俺流塩らーめん (新都會廣場)

營業中

休息中

第一次黎新都會廣場, 估唔到咁多人, 晚飯時段間間食肆都排長龍, 花多眼亂之下揀左呢間拉麵店, 大部份客人都食完就起身走人, 唔會賴死唔走, 所以都唔洗等好耐, 排緊隊果陣店員已經俾定張點菜紙我地揀定食D咩, 好有效率丫. 我同老公兩個人, 叫左一碗期間限定拉麵和一些小食 share. 呢期做緊的限定拉麵係櫻花蝦拉麵, 由於我唔想食得太 heavy, 所以湯底揀左鹽湯, 配櫻花蝦清清地都好夾呀, 起初以為櫻花蝦係超細隻的, 原來都唔細架喎, 咬落D蝦肉係 juicy 的, 個殼都食得, 幾鮮甜噃. 麵條軟硬度我 tick 左普通, 下次可以試硬D, 因為碗麵都幾大碗, 揀硬D食得慢都唔怕浸到淋晒. 我勁愛流心蛋, 所以追加左一份玉子, 半生熟的流心蛋非常滑溜, 好正! 另外點左三個小食, 唐揚炸雞, 俺流餃子同柚子椰菜. 唐揚炸雞有驚喜, 睇 menu 張相細細碟, 寫明四件, 一上檯原來好鬼大碟的, 係四件超級大舊的炸雞, 大大件但一D都唔鞋, 好滑好多肉汁, 炸得夠乾身, 唔油膩, 皮脆肉嫩, 大讚! 柚子椰菜看似平平無奇, 但加左柚子汁好清新, 好開胃, 又可以解膩, 是不錯的

葵芳區人多，好多餐廳都預左要等位（鬼叫自己懶冇book餐廳），今日來到呢間拉麵，等左10幾分鐘就有位啦拉麵款式唔係好多（其實日本風味來來去去都係個d)，我好中意食溫泉蛋，落order時更係要加啦，侍應好細心咁提點，拉麵本身已跟一隻溫泉蛋，confirm我係咪要額外再加。好在佢溫馨提一提，如果唔係一餐食兩隻蛋，膽固醇仲唔超標咩...最值得一提係...食完唔會成口味精！

黑蒜濃湯好正，麵質適中又不失有咬口，湯底香濃，塊义燒肥瘦適中，溫泉蛋做到了日本水準(也是必然的)，如果再多啲蒜和葱就更好，明太子芝士餃子也不錯，不過一定要加柚子辣椒便更加好食，下次會試埋其它。枱上透明用匙羹那個紅色辣油點解一点都不辣，梅醬唔知佩什麼食物呢？(估計應是炸物，炸雞...等)，黑蒜醬也有点多餘(只個人意見)。總括而言，拉麵最緊要的湯底和麵質也到位，葵芳有咗呢間拉麵店太好了。如果員工有埋日本feel便感覺更地道，例如好似一蘭拉麵咁啲員工不停咁講歡迎光臨，多謝光顧等等，給人印象好有幹勁！

朋友知道我鍾意食拉麵，又知我最近未能去東京喇！所以佢誠意推薦我去試一試葵芳呢一間來自日本涉谷的拉麵店，等我止癢。晚了一點到達，不用排隊我點了俺流熟成濃湯拉麵。湯底係用雞骨、豬骨、香葱餚成。這個熟成濃湯比起一般拉麵店的豬骨湯淡味少少，但我可以肯定佢係冇味精，因為食完之後唔會好口渴。以前試過喺其他拉麵店，食完豬骨湯拉麵，飲咗大半公升水。呢度嘅叉燒比一般拉麵店厚三倍，我十分喜歡。玉子還可以，但兩隻蛋一隻靚，一隻唔靚。好多種唔同嘅醬料擺喺枱面，包括梅子醬、柚子胡椒、黑蒜蓉，全部任加，可以自己調製自己碗麵嘅味！不過我今次冇加，想試吓原味。其實朋友係誠意推薦人氣「黑蒜油熟成濃湯拉麵」，不過今日唔想食咁濃味的，下次有機會，會再來嘗試。

平時每次嚟到都排晒長龍，今日難得下午茶時間到訪，無乜人排隊，當然要入去試下啦！自稱係涉谷過江龍，湯底仲係自己研發，果然味道唔錯！本人比較重口味，於是揀佢咗個人氣產品黑蒜油熟成濃湯拉麵。見到好多人都有唔同評價，我自己親身試過後就覺得係好味嘅。一拎黎已經有好香噴噴嘅黑蒜味，我自己再加黑蒜油調味仲更加正，食完又唔會好似其他人形容咁好口渴喎。對於男士嚟講，呢個份量其實算係足夠。只係我個人比較大食，未夠飽，所以我再點多個玉子大阪燒同明太子芝士燒餃子，兩個同樣係新產品嚟架！玉子大阪燒個樣幾過癮嘅，然後一切開就係流心嘅蛋黃，正呀！另外個明太子芝士燒餃子，啲餃子比平時嘅細粒，一啖一粒。最估唔到係佢做到某某周刊最鐘形容意嘅邪惡芝士拉絲嘅效果呀！除咗位置喺樓梯底比較奇怪，同埋成日要排隊等好耐，Overall 感覺都唔錯。

多負評是有原因的早幾日喺葵芳行新都會廣場見到間拉麵店就行左入去食因為朋友係一個拉麵控所以間唔中就會話想食拉麵咁今日見幾肚餓就行左入去食啦佢嘅特別之處係佢喺喺兩條扶手電梯中間🙈🙈🙈其實講真都幾奇怪😅😅成日都見到有好多人排終於今日的起心肝行入去食甘我哋一人叫左一碗我要咗個辛辣熟成濃湯拉麵，樓朋友叫左淹流男盛熟成拉麵另外加左個檸檬梳打嚟到嘅時候佢俾咗兩碗鹽湯拉麵我哋咁我就同佢講話我嗰碗係要辣佢就同我講不如你自己加辣椒油落去啦一樣嘅姐跟住我心諗我自己加辣椒油落去咁我駛乜喺度食咁就叫佢換啦咁佢都願意換嘅但係出到嚟真係落辣椒油俾我囉完全覺得呢碗唔係拉麵係喺街邊食嘅車仔麵而且個麵質普遍都係太淋我叫左硬 姐係普通朋友叫咗普通 就即係淋另外，佢有三款醬俾嘅人簡黑蒜油 柚子胡椒 梅子咁我落左幾匙黑蒜油落去之後都覺得分別唔係好大 個唐揚炸雞就幾好食嘅果皮脆 肉質又嫩總括而言 係一般 個味道ok ge 不過唔好expect係正宗拉麵 只係一碗普通既麵

本身都冇咩期望入黎食，入到去，十萬個後悔！衰啲講食出前一丁可能都好味過呢間鋪～啲面同湯底都非常一般，完全冇特別！有啲似屋企煮既味道！呢個價錢我會俾多小小去其他連鎖拉麵店！

作為一個拉麵癡，我三不五時會四出尋找美味拉麵。這晩又癮起，朋友推介這裏，便一同前來一試。麵店位於商場電梯下，感覺有點兒奇怪，座位也蠻擠迫的，我們坐在吧枱，有肩摩接踵的感覺。不過很多拉麵店都偏擠，也慣了，只要好吃就可以。我選了大熱的黑蒜油熟成濃湯拉麵，湯底香濃、滑而不膩，麵條彈牙，相當不錯。朋友選了俺流柚子塩湯拉麵，他説湯底清鮮帶濃郁柚子香，也讚麵條爽口，非常滿意。唐揚炸雞是意料之外的好吃，皮脆肉嫩，吃罷令人心感滿足。

尋日去咗迪迪尼玩，睇完夜間巡遊返出嚟揾嘢食，醒起個 friend 提過呢間拉麵好味道，即刻上 openrice 𥄫吓咩料先，點知見到好多負皮，又話啲麵太淋又話湯底唔得仲要服務差㖭⋯ 本來有啲卻步，但一時間又諗唔到附近有乜筍嘢，見佢近近哋即刻飛車過去。大約八點零九點到，已經唔駛排隊，差唔多行到門口時有個笑容可掬嘅女孩子出嚟打招呼同埋帶我哋入座，跟著另外一個男仔放低水、餐牌同用心介紹唔同湯底，及後逐一上菜，成個過程服務不知幾好，員工有禮貌有笑容有水準，無出現過寒冰西面，好過出面好多食肆。我哋叫咗黑蒜油熟成濃湯拉麵、淹流柚子塩湯拉麵、豆腐野菜沙律、玉子大阪燒同埋唐揚炸雞。個黑蒜油熟成濃湯拉麵一上枱，見到摻和咗黑蒜油嘅乳白色湯底帶著油潤光澤就已經覺得對板，咪講笑即刻試啖湯先，喂得喎～ 入口陣陣香濃而不黏嘴，又夠熱辣辣。再𠽌返拄麵，咦都唔錯吖，爽滑彈牙又掛湯。試咗原味就係時候加入我追加咗嘅青葱同白葱喇，一二三車晒落去之後有稍微降低咗碗麵嘅温度，但可為湯底提香之餘亦令麵條口感更為複雜。餸方面有一塊叉燒，食落普通啦無乜驚喜；另外玉子原隻上，咬開都算流心有啲蛋香，但原來無調味嘅，我自己比較鍾意味付蛋。

係葵芳呢個美食地區，除左葵涌廣場呢個匯聚世界美食嘅地方之外，仲有一個新都會廣場！住係葵芳一帶既市民真係好幸福！今次去左新都會廣場行街，但因為仲係改建緊，個廣場好似迷宮咁。誤打誤撞行行下比我見到一間日本餐廳好多人排隊，原來係食拉麵嘅！我叫左一碗「俺流男盛熟成拉麵」，餐牌寫佢係人氣，都算多配料，分別有炸雞、叉燒、流心蛋。啲炸雞有度唔好，就係用湯浸住，所以令到啲炸雞食落個皮有啲"林"，但啲雞都算大件又嫩；啲叉燒雖然都多肥肉，但肥肉係入口即溶，口感唔錯，搞到我都忍唔到口吞左成塊叉燒！而我覺得最值得推介嘅係呢度啲雞蛋，係流心蛋黎，係我意料之外！至於另一個「俺流芝士辛辣濃湯拉麵」芝士好似唔夠多，有少少失望。

之前行過葵芳呢個商場見到一間好奇特嘅店鋪，係一間電梯底下面嘅拉麵店，特別在於好迫但係出面又有好多人等位。呢間又係日本開過嚟嘅拉麵店，香港人見到日本過嚟開嘅店都總係會湊熱鬧去試，既然咁多人排隊，試下都無壞嘅！平日嘅8點幾嚟到都仲有一條小小嘅人龍，大約等左3個字左右就有位。排緊隊嘅時候侍應已經俾定餐牌同order紙俾人落定單先。叫左俺流男盛拉麵、黑蒜熟成濃湯拉麵同埋柚子椰菜。柚子椰菜我覺得鹹左少少，叫碟菜都係想清番d調味料可以輕手少少。俺流盛男拉麵除左叉燒同蛋之外仲加左兩件炸雞。我諗因為係增量版所以預左係俾男人食掛，待應問都無問就擺低俾男人 =.=但係其實係我叫嘅。湯底比起黑蒜油濃湯拉麵清，麵質我揀左普通，食到尾就覺得太淋。至於舊炸雞，我覺得唔放入麵度可能會好少少。炸雞上枱嘅時候已經浸左一半淋晒喇！黑蒜油湯底比較濃，我自己就鍾意淡味d，所以我鍾意盛男拉麵個湯底多d！雖然拉麵味道都過得去，不過呢度嘅座位真係好迫下。最差嘅位係之前有食家坐過近扶手電梯附近嘅位，一開始本來都係安排我坐呢個位，真係名符其實嘅握手位。最後見到一張大枱有位要搭枱都即刻涉過去啦。呢個價位嘅拉麵，我諗個位其實可以唔洗咁迫.

俺流柚子塩味拉麵，先呷一口湯，添上柚子汁的湯吃起來很清新，我從沒嘗過，故有種新鮮感，這個所謂塩湯是用上大量雞骨、豬骨和香蔥以慢火餚制而成，湯較清從而突出柚子味。我覺得這個柚子湯是不錯，很醒胃，很有新鮮感，但就是麵條方面不太滿意，麵條太稔，义燒乏味，流心蛋原隻上，唯咬開後發現不太流心。俺流男盛熟成拉麵，湯不濃！湯謂用大量雞骨、豬骨和香蔥以壓力煲餚制而成，但我覺得這個奶白色的湯頭不如預期的香濃。俺流塩是來自東京的澀谷，登陸香港後分別在屯門和葵芳設店，我每次在晚市時間經過葵芳店時，也見人龍，故一直想吃卻沒機會品嘗，今次一次過嘗了塩和熟成兩種不同方法餚制的湯底，基本上，塩即是慢火餚制，熟成則是壓力煲快速作成，添了柚子汁的塩湯是不錯，唯熟成的湯則很失望，基他食的方面亦令黎生失望。而吃畢後不久，就是口渴。服務方面，我真有話兒，見餐牌有塩和熟成兩款，便找服務員了解，可惜該服務員九吾搭八，對著餐牌搬字過紙般說，便當向我解釋了，我火起來時，另一位像樣的服務員才介入給予詳細解釋。總括來說，這條東瀛過江龍令人，失望了，不用排隊來吃柚子湯還可以，但吃過一次以後，我真的沒興趣再吃俺流塩了。

小妹是一個拉麵控，基本上差不多全香港的拉麵店也嚐過八八九九。 有一次經過葵芳工作，看見這間店大排長龍，我當然不會放過任何吃拉麵的機會。等了差不多三十分鐘才能入座，心想質素一定很高香港人才會願意花這麼長時間去排隊吧。點了俺流味憎濃湯拉麵，其實俺流是什麼意思我也不知道，但又跟店名沒有什麼關係。我慣性吃拉麵會先試湯底， 但我只可以用失望二字來形容。 整個湯底基本上只有咸味，跟我自己在家用鹽加在熱水的味道差不多，而且是很咸的程度， 完全沒有想渴第二啖的衝動。 麵質方面不過不失，跟在一般拉麵舖吃到的無異，但份量真的異常地少， 我一個女仔吃完也完全不飽肚， 基本上吃上五六啖已經吃完全碗。吃完這碗性價比極低的拉麵後我和我的朋友已經在想往另一間餐廳再吃，可以想像得到這碗拉麵的份量何其少。要花78蚊食一碗只有鹽味的拉麵，還要等上三十分鐘。 我只能說我不會再中伏了。

在新都會落戲院嗰層嘅扶手電梯天井位，射燈照著大大塊日文毛筆字木牌，就算路過目光都會被吸引多看一眼。我們坐在貼著扶手電梯那一桌，親密的程度是可以跟每一個使用扶手梯的朋友握手。先上小食大阪燒餃子，$38六粒，每粒size像魚皮餃那麼「精緻」，餃子是煎得香脆，但食不到任何餃子餡料的味道，只食到面頭一大pat照燒汁和沙律醬味。辛辣熟成濃湯拉麵，$62，非常迷你，個麵四五啖就食完，配料也非常單薄小得可憐，連女仔都未必食得飽，何況男仕？沒有深究熟成是什麼意思，但濃湯就一定一定說不上，相反想讚吓佢個湯幾清爽唔油膩，辛香而不辣。朋友點的黑蒜熟成濃湯拉麵，$68，同樣迷你，但多隻蛋，感覺看似良好一點。仲要加一

自問對拉麵有要求的食客，不建議嘗試這間拉麵店。第一食物質素:是黑蒜油濃湯熟成拉麵- 湯底偏淡-黑蒜油味更淡- 叉燒得薄切一塊- 麵身尚算有質素- 份量偏少第二價錢- 連加一total$76- 價錢與質素未能成正比總結味千拉麵的質素，一風堂的價錢。