9月，係開始踏入秋天嘅月份，不過依然無減香港人對雪糕、對甜品嘅追求，十強榜嘅頭3名有2間都係雪糕、芭菲甜品舖嚟。另外值得開心嘅係今次個榜，有成8間咁多嘅餐廳都係第1次上榜㗎，香港愈嚟愈多好嘢食喇~
第10位 程班長台灣美食（*新上榜）
唔知係咪因為暑假興起食手工芋圓，連帶荔枝角呢間由台灣人開設嘅餐廳都多咗人去潮聖。第一次去必試招牌紅燒半筋半肉麵，湯底有濃郁牛肉味而帶微辣，牛肉鬆化軟腍牛筋軟腍富膠質口感。忠實Fans就可以點之前喺美食博覽大受歡迎嘅阿嬤傳統鳳梨冰小芋圓，鳳梨酸甜有致，大細芋圓都Q彈煙韌。
第9位 El Cerdo（*新上榜）
荃灣呢間西班牙菜館有唔少特色Tapas方便大家一邊飲酒一邊嘆，例如炸黑毛豬火腿球外脆內軟，黑毛豬火腿鹹香同幼滑薯蓉又夠夾。洋蔥薯仔西班牙奄列香口得嚟又有蛋香。想再飽肚啲記得嗌招牌西班牙炒飯，有大蝦、青口、帶子、魷魚、豬腩肉同羊肉等，充滿鮮味。
圖：isaac仔仔
第8位 中村藤吉（*新上榜）
香港人對抹茶嘅熱愛真係有增無減，呢間人氣日本抹茶老字號今次到尖沙咀店外賣店入十強榜，而且抹茶月餅有價有市。中秋過咗唔食月餅，仲有宇治金刨冰同各款軟雪糕嘅，無論係焙茶定抹茶都茶香十足。
第7位 Hami Harmony
太子呢間田園風小餐館隔咗一個月再次上榜。招牌芝士什菌釀春雞有幾邪惡唔洗再講，再訪嘅各位吃貨可以試下佢地嘅飯同意粉。黑松露帶子什菌意大利飯香而不膩，飯粒又有咬口。而卡邦尼長通粉同牛油汁蜆肉自家製蝦米幼長通粉都調味得宜，同三五知己去Relax下啱哂。
第6位 烏龍燒（*新上榜）
旺角呢間串燒店一反傳統，擺個爐喺枱面畀大家自己串燒自己燒，各款肉類、海鮮、蔬菜甚至迷你煲仔都應有盡有。唔洗驚燒唔好，因為枱面就有本秘笈。自己鐘意燒到幾成熟都得，而且自己任加孜然粉、七味粉、蜜糖、沙嗲醬等調味。最後叫多杯中式糖水沙冰，好玩又好味。
圖：糖小妹
第5位 The BASE （*新上榜）
觀塘工廈餐廳似乎成為潮流嘅寵兒，差唔多每個月都會至少有一間呢度嘅餐廳上榜。今個月就輪到呢間嘞。意粉、burger……正常café有嘅呢度都有，而人哋冇嘅佢都有。講緊嘅係爆炸飲品。一杯爆炸乳酪野莓沙冰，酸酸甜甜，上面加咗爆炸糖，咁樣飲又幾得意喎。仲想試其他特別嘢嘅話，有咖哩蕃薯條呀！
第4位 康瑞涼茶
相信大家對呢間賣芋圓嘅涼茶舖應該都唔會陌生，係呀，佢又上榜喇！仙草百配固然抵食，芋圓地瓜圓小丸子……夾埋都係25蚊碗，但其實佢仲有其他好食又抵食嘅糖水㗎，下次嚟不妨試下酒釀桂花湯圓或者桂棗雪耳甜湯吖。
第3位 L'attitude（*新上榜）
新開一排嘅韓風甜品，對於上榜即進佔第3位，一啲都唔意外。烏雲雪糕喺韓國紅咗一段時間，作為呃like名物，嚟到香港，like當然係繼續呃，去到舖頭枱枱都見到一嚿嚿雲，我指啲棉花糖呀，靚靚der甜甜der係幾治癒嘅。想與眾不同嘅，咪叫個轟炸軟雪糕囉，即係爆谷加雪糕，仲有得用test tube加焦糖醬添，甜魔至愛。
第2位 8鍋臭臭鍋（*新上榜）
唔上榜都唔知原來香港咁多人鍾意食臭豆腐。呢間喺尖咀嘅台式火鍋店，總共有8種湯底揀，有芝士牛奶鍋呀、麻辣鍋呀咁，但去得嘅梗係要試招牌嗰款，即係招牌臭臭鍋呀。成煲湯都係臭豆腐味，連帶浸落去嘅肥牛呀、豬腸呀、麵呀通通都有呢陣味，鍾意食嘅就會覺得好正。
第1位 京林屋（*新上榜）
抹茶甜品開到一街都係，呢間日本嚟嘅過江龍，用咗約一年嘅時間，終於成功打入榜，仲一入就做No.1。去到必食嘅香港限定芭菲，一杯食晒士多啤梨啫喱、大菜糕、紅豆蓉、抹茶雪糕同蕨餅，係爽嘅。但除咗去食甜品，試埋佢嘅麵食都OK㗎。
文：Kar、Cathy
隨時接收最新資訊
讚好OpenRice專頁！
