲有切件裝，幾多個人食都咁方便。重點係法國芝士櫻花忌廉上面係日本直送鹽漬櫻花，而忌廉入面係鬆軟嘅海綿蛋糕，口感輕柔細膩。
 

而「桜の吹雪 」嘅真身係櫻花蘋果芝士撻，上層係散發淡淡櫻花香嘅芝士慕斯，下面就係櫻花杏仁撻底加蘋果粒焗製而成嘅香甜蘋果撻，甜而不膩。
 

見到粉紅色唔單止諗起櫻花，仲諗起士多啤梨？咁呢個「桜満開 」雪芳蛋糕就啱哂！綿密鬆軟嘅櫻花雪芳蛋糕入面有香甜嘅士多啤梨，加埋蛋糕上面嘅櫻花圖案同鹽漬櫻花，記得相機食先。
 

最後仲有櫻花牛乳布甸同櫻花白桃乳酪慕斯杯兩款最啱自私食嘅甜品，全部買返嚟餵飽哂個甜品胃同相機都好似仲係爭咗啲嘢？上Facebook搵你飛咗去日本個同事啲櫻花相，幻想自己坐喺櫻花樹下食緊，咁就當自己都去咗日本㗎啦（好似係）。
 

Italian Tomato「桜花祭」
活動日期：2017年4月1日至5月14日
地點：全線Italian Tomato、Fari-Beurre及夢見屋

文：Cathy